අතුරුදහන් කළවුන්ගේ නෑසියන්ට අතුරුදහන් කාර්යාලයෙන් ‘තර්ජන’

බලහත්කාරයෙන් අතුරුදහන් කළ සිය සමීපතමයන් වෙනුවෙන් යුක්තිය පතා, නොනිමි අරගලයක යෙදී සිටින මව්වරුන්ට තර්ජනය කරන බවට අතුරුදහන් තැනැත්තන් පිළිබඳ කාර්යාලයට චෝදනා එල්ල වී තිබේ.

මුලතිව් දිස්ත්‍රික් ලේකම් කාර්යාලය ඉදිරිපිට අප්‍රේල් 29 වැනි සෙනසුරාදා විරෝධතාවයක් දියත් කරමින් මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපතිනිය චෝදනා කළේ සිය සමීපතමයන් වෙනුවෙන් යුක්තිය ඉටුකිරීම වෙනුවට වන්දි මුදල් ලබාගැනීමට එකඟවන ලෙස බලකරමින් අතුරුදහන් තැනැත්තන් පිළිබඳ කාර්යාලය (OMP) දෙමළ මව්වරුන්ට තර්ජනය කරන බවයි.

” තර්ජනය කරන විදිහට තමයි OMP අපිට එන්න කියන්නේ. දුරකථනයෙන් හා ලියුම් මාර්ගයෙන් තමයි අපිට එයාලා එන්න කියන්නේ. තුන් පාරක් අපි ඔයාලව දැනුවත් කරලා තියනවා. හතරවෙනිපාර ඔයාලා එන්නේ නැත්තං අපි නීතිමය ක්‍රියාමාර්ග ගන්නවා කියලා කියනවා. එයාලා කවුද අපිට නීතිමය ක්‍රියාමාර්ග ගන්න. අපි තමයි එයාලට නීතිමය ක්‍රියාමාර්ග ගන්න යන්නේ.”

අතුරුදහන් කර සිටින සිය සමීපතමයන් වෙනුවෙන් වන්දි මුදල් ගෙවීම හා මරණ සහතික ලබා දීම සම්බන්ධයෙන් සාකච්ඡා කිරීම සදහා අප්‍රේල් 29 දින පැමිණෙන ලෙස අතුරුදහන් තැනැත්තන් පිළිබඳ කාර්යාලය කර තිබු දැනුම්දීමට අනුව එවැනි සාකච්ඡාවකට සහභාගී වීම දැඩිව ප්‍රතික්ෂෙප කළ මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී මාතාව එහිදී වැඩි දුරටත් සදහන් කළේ වින්දිත මව්වරුන් ඉල්ලා සිටින්නේ රුපියල් සත නොව තම සමීපතමයන් වෙනුවෙන් යුක්තිය බවයි.

‘දිවි නසා ගන්නවා’

“OMP එක මේ දිස්ත්‍රික්කවලට ඇවිල්ලා ප්‍රශ්න කරනවා කිව්වොත් අපි එයාලා ඉදිරියේ දිවි නසාගන්නවා. අපි මිය ගියාට පසසේ එයාලට OMP කාර්යාලයේ වැඩ කරගන්න පුළුවන්නේ. අපි එයාලා දෙන්න හදන ලක්ෂයක සල්ලි හෝ කඩදාසි කෑල්ලක් නෙමෙයි අපි හොයන්නේ.”

බලහත්කාරයෙන් අතුරුදහන් කරන ලද තම සමීපතමයන් වෙනුවෙන් යුක්තිය ඉටුවන තෙක් සිය සටන අත් නොහරින බව ඇය යළි යළිත් සදහන් කළාය.

“ඕනෑ, ඕනෑ යුක්තිය ඕනෑ, එපා එපා OMP එපා, කොහේද කොහේද පවුල් පිටින් බාර දීපු නෑයන් කොහේද, OMP ත් එපා වන්දිත් එපා – OMPත් එපා මරණ සහතිකත් එපා” ආදී සටන් පාඨ කියමින් විරෝධතා දියත් කළ දෙමළ මව්වරුන් වැඩි දුරටත් කියා සිටියේ රට තුල තමන්ට යුක්තියක් ඉටු වෙතැයි කිසිදු බලාපොරොත්තුවක් නොමැති බැවින් ජාත්‍යන්තර ප්‍රජාව මැදිහත් වී තමන්ට යුක්තිය ඉටු කළ යුතු බවයි.

අතුරුදහන් කරනු ලැබුවන් සොයාගැනීමට අඛණ්ඩ අරගලයක යෙදී සිටින ඥාතීන්ට එකම සමීපතමයකු හෝ සොයා දීමට සමත් වී නැති අතුරුදහන් වූ තැනැත්තන් පිළිබඳ කාර්යාලයට (OMP) මේ වන විට හය වන වසරටත් පා තබා තිබේ.

මෛත්‍රී, රනිල් ආන්ඩුව විසින් තමන්ගේ නායකත්වයෙන් 2018 පෙබරවාරි 28 දා පිහිටුවන ලද කාර්යාලය සම්බන්ධයෙන් කෝපයෙන් යුතු ඥාතීන් සිටින බව හිටපු OMP ප්‍රධානී ජනාධිපති නීතිඥ සාලිය පිරිස් ද පිළිගෙන තිබුනි.

යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ කළ අතර එම අඛණ්ඩ අරගලය මේ වන විට දින 2250 ත් පසුකර ඇත.