මානව අයිතිවාසිකම් කඩ කිරීම් ගැන පොලීසියට හා නාවික හමුදාවට එරෙහිව එල්ලවන චෝදනා පිළිබඳව පරීක්ෂණ ආරම්භ කළ බව මානව හිමිකම් කොමිසම පවසයි.
යාපනයේ දෙමළ විරු සමරුවකට බාධා කිරීමක් හා මන්නාරමේ පහර දීමක් සම්බන්ධයෙන් ලැබුණු පැමිණිලි පරීක්ෂණයට පදනම් වී තිබේ.
දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාසා ගජේන්ද්‍රන් ඇතුළු පුද්ගලයන් තුන්දෙනකු බලහත්කාරයෙන් අත්අඩංගුවට ගැනීම ගැන පොලිසියට එරෙහිව පරීක්ෂණය කෙරෙන බවයි ශ්‍රී ලංකා මානව හිමිකම් කොමිසම පවසන්නේ.
දෙමළ ජන අයිතීන් වෙනුවෙන් උපවාස කර මියගිය තිලීපන් හෙවත් රාසයියා පාර්තිපන් සැමරීමට කටයුතු කළ මන්ත්‍රී ගජේන්ද්‍රන් ඇතුළු තිදෙනා නල්ලුර් පිහිටි තිලීපන් ස්මාරකය අසලදී යාපනය පොලීසිය මගින් ඉකුත් 29 වැනිදා බලහත්කාරයෙන් අත් අඩංගුවට ගැනිණි.
තිලීපන් සැමරීම වාරණය කරමින් උසාවි නියෝගයක් ඇතැයි පවසමින් පොලිසිය විසින් කලහකාරී ලෙස අනුස්මරණ කටයුතු වලට බාධා කරන ලදී .
අදාල උසාවි නියෝගය පෙන්වන ලෙස මන්ත්‍රීවරයා ඇතුළු පිරිස ඉල්ලා සිටියත්, එවැන්නක් පෙන්වීමට පොලීසිය සමත් වී නොමැත.
එම අවස්ථාව රූපගත කළ යාපනේ මාධ්‍යවේදිනියන් දෙදෙනකුටද තර්ජනය කරමින්, ඔවුන් සතු ජංගම දුරකථන පොලීසිය උදුරා ගන්නා අයුරු රැගත් දර්ශන මාධ්‍ය හා සමාජ මාධ්‍ය හරහා ප්‍රචාරය විය.
පොලීසිය මගින් අත්අඩංගුවට ගත් පාර්ලිමේන්තු මන්ත්‍රී ගජේන්ද්‍රන් හා සෙසු දෙදෙනා එදිනම සවස පොලිස් ඇප මත මුදාහරින ලදි.
පරීක්ෂණ ආරම්භ කර ඇති ශ්‍රීලංකා මානව හිමිකම් කොමිසම, මන්ත්‍රීවරයා හා සෙසු දෙදෙනා අත් අඩංගුවට ගැනීමට කාරණය, අත්අඩංගුවට ගැනීමට නියෝග තිබුනේද යන්න සහ අත් අඩංගුවට ගත් බවට රිසිට් පතක් නිකුත් කර තිබේද, අත් අඩංගුවට ගැනීමේදී ඔවුන්ගෙන් ලබා ගත් උපකරණ හෝ වෙනත් දේ මොනවාද යන්න, උසාවියට ඉදිරිපත් කළ බී වාර්තාවේ අඩංගු දේ, ඇතුළු සවිස්තර වාර්තාවක් ලබා දෙන ලෙස යාපනේ පොලිසියට දැනුම් දී ඇතැයි මානව හිමිකම් කොමිසමේ උතුරු පළාත් සම්බන්ධිකාරක ටී.කනගරාජ් නිකුත් කළ නිවේදනයක සඳහන් වේ.
වංකාලෙයිපාඩු ධීවරයන්ට පහර දීම
මන්නාරම, පේසාලේ, වංකාලෙයිපාඩු ග්‍රාමයේ ධීවර වෘත්තීය සමිතියට අයත් ධීවරයින් ඉකුත් [24] දා මුහුදු රැකියාවට ගොස් ආපසු නිවාස බලා යමින් සිටියදී , නාවික හමුදා භටයන් විසින් ඔවුන්ට පහර දීම ගැන ද, පරීක්ෂණ අරඹා ඇත.
මානව හිමිකම් සම්බන්ධිකාරක කනගරාජ් පවසන්නේ විමර්ශනයේ පළමු අදියර ලෙස පේසාලෙයි පොලිස් ස්ථානාධිපති ගෙන් සම්පුර්ණ වාර්තාවක් ඉල්ලා ඇති බවයි.
සිවිල් ඇඳුමෙන් සැරසුණු බීමත් නාවික හමුදා භටයන් දෙදෙනෙක් ධීවරයකුට පහර දීමේදී එය දුටු ප්‍රදේශයේ ග්‍රාම නිලධාරියකු වූ ඔහුගේ පුත්‍රයා, එතැනට පැමිණ ප්‍රශ්න කිරීමේදී සිවිල් ඇදුමින් සිටි නාවික භටයන් දෙදෙනා සහ ඔහු අතර බහින්බස්වීමක් සිදුවෙද්දී ප්‍රදේශයේ තවත් ධීවරයන් පිරිසක් එම ස්ථානයට එක්රොක් වී තිබේ.
පළාත් බද මාධ්‍යවේදීන් පවසා සිටියේ එම නාවික හමුදා සාමාජිකයන් දෙදෙනා තවත් නාවුක භටයන් අට දෙනෙක් එම ස්ථානයට කැදවා එහි රැස්ව සිටි ධීවරයන්ට හා ග්‍රාම නිලධාරියාට පහර දී ඇති බවයි.
ඒ ගැන පැමිණිලි කිරීමට පේසාලේ පොලිස්ථානයට ගිය පහර කෑ ධීවර පිරිසගේ පැමිණිල්ල සටහන් කරගෙන නොමැති අතර පහරකෑමෙන් තුවාල ලත් ග්‍රාම නිලධාරී හා ධීවරයන් දෙදෙනකු පේසාලේ රෝහලට ඇතුලත් කිරීමෙන් පසු වැඩි දුර ප්‍රතිකාර සදහා මන්නාරම රෝහලට ඇතුලත් කර තිබිණි.
Facebook Comments
