යහපාලනයේදීත් “ජෝසප් කෑම්ප්” හී වධ දීම් සහ ලිංගික අපරාධ

0
1136
Ivory Agency Sri Lanka
wedding people

දැනට බ්‍රසීලයේ තානාපති ධුරය දරන හිටපු ශ්‍රී ලංකා යුද හමුදාපති යටතේ සිවිල් යුද්ධය අවසානයේ අතිශයින් කෘරතර වධ බන්ධන පැමිණ වු වධකාගාරයක් වන වවුනියාවේ පිහිටි වන්නි ආරක්ෂක සේනා මූලස්ථානය හෙවත් “ජෝසප් කෑම්ප්” සම්බන්ධයෙන් පරීක්ෂණ පැවැත්වීම සඳහා එක්සත් ජාතීන්ගේ සංවිධානය කැඳවන ලෙස ජාත්‍යන්තර මානව හිමිකම් සංවිධානයක් ශ්‍රී ලංකා රජයෙන් ඉල්ලා සිටී.

“විලංගු, දම්වැල් සහ වධයට ගොදුරු වන්නන් දෙකකුලින් එල්ලා තබන පිණිස යොදා ගන්නා කප්පි වලින් යුත් ඒ සඳහාම ඉදි කරන ලද භූගත වධ කුටි සහිත තම කඳවුරේ වධහිංසාව එදිනෙදා කටයුත්තක් නොවූ බව ජෙනරාල් ජගත් ජයසූරියට කිසිසේත් කිව හැකි නොවේ,” යැයි සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) විධායක අධ්‍යක්ෂිකා යැස්මින් සූකා පවසනවා.

මෙම වධකාගාරයේ සිට දිවි ගලවාගත්තවුන් 46 දෙනකුගේ දිවුරුම් ප්‍රකාශ සහ ප්‍රශ්න කරන කාමර වල රූප සටහන්ද ඇතුලත් වාර්තාවක් ජිනීවා නුවර එක්සත් ජාතීන්ගේ ගොඩනැගිලි සංකීර්ණයේදී 16 බ්‍රහස්පතින්දා එලි දක්වන ලද අතර එම වාර්තාව සම්බන්ධයෙන් නිවේදනයක් නිකුත් කරමින් ITJP විධායක අධ්‍යක්ෂිකා යැස්මින් සූකා මේ බව කියා සිටී.

වධ හිංසා සහ ලිංගික අපරාධ

එල්ටීටීඊ සැකකරුවන් සහ සැකකාරියන්ගෙන් ප්‍රශ්න කිරීමේදී හමුදා බුද්ධි අංශයත්, පොලිස් ත්‍රස්ත විමර්ශන ඒකකය හා රහස් පොලිසියත් සිදු කළ බවට චෝදනා කෙරෙන වධහිංසා පිලිබඳ සහ ස්ත්‍රීන් මෙන්ම පුරුෂයන්ද දුෂණය කිරීම ඇතුළු ලිංගික අපරාධ පිළිබඳව මහත් කම්පා කරවන සුළු විස්තර එහි වන බවටයි ඇය පවසන්නේ.

පසුගිය රාජපක්ෂ පාලන සමයේ පමණක් නොව 2016 දෙසැම්බර් තරම් මෑත කාලයකදී මෛත්‍රී-රනිල් ආණ්ඩු කාලය තුලදීත් සිදු කරන ලද බවට චෝදනා කෙරෙන ලිංගික අපරාධ ඇතුළු වධහිංසා පිලිබඳ විස්තර සිංහල, දෙමළ සහ ඉංග්‍රීසි තෙබසින්ම ප්‍රකාශයට පත් කරන ලද වාර්තාවේ ඇතුලත් වේ.

ජෝසප් කඳවුරේ වද දීම් සහ ලිංගික දුෂණ කළ බවට චෝදනා ලබන අපරාධකරුවන් ගණනාවකගේ නම් සහ ඡායාරූප තමන් සතුව ඇති බව පවසන ITJP සංවිධානය ඒ අතරින් කිහිපදෙනකුම ඔවුන්ගෙන් පීඩාවට පත්වූවන් විසින් ස්ථිර වශයෙන්ම හඳුනාගෙන ඇති බවයි එම සංවිධානය අවධාරණය කරන්නේ.

කමල් ගුණරත්න

මෙම වධකාගාරයේ 2009 සිට 2011 අණ දෙන නිලධාරියා වූ මේජර් ජෙනරාල් කමල් ගුණරත්නද, විශ්‍රාම ලැබීමෙන් පසු බ්‍රසීලයේ නියෝජ්‍ය තානාපති ධුරයකට පත් කර යවන ලද බව ITJP පෙන්වා දෙන අතර කොටිහඬ රූපවාහිනියේ නිවේදිකා ඉසෙයිප්‍රියා අත් අඩංගුවේදී ඝාතනය කිරීම ඇතුළු මානව හිමිකම් උල්ලංඝන සහ යුද අපරාධ සම්බන්ධයෙන් චෝදනා ලබන බවට එක්සත් ජාතීන් විසින් නම් කොට ඇති 53 වැනි බලකායේ ආඥාපති ලෙස කටයුතු කළේ මේජර් ජනරාල් ගුණරත්න බව එම වාර්තාව සිහිපත් කර දෙයි.

වධහිංසාව පිළිබඳ එක්සත් ජාතීන්ගේ විශේෂ නියෝජිතයා සහ වධහිංසාවට එරෙහි එක්සත් ජාතීන්ගේ කමිටුව විසින් ජෝසප් කඳවුර සම්බන්ධයෙන් පරිපූර්ණ පරීක්ෂණයක් පවත්වන ලෙස මෙන්ම ජෙනරාල් ජගත් ජයසූරිය බ්‍රසීලයේ ඔහුගේ ධුරයෙන් වහාම පහකර විමර්ශනයක් පැවැත්වීම පිණිස ආපසු කැඳවන ලෙසත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය ශ්‍රී ලංකා රජයෙන් ඉල්ලා සිටී.

සම්පුර්ණ වාර්තාවට

Facebook Comments