ගෝඨා සමයේ පැනවු දෙමළ ඩයස්පෝරා තහනම රනිල් ඉවත් කරයි

ගෝඨාභය රාජපක්ෂගේ නායකත්වයෙන් යුත් රජය විසින් දෙමළ ඩයස්පෝරා කණ්ඩායම් කිහිපයකට පනවා තිබු තහනම් රනිල් වික්‍රමසිංහ නායකත්වය දෙන වත්මන් ආණ්ඩුව විසින් ඉවත් කරගෙන තිබේ.

ආරක්ෂක අමාත්‍යාංශය සඳහන් කළේ එක්සත් ජාතින්ගේ ආරක්ෂක මණ්ඩල සම්මුති 1373 යටතේ දැනට අසාදු ලේඛණ ගත කර ඇති සංවිධාන හයක තහනම මෙලෙස ඉවත් කරන ලද බවයි.

ඒ අනුව ගෝලීය දෙමළ සංසදය (GTF), බ්‍රිතාන්‍ය දෙමළ සංසදය (BTF), කැනේඩියානු දෙමළ කොංග්‍රසය (CTC), ඕස්ට්‍රේලියානු දෙමළ කොන්ග්‍රසය (ATC),ලෝක දෙමළ සම්බන්ධීකරණ කමිටුව සහ ද්‍රවිඩ ඊලාම් ජනතා සම්මේලනය යන සංවිධානවල තහනම ආරක්ෂක අමාත්‍යාංශය විසින් ඉවත් කර ඇත.

පසුගිය කාලසීමාව තුළ මෙම සංවිධානවල ක්‍රියාකාරිත්වය සම්බන්ධයෙන් සිදුකළ අධ්‍යයනය කිරීම්වලදී ඉදිරිපත් වූ නිර්දේශ අනුව පසුගිය සිකුරාදා සිට ක්‍රියාත්මක වන පරිදි එම තහනම ඉවත් කළ බවයි ආරක්ෂක අමාත්‍යාංශය පවසන්නේ.

“2012 අංක 1 දරන එක්සත් ජාතීන්ගේ රෙගුලාසි යටතේ, නම් කරන ලද පුද්ගලයින්, කණ්ඩායම් සහ ආයතන ලැයිස්තුව සමාලෝචනය කෙරෙමින් පවතී. මේ වන විට පුද්ගලයින් 318 දෙනෙක් සහ හිමිකම් 04ක් ඉවත් කිරීම සඳහා යෝජිතව ඇත. මෙය අඛණ්ඩ ව්‍යායාමයක් ලෙස සිදු කෙරේ.” යැයි පසුගිය ජුනි මාසයේ පැවති ජිනීවාහි එක්සත් ජාතීන්ගේ මානව හිමිකම් කවුන්සිලයේ 50 වැනි නිත්‍ය සැසිවාරය අමතමින් ශ්‍රී ලංකාවේ හිටපු විදේශ කටයුතු අමාත්‍ය මහාචාර්ය ජී.ඇල් පීරිස් ප්‍රකාශ කර තිබුනි.

එක්සත් රාජධානිය පදනම් කරගත් ප්‍රබල සංවිධාන ඇතුළු දෙමළ ඩයස්පෝරා කණ්ඩායම් ගණනාවක් තහනම් කිරීමට 2021 වසරේ මාර්තු මාසයේදී ගෝඨාභය රාජපක්ෂගේ නායකත්වයෙන් යුත් රජය කටයුතු කළේය.