අනවසරයෙන් මුහුදු මගින් විදෙස් රටකට සංක්‍රමණය වීමට සුදානම් වන බවට සැක කොට ශ්‍රී ලාංකිකයන් අසූ පස් දෙනෙකු නාවික හමුදාව අත්අඩංගුවට ගෙන තිබේ.
ශ්‍රී ලංකා නාවික හමුදාව පවසන්නේ මඩකලපුව ප්‍රදේශයට ඔබ්බෙන් වූ මුහුදු ප්‍රදේශයේ සැප්තැම්බර් 11 වන දින සිදුකළ විශේෂ සෝදිසි මෙහෙයුමකදී නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සාහ කළ බවට සැකකෙරෙන පිරිස තම භාරයට ගත් බවයි.
අත්අඩංගුවට ගත් පුද්ගලයන් 85 දෙනා අතර පිරිමින් 60ක්, කාන්තාවන් 14 ක්,සහ වයස අවුරුදු 18 ට අඩු එකළොස් දෙනෙකු වේ.
මෙලෙස නාවික හමුදා භාරයට පත් පුද්ගලයින් පිරිස මඩකලපුව, ත්‍රීකුණාමලය, මූතූර්, කිලිනොච්චිය, යාපනය සහ මඩු යන ප්‍රදේශයන්හී පදිංචිකරුවන් බවට හඳුනාගෙන ඇති අතර ඉදිරි නීතිමය කටයුතු සඳහා එම පිරිස ත්‍රීකුණාමලය වරාය පොලීසිය වෙත බාර දී තිබේ.
මීට අමතරව, නාවික හමුදාව සහ පොලිස් විශේෂ කාර්යය බලකාය එක්ව මඩකලපුව මොහොත්තිවාරම් වෙරළ ප්‍රදේශයේ සිදුකළ සෝදිසි මෙහෙයුමක දී අනවසරයෙන් මුහුදු මගින් විදෙස් රටකට සංක්‍රමණය වීමට සුදානම් වන බවට සැක කෙරෙන පිරිස ප්‍රවාහනය කළ බවට සැකකෙරෙන ඩිංගි යාත්‍රා හතරක්, සමඟ සැකකරුවන් පස් දෙනෙකු අත්අඩංගුවට ගෙන ඇත.
එම සැකකරුවන් සහ ඩිංගි යාත්‍රා ඉදිරි නීතිමය කටයුතු සඳහා කාත්තන්කුඩි පොලීසිය වෙත භාර දුන් බවයි නාවික හමුදාව වැඩිදුරටත් නිවේදනය කරන්නේ.
Facebook Comments
