ජීවිත ආරක්ෂාව පතා ධුරයෙන් ඉල්ලා අස්වී රටින් පලා යෑමට සිදුවු මුලතිව් මහේස්ත්‍රාත්වරයාට යුක්තිය ඉටු කරන ලෙස බලකරමින් උතුරු හා නැගෙනහිර දෙපළාතේ නීතිඥයන්ගේ ද සහභාගීත්වයෙන් ශ්‍රේෂ්ඨාධිකරණය ඉදිරිපිට දී විරෝධයක් දියත් කර තිබේ.
ඔක්තෝබර් 09 වැනි සදුදා පෙරවරුවේ ශ්‍රේෂ්ඨාධිකරණය ඉදිරිපිටට රැස්වු පිට පළාත් වලින් පැමිණි සිය ගණනක් නීතිඥයන් කොළඹ නීතිඥයන් සමග විදී බැස විරෝධතාවය දියත් කළ බවයි අගනගරයේ වාර්තාකරුවන් පවසන්නේ.
මුලතිව් විනිසුරුට සාධාරණය ඉටුකරනු – අධිකරණ විනිසුරුවන්ට බලපෑම් කිරීම නවතනු, අධිකරණ විනිසුරු ටී. සරවනරාජාට යුක්තිය උදෙසා, අධිකරණයට අත නොතබනු, යනාදී ලෙස සටහනු වු බැනර හා භාෂණයට ප්‍රකාශනයට වැට බදින මර්ධන නීති එපා, වීරසේකරගේ තර්ජන ගැන සාධාරණ පරීක්ෂණයක් කරනු, උසාවිය නිහඩ නොකරනු, අධිකරණය බිය ගන්වා ප්‍රජාතන්ත්‍රවාදය නොමරනු, විනිසුරු සරවනරාජාට අත නොතබනු, අධිකරණ නිදහසේ මළගම, අධිකරණ විනිසුරුවන්ට බලපෑම් කිරීම නවතනු ආදී සටන් පාඨ පෙරටු කරගනිමින් විරෝධතාවය දියත් කළ නීතිඥයන් අධිකරණය ඉදිරිපිට මාර්ගයේ පෙළපාලියකින් ද ගමන් කරමින් විරෝධතා දැක්වු බව ඔවුහු වැඩි දුරටත් පවසති.
ත්‍රස්ත විරෝධි පනත හා ඔන්ලයින් විරෝධි පනත හකුලාගන්නා ලෙස බලකෙරෙන විරෝධතා පුවරුද ඔවුන් අත විය.
හින්දුන් මෙන්ම බෞද්ධයන් ද අයිතිය කියා පාන කුරුන්තුර්මලේ පුරා විද්‍යා භුමියේ අධිකරණ නියෝග නොකතා කුරුන්දි විහාරය ඉදිකිරීම සම්බන්ධයෙන් වන නඩුව විභාග කළ මුලතිව් දිසා සහ මහේස්ත්‍රාත් විනිසුරු ටී. සරවණරාජා අධිකරණ සේවා කොමිෂන් සභාවේ ලේකම් වෙත සිය ඉල්ලා අස්වීමේ ලිපිය යොමු කරමින් පසුගියදා දැනුම් දී තිබුනේ තමන්ට එල්ල වී ඇති ජීවිත තර්ජනය හේතුවෙන් අධිකරණ විනිසුරු තනතුරින් ඉල්ලා අස්වන බවයි.
විරෝධතාවයට එක්ව සිටි දෙමළ ජාතික සන්ධානයේ පාර්ලිමේන්තු මන්ත්‍රී, නීතිඥ එම්.ඒ සුමන්තිරන් සදහන් කළේ ජීවිත තර්ජනය හේතුවෙන් විනිසුරුවරයකු ඉල්ලා අස් වු පළමු අවස්ථාව මෙය බවයි.
“අපේ රටේ ඉතිහාසයේ පළවෙනි අවස්ථාව මෙහෙම විනිසුරු කෙනෙක් මට වැඩ කරන්න බෑ. මට බලපෑම් කරනවා මගේ ජීවිතයට තර්ජන තියනවා කියලා එයාගේ ඉල්ලා අස්විමේ ලිපියේදීම කියලා රට දාලාගිය අවස්ථාව. ”
විනිසුරුවරයාට යුක්තිය ඉටු කරන ලෙස බලධාරීන්ගෙන් ඉල්ලා සිටි මන්ත්‍රීවරයා වැඩි දුරටත් සදහන් කළේ මෙවැනි තර්ජන හේතුවෙන් රටේ නීතියේ ආධිපත්‍ය සම්පුර්ණයෙන්ම අහිමිව යනු ඇති බවයි.
“මේකට අපි ඉඩ දෙනවානම් මින් පසුව මේ රටේ නීතියේ ආධිපත්‍ය කියන වචනෙවත් කතා කරන්න බැරි තත්වයට එනවා. ඒ නිසා තමයි අපි උතුරෙන්, නැගෙනහිරෙන් වෙන් වෙන් තැන් වල ඉදලා නීතිඥ සමාජය අද කොළඹට ඇවිල්ලා ශ්‍රේෂ්ඨාධිකරණය ඉදිරියේ අපි මේ උද්ඝෝෂණය පැවැත්වුවේ.”
නියෝග ආපසු හැරවීම
කුරුන්තුර්මලේ පුරාවිද්‍යා භුමියේ ඉදිකර ඇති කුරුන්දි විහාරයේ වැඩ අත්හිටුවමින් දී ඇති නියෝග ආපසු හරවන ලෙස නීතිපති දෙපාර්තමේන්තුව විනිසුරු වරයාට බලපෑම් කළ බව දෙමළ ජනමාධ්‍ය වාර්තා කර තිබේ.
කොළඹින් පලකෙරෙන ජනමාධ්‍ය පවසන්නේ විනිසුරුවරයා වගඋත්තරකරුවකු ලෙස නම් කරමින් ඔහු දුන් තීන්දු අවලංගු කරන නියෝග ඉල්ලා ගොනු කොට ඇති පෙත්සම් තුනක් සම්බන්ධයෙන් ඔහු වෙනුවෙන් පෙනී සිටීමට කරන ලද ඉල්ලීමක් අනුව නීතිපති කාර්යාලයේ සාකච්ඡාවක් පැවති නුමුත් බලපෑමක් නොකෙරුණු බවයි.
මුලතිව් විනිසුරුවරයා විදේශගතව සිටින බව නීතිපති දෙපාර්තමේන්තුව උපුටා දක්වන අගනුවර ජනමාධ්‍ය පවසයි.
මහේස්ත්‍රාත් ටී. සරවනරාජාගේ ඉල්ලා අස්වීම සම්බන්ධයෙන් පූර්ණ පරීක්ෂණයක් සිදු කරන ලෙස ජනාධිපති රනිල් වික්‍රමසිංහ විසින් ජනාධිපති ලේකම් සමන් ඒකනායක වෙත උපදෙස් ලබා දී ඇති බව ජනමාධ්‍ය වාර්තා කර තිබේ.
පූර්ණ විමර්ශනයක් කරන ලෙස අපරාධ පරීක්ෂණ දෙපාර්තමේන්තුවට (CID) නියෝග කර ඇතැයි මහජන ආරක්ෂක අමාත්‍ය ටිරාන් අලස් පවසයි.
Facebook Comments
