පාඩු විඳින රාජ්‍ය ආයතන පමණක් විකුණන බව කියන ආණ්ඩුව ලාභ ලබන කඳුකරයේ සත්ව ගොවිපලක් විකුණා දැමීමට සූදානම් වන බවට චෝදනා කරමින් එහි සේවකයන් පිරිසක් විරෝධතාවයක් දියත් කර තිබේ.
ජාතික පශු සම්පත් සංවර්ධන මණ්ඩලය යටතේ පාලනය වන ආගරපතන – බෝපත්තලාව සත්ව ගොවිපොලේ සේවකයන් විරෝධතාවය දියත් කරමින් අවධාරණය කර ඇත්තේ එම ගොවිපොල ලාභ ලබන තත්වයක පවතින බැවින් එය පෞද්ගලීකරණය කළහොත් සේවකයන් දැඩි අසාධාරණයකට ලක්වන බවයි.
සේවකයන් 150 ට ආසන්න පිරිසකගේ ජීවිකාව රැකී ඇත්තේ මෙම ගොවිපල නිසා බව පෙන්වා දෙන විරෝධතාකරුවන් අවධාරණය කරන්නේ තමන් අඩු වැටුපකට මෙහි සේවය කළත් වැටුප් වැඩි වීමක් ඉල්ලා නොසිටින බවයි.
“අපි මේක රැකගෙන තියෙන්නේ අපේ හදවත වගේ. ශ්‍රමදාන කරලා. රුපියල් 40 යි මේක මුලික පඩිය. දැන් රුපියල් 600 යි. අපි ඒ 600 පඩියට දැන් වැඩ කරන්නේ අපිට මේක රැකගන්න ඔන හින්දා.අපි ශ්‍රමදාන කරලා මේක රැකගෙන තියෙන්නේ,” යි විරෝධතාවයට එක්ව සිටි සේවිකාවක් සදහන් කළාය.
ඇය බලධාරීන්ගෙන් වැඩි දුරටත් ඉල්ලා සිටින්නේ ගොවිපලක් පෞද්ගලීකරණය කිරීම වහාම නතර කරන ලෙසයි.
“ජනාධිපතිතුමා මේකට සවන් දෙන්න. පශු සම්පත් ඇමති මේකට සවන් දෙන්න සවන් දීලා අපි ගැන හිතලා කතා කරන්න. කතා කරලා මේකට අපිට නිසි පිළිතුරක් ලබා දෙන්න.”
මේ වසරේ මුල් මාස හය තුළ පමණක් ආගරපතන – බෝපත්තලාව සත්ත්ව ගොවිපොල රුපියල් ලක්ෂ 60 ක ලාභයක් උපයා ඇති බව එහි සේවකයෝ පවසති. සත්ව ගොවිපල පෞද්ගලීකරණය කිරීම සම්බන්ධයෙන් එහි පාලනාධිකාරියද වැඩි විස්තර නොදන්නා බව ඔවුහු වැඩි දුරටත් සදහන් කරති.
“ලාභ ලබන මෙම ආයතන කුණු කොල්ලයට විකුණා නොදමනු, බලවතුනි බෝපත්තලාව රැක දෙනු, දේශිය කිරි නිශ්පාදන අඩපන කිරීම රජයේ සැලැස්මද? , ලාභ ලබන ආයතන පුද්ගලීකරණය කිරීම රජයේ ප්‍රතිපත්තියද?, පෞද්ගලීකරණය හේතුවෙන් පරම්පරා තුනක් අනතුරේ, ලාභ ලැබු බෝපත්තලාව ගොවිපල පෞද්ගලික කරනය වහා අත්හිටුවනු, පෞද්ගලිකරණ ගැසට් පත්‍රය වහා හකුලා ගනු,” ආදී සටන් පාඨ පෙරටුකරගනිමින් විරෝධතාවය දියත් වූ ආකාරය බව පළාත් බද වාර්තාකරුවන් විසින් එවන ලද වීඩියෝ දර්ශනවල දැක්වේ.
ජනපති ස්ථාවරය
‘දි ඉකොනොමිස්ට්’ ජාත්‍යන්තර සඟරාව සමඟ සම්මුඛ සාකච්ඡාවකට එක්වෙමින් ජනාධිපති රනිල් වික්‍රමසිංහ පසුගියදා සදහන් කර තිබුනේ පාඩු ලබන රාජ්‍ය ආයතන පෞද්ගලීකරණය කිරීම අත්‍යවශ්‍ය බවයි.
ශ්‍රී ලංකා ගුවන් සමාගමට අමතරව ශ්‍රී ලංකා රක්ෂණ සංස්ථාව, ටෙලිකොම් වැනි ආයතන පෞද්ගලීකරණය කළ හැකි බව ද ජනාධිපතිවරයා එහිදි කියා තිබුනි.
ඛනිජ තෙල් සංස්ථාව සම්බන්ධයෙන් ගත යුතු ක්‍රියා මාර්ගය ගැටළුවක් බව සඳහන් කළ ජනාධිපතිවරයා තව දුරටත් පවසා තිබුනේ වසර 40 ක් පුරා එම ක්ෂේත්‍රයේ සිටින පිරිස සමගද සාකච්ඡා කර නව ආයෝජන සඳහා අවස්ථා විවෘත කරන බවයි.
රාජ්‍ය ආයතන ප්‍රතිව්‍යුහගත කිරීමේදී වෘත්තිය සමිති දක්වන විරෝධය ගැන තමා කරදර නොවන බවත් තමාට වැදගත් වන්නේ ජනතාව බවත් කී ජනාධිපති රනිල් වික්‍රමසිංහ ‘තත්වය යහපත් වන බව ජනතාවට තේරුම් යන විට’ ඔවුන් මේ ක්‍රියාවලිය සමග ඉඳිවී යැයි විශ්වාසය පළ කර තිබුනි.
Facebook Comments
