දෙමළ ජනයාට එරෙහිව දිගින් දිගටම සිදුකෙරන අසාධාරණ ක්‍රියා හමුවේ නැවත ආයුධ දැරීමේ පසුබිමක් නිර්මාණය වෙමින් පවතින බවට දෙමළ දේශපාලන පක්‍ෂ නායකයෙකු පවසා තිබේ.
“බෞද්ධ භික්ෂුන්, යුද හමුදාව, නාවික හමුදාව, ගුවන් හමුදාව එකතුවෙලා තවමත් දෙමළ මිනිස්සුන්ට අයිති ඉඩම්, වගා බිම් බලහත්කාරයෙන් අත්පත් කරගන්නවා. ඒවාට කිසිම විසදුමක් නැහැ. සන්නද්ධ අරගලය දකුණේ ජනතාවට එපා වුණාට ඇයි අපි ඒක අත්හැරියේ කියලා කම්පා වෙනවා,” යැයි තමිල් ඊළාම් විමුක්ති සංවිධානයේ නායක, පාර්ලිමේන්තු මන්ත්‍රී සෙල්වම් අඩෛක්කලනාදන් පවසයි.
නැගෙනහිර පළාතේ ජනාධිපති නියෝජිත, ආණ්ඩුකාර සෙන්දිල් තොණ්ඩමාන් ඉදිරියේ ටෙලෝ නායකයා මේ බව කියා සිටියේ `ජනාගේ සාජ්ජය` නම් ග්‍රන්ථය දොරට වැඩීමේ මඩකලපුවේ පැවති උත්සවයකට එක් වෙමින්.
තමිල් ඊළාම් විමුක්ති සංවිධානයේ ලේකම්, පාර්ලිමේන්තු මන්ත්‍රී ගෝවින්දන් කරුණාකරන්ගේ හැට වැනි ජන්ම දිනය නිමිත්තෙන් `ජනාගේ සාජ්ජය` නම් කෘතිය නිකුත් කෙරිණි.
මඩකළපුව දේවනායගම් ශ්‍රවනාගාරයේ ඉකුත් දා පැවති මෙම උත්සයේදී අඩෛක්කලනාදන් මන්ත්‍රීවරයා කියා සිටියේ භික්ෂුන්ට හා හමුදාවට අමතරව වනජීවි හා වනසංරක්ෂණ දෙපාර්තමේන්තු ද හිතුමතේ දෙමළ ජනයාගේ වගා බිම් ඇතුළු ඉඩම් බලහත්කාරයෙන් අත්පත් කර ගනිමින් සිටින බවයි.
“මේ තත්වය ඉක්මනින් වෙනස් කරන්න ඕනේ. එහෙම නොවුනොත් සන්නද්ධ සටනක් නැවත ඇතිවෙන්න පුළුවන්,” යැයි ද ටෙලෝ නායකයා පවසයි.
නැගෙනහිර ආණ්ඩුකාරයාට අමතරව තමිල් ඊළාම් ජනතා විමුක්ති සංවිධානයේ නායක, පාර්ලිමේන්තු මන්ත්‍රී ධර්මලිංගම් සිද්ධාර්ථන්, ඊළාම් ජනතා විප්ලවකාරී පෙරමුණේ නායක, සුරේෂ් ප්‍රේමචන්ද්‍රන්, දෙමළ ජනතා පක්ෂයේ ලේකම් එම් කේ. සිවාජිලිංගම් ඇතුළු ප්‍රදේශයේ හිටපු මන්ත්‍රීවරුන් රැසක් එක්ව සිටී බව එහි ගිය නැගෙනහිර මාධ්‍යවේදියෝ වාර්තා කරති.
Facebook Comments
