මැතිණිගේ කාලේ ඇන් ඇම් ට අභියෝග කළ බැංකු සේවකයන් සැමරේ

සිය ඉතිහාසයේ පවත්වන ලද දීර්ඝතම වැඩවර්ජන ක්‍රියාමාර්ගයට අඩ සිය වසක් පිරීමේ සැමරුම දිවයිනේ ප්‍රමුඛතම වෘත්තීය සමිතියක් වන ලංකා බැංකු සේවක සංගමය (CBEU) විසින් පවත්වා තිබේ.

දින සියය ඉක්මවා පැවති එම ඓතිහාසික වැඩවර්ජනයට වසර පනහක් සපිරෙන මොහොතේ, වැඩවර්ජනයට නායකත්වය සහ ක්‍රියාකාරී දායකත්වය ලබාදුන් වෘත්තීය සමිති ක්‍රියාකාරීන් සිහිපත් කළ ඔවුන්ගේ අත්දැකීම් වත්මන් කම්කරු නායකත්වය සමග බෙදා ගැනීමේ වැඩසටහන සැප්තැම්බර් 8වැනිදා පවත්වා තිබුනේ කොළඹ මහජන පුස්තකාල ශ්‍රවණාගාරයේ දී ය.

බැංකු සේවකයන්ගේ නොවිසඳුණු ගැටළු ගණනාවක් හේතුවෙන් 1972 සැප්තැම්බර් 01 වැනි දින ආරම්භ කරන ලද මෙම වැඩ වර්ජනය නිල වශයෙන් අවසන් කෙරුනේ දින 108කට පසු 1972 දෙසැම්බර් මස 18 වැනි දිනදීය.

දිවයින පුරාම පැවති සංවිධාන රැස්වීම් මාලාවකින් පසුව, 1972 අගෝස්තු මස 31 වැනි දින මධ්‍යම රාත්‍රියේ සිට ආරම්භ කරන ලද වැඩ වර්ජනය, CBEU හි දිවයින පුරා ශාඛා වල 7500 ක් පමණ වූ මුළු සාමාජික සංඛ්‍යාවෙන් 4000 කට වැඩි පිරිසක් සහභාගී වූ කොළඹ, වැල්ලවත්තේ රාම ක්‍රිෂ්ණ මීසම් ශාලා භූමියේ පැවති රැස්වීමේදී ඒකමතිකව අනුමත කරන ලද බව ලංකා බැංකු සේවක සංගමය ඒ සම්බන්ධයෙන් නිකුත් කරන ලද “1972-2022 අඩසියවසක ස්මර්ණ ප්‍රණාමය” ප්‍රකාශනයේ දැක්වේ.

ඒ අනුව 1972 සැප්තැම්බර් 01 වැනිදා ලංකා බැංකුව, මහජන බැංකුව, රාජ්‍ය උකස් බැංකුව, ස්ටෑන්ඩර්ඩ් චාර්ටඩ් බැංකුව, හොංකොං බැංකුව, හබීබ් බැංකුව, ඉන්දියානු ඕවර්සීස් බැංකුව, ඉන්දියානු රාජ්‍ය බැංකුව, ඉන්දියන් බැංකුව, ලංකා වාණිජ බැංකුව සහ හැටන් නැෂනල් බැංකුව යන බැංකු වල CBEU සාමාජිකයන් සියයට සියයක්ම වැඩ වර්ජනයට සහභාගීවීම මගින්, මුළු රටේම බැංකු කටයුතු මුළුමනින්ම අඩාල විය.

වෘත්තීය සමිති විශාල සංඛ්‍යාවක්, මෙම වැඩ වර්ජනයට සහයෝගය පළ කළ අතර, වරාය කම්කරුවන් තමන්ට නොමිලයේ ලැබෙන දිවා ආහාරය වැඩ වර්ජකයනට පරිත්‍යාග කිරීමට කටයුතු කර තිබේ.

මුදලින් මෙන්ම පිකට් කරන ස්ථානවල දී ආරක්ෂාව සැපයීම මගින් ද ඇතැම් කම්කරු කොටස් මෙම සටන දිරි ගැන්වීමට සහාය විය.

සිරිමාවෝ බණ්ඩාරනායක අගමැතිනියගේ නායකත්වය යටතේ පැවති එවකට රජයේ මුදල් අමාත්‍යවරයා වූ ආචාර්ය ඇන්.ඇම්.පෙරේරා විසින් නව සේවකයන් බඳවා ගැනීමෙන් ද, වර්ජනයට සහභාගී වූ නිලධාරී සංගම් වල වර්ජනයට සහභාගී නොවූ සාමාජිකයන් ඔවුන්ට අයත් නැති රාජකාරිවල යොදවමින් ද, රජයේ වෙනත් බලධාරීන්ගේ මැදිහත් වීම් වලකමින් ද වර්ජනය කඩාකප්පල්කර දැමීම ඉලක්ක කරගෙන පියවරයන් ගෙන තිබිණි.

“බලවත් ආර්ථික අපහසුතා හා කුමන ආකාරයත් විසඳුමකට ඉඩ නොදී හරස්වන මුදල් ඇමතිවරයා දරදඬු ආකල්පය ද හමුවේ වර්ජනය තවදුරටත් ඉදිරියට පවත්වාගෙන යාම අපහසු කාර්යයක් වූ බැවින් 1972 දෙසැම්බර් 15 වැනි දින පැවති මහා සාමාජික රැස්වීමක තීරණයක් පරිදි එම ඓතිහාසික වැඩ වර්ජනය 1972 දෙසැම්බර් 18 වන දින අවසන් කිරීමට සිදු විය.”

වැඩ වර්ජනය අවසන් කිරීමෙන් පසු එයට සහභාගී වූ සේවකයන් මත දැවැන්ත මර්දනයක් ක්‍රියාත්මක වූ අතර, ඔවුනට සිය අහිමි වූ අයිතිවාසිකම් දිනා ගැනීමට වසර පහක පමණ දීර්ඝ අරගලයක නොනවත්වා නිරත වීමට සිදු විය.

අඩසිය වසක ස්මර්ණ ප්‍රණාමය ( 1972-2022)

මෙම ඓතිහාසික වැඩවර්ජනයට අඩසිය වසක් සපිරීම නිමිත්තෙන්, පැවැති සැමරුම් වැඩසටහනේ ආරාධිත දේශනය මහාචාර්ය අර්ජුන පරාක්‍රම විසින් පවත්වනු ලැබූ අතර, ලංකා බැංකු සේවක සංගමයේ ජ්‍යේෂ්ඨ උප සභාපතිවරයකු මෙන්ම මව් සංගමයේ සභාපතිවරයෙකුව සිටි රුසිරුපාල තෙන්නකෝන් විසින් 1972 වැඩ වර්ජනයේ මතකයන් සිහිපත් කරමින් සමරු දේශනයක් ද, 1978 වර්ෂයේ මව් සංගමයේ සභාපතිවරයා ලෙස කටයුතු කළ ඒ. ටී. නවරත්න විසින් සමරු දේශනයක් ද සිදු කළේය.

මෙම සැමරුම් වැඩසටහන සඳහා 1972 දී එම වැඩ වර්ජනයට සහභාගි වූ හා එදා සංගමයට නායකත්වය දුන් දැනට ජීවතුන් අතර සිටින ක්‍රියකාරීන් බොහෝ දෙනකු සහභාගිව සිටි බව බැංකු සංගම් ක්‍රියාධරයෝ පවසති.

එම වැඩසටහන CBEU ෆේස්බුක් පිටුව ඔස්සේ මෙතනින්, : https://fb.watch/fpTJx53MYl