ජාත්‍යන්තර සහයෝගයෙන් කොටි සංවිධානය පරාජය කිරීමට සමත් වුවද සිංහල ජනතා අරගලකරුවන් හමුවේ පළා යන රාජපක්‍ෂවරුන් ඉන්දියාවෙන්ද සරණ පතන බවට තමිල්නාඩු දේශපාලනඥයෙක් අවධාරණය කර තිබේ.
“ලංකාවේ දෙමළ ජනතාව ඝාතනය කරපු රාජපක්‍ෂලා දැන් යන්න එන්න තැනක් නැතුව පණ බයේ ඉන්නේ. පිටරටවල උදව් අරන් තමයි මේ අය දෙමළ ජනතාව මැරුවේ. දැන් සිංගප්පුරුවේ ඉන්නවාලු. ඉන්දියාවට එන්නත් අහලා තියෙනවා. මිට අවුරුදු කිහිපයකට කලින් අපි කිව්වා සිංහල ජනතාව විරුද්ධ වුනු දවසට පණ බේරාගෙන යන්න වෙයි කියලා. අද ඒක වෙලා තියෙනවා,“යැයි වයිකෝ නමින් ප්‍රකට ද්‍රවිඩ මුන්නේත්‍ර කළහම් [DMK] ලේකම් වයියපූරි ගෝපාලස්වාමි පවසයි.
ඉන්දියානු මාධ්‍ය වාර්තා කර ඇත්තේ තමිල්නාඩුවේ රාමනාදන්පුරම්, රාමේශ්වරම් පන්බන් ප්‍රදේශයේ පැවති උත්සවයකට එක්වෙමින් වයිකෝ මෙසේ පැවසූ බවයි.
“තමිල්නාඩු දෙමළ ධීවරයන්ව ලංකාවේ නාවික හමුදාව අත්අඩංගුවට ගන්නවා. ජුලි මාසෙට විතරක් ධීවරයෝ තිස් දෙනෙකුට වැඩිය අල්ලා ගෙන තියෙනවා.“
මෙම ක්‍රියාවලිය නවතා දමා ධීවරයන්ගේ ආරක්ෂාව සහතික කිරීම මධ්‍යම ආණ්ඩුවේ වගකීමක් වුවත් එය මෙතෙක් ඉටු කර නොමැති බවට ඩි.එම්.කේ. ලේකම්වරයා ඉන්දීය ආණ්ඩුවට චෝදනා කරයි.
Facebook Comments
