ශ්‍රී ලංකාවේ පවතින බදු අය කර ගැනීමේ ක්‍රියාවලිය තවදුරටත් ශක්තිමත් කර ගැනීම සඳහා සිය පූර්ණ සහය ලබා දීමට සූදානම් බව ශ්‍රී ලංකාවේ තායිලන්න තානාපති නොපෝන් අඩ්චරියාවනිච් පවසයි.
රජයේ බදු ආදායම ඉහළ නංවා ගැනීමට බදු ගෙවීම පැහැර හරින්නන් හරි හැටි හඳුනාගැනීම සහ ඔවුන්ට මගපෙන්වීම ලබා දීම අවශ්‍ය බවත් මේ සඳහා මුදල් අමාත්‍යාංශය යටතේ පවතින දේශීය ආදායම් දෙපාර්තමේන්තුව සහ සුරා බදු දෙපාර්තමේන්තුවේ ක්‍රියාකාරීත්වය තවදුරටත් ශක්තිමත් කර ගැනීම කාලෝචිත පියවරක් බව ද තානාපතිවරයා අවධාරණය කර තිබේ.
තායිලන්න තානාපතිවරයා මේ බව සඳහන් කර ඇත්තේ සිය නිල කාලය අවසන් කර සිය රට බලා පිටත්ව යාමට පෙර මුදල් අමාත්‍ය රවී කරුණානායක 19 සදුදා පස්වරුවේ හමු වූ අවස්ථාවේ දී ය.
මෙම හමුව මුදල් අමාත්‍යාංශයේ දී සිදු කර තිබේ.
තායිලන්ත බදු ක්‍රියාවලිය සම්බන්ධයෙන් අධ්‍යනය කිරීම සඳහා දේශීය ආදායම්, සුරාබදු වැනි දෙපාර්තමේන්තුවල ඉහළ නිලධාරීන්ට තම රට තුළ අවස්ථාව උදාකර දීමට හැකි බව ද තානාපතිවරයා එහි දී පවසා ඇත.
සිය රාජකාරී කටයුතු වෙනුවෙන් ලබා දුන් සහය පිළිබඳ මුදල් අමාත්‍යවරයාට ස්තුතිය පළ කර ඇති තානාපතිවරයා පවසා ඇත්තේ සිය ධුර කාලය තුළ දෙරට අතර බැඳීම තව දුරටත් ශක්තිමත් වූ බවයි.
මුදල් අමාත්‍ය රවී කරුණානායක එහි දී කියා ඇත්තේ බෞද්ධ පසුබිමක් සහිත රටවල් දෙකක් ලෙස අතීතයේ සිට පැවැති ආගමික සබඳතාවන් ඉදිරියේ දී තවදුරටත් ශක්තිමත් වනු ඇති බවයි.
Facebook Comments
