නිවාඩු අවලංගුව නොතකා තැපැල් සේවකයෝ වර්ජනයේ

තැපැල් දෙපාර්තමේන්තුවේ සියලුම කාර්යය මණ්ඩලවල නිවාඩු අවලංගු කරනු ලැබුවද තැපැල් සේවකයින් වැඩ වර්ජනය ක්‍රීයාත්මක කර ඇත.

තැපැල් සේවාවට බඳවා ගැනීම් පටිපාටියක් සැකසීම, තැපැල් දෙපාර්තමේන්තුවේ පවතින පුරප්පාඩු පිරවීම ඇතුළු වෘත්තීය ඉල්ලීම් කිහිපයක් මුල්කරගනිමින් තැපැල් දෙපාර්තමේන්තුවේ සේවකයන් වැඩ වර්ජනයක් ආරම්භ කළේය.

ඒකාබද්ධ තැපැල් වෘත්තීය සමිති පෙරමුණ ගත් තීරණයක් අනුව 19 සදුදා රාත්‍රී 12.00 සිට 21 දින මධ්‍යම රාත්‍රි 12.00 දක්වා පැය 48ක සංකේත වර්ජනයක් ක්‍රියාත්මක කිරීමට තැපැල් සේවකයන් කටයුතු කරමින් පවති.

දින 14ක් තුළ තම වෘත්තීය ප්‍රශ්නවලට විසඳුම් ලබා නොදෙන්නේ නම් අඛණ්ඩ වැඩ වර්ජනයක් ආරම්භ කරන බවද ඒකාබද්ධ තැපැල් වෘත්තීය සමිති පෙරමුණේ සම කැඳවුම්කරු එස්.එච්.කාරියවසම් පවසයි.

තැපැල්පති විසින් තැපැල් දෙපාර්තමේන්තුවේ සියලුම කාර්යය මණ්ඩලවල නිවාඩු අවලංගු කිරීමට පියවර ගත්තද එය වෘත්තීය සමිති ක්‍රියාමාර්ගයට ගැටලුවක් නොවන බවයි ඔහු පෙන්වා දෙන්නේ.

ශ්‍රී ලංකා තැපැල් සේවයේ උසස්වීම්, වැටුප් විසමතා, සේවක දීමනා ඇතුළු වෘත්තීය ප්‍රශ්න සම්බන්ධයෙන් කලක් තිස්සේ බලධාරීන්ට කරුණු දැක්වුවද ඊට යහපත් ප්‍රතිචාරයක් නොදැක්වීම නිසා මෙම සංකේත වර්ජනය ක්‍රියාත්මක බවයි ඒකාබද්ධ තැපැල් වෘත්තීය සමිති පෙරමුණ පවසන්නේ.