‘කොටි සැමරීමට’ එරෙහිව දෙමළ දේශපාලන පක්ෂයකට තහනමක්

මුල්ලිවයික්කාලේ දී මිය ගිය කොටි සාමාජිකයන් සිහිපත් කිරීමේ ක්‍රියාකාරකම් තහනම් කරමින් ශ්‍රී ලංකාවේ පාර්ලිමේන්තුව නියෝජනය කරන දෙමළ ජනතා නියෝජිතයන් දෙදෙනකු නායකත්වය දරන දේශපාලන පක්ෂයක සාමාජිකයන්ට එරෙහිව අධිකරණ නියෝගයක් නිකුත් කර තිබේ.

කල්මුනේ මහේස්ත්‍රාත් අධිකරණය විසින් එම නියෝගය නිකුත් කර ඇත්තේ දෙමළ ඊලාම් විමුක්ති කොටි සංවිධානයේ සාමාජිකයන් මිය යාම සැමරීම සදහා නැගෙනහිර පළාතේ පොලිස් වසම් කීපයක සැමරුම් උත්සව සංවිධානය කිරීමට සුදානම් වන බවට පොලීසියට තොරතුරු වාර්තා වී ඇතැයි පොලිස් මාධ්‍ය කොට්ඨාසය මාධ්‍ය නිවේදනයක් නිකුත් කළ මැයි 14 වැනිදාාය.

පෙරියනිලාවනෙයි ස්ථානාධිපති ජේ.ඒස්.කේ විරසිංහගේ ඉල්ලීම පිලිගනිමින් කල්මුනේ මහේස්ත්‍රාත්වරයා නිකුත් කළ නියෝගයේ සදහන්ව ඇත්තේ ශ්‍රී ලංකාවේ තහනම් කර ඇති LTTE සංවිධානයේ පිරිස් සිහිපත් කිරීමේ අරමුණින් සිදු කිරීමට යන උත්සව ත්‍රස්තවාදී ක්‍රියා නැවත රටේ හිස එසවීමට අවස්ථාව පවතින බැවින්, පොදු ජනතාවගේ දෛනික තත්වයට බලපෑමේ හැකියාව පවතින නිසා යුද්ධයේදී මුල්ලිවයික්කාලේ මිය ගිය LTTE සාමාජිකයන්ව සිහිපත් කරන උත්සව සිදු වීම වැලැක්වීමට තහනම් නියෝගය නිකුත් කරන බවයි.

LTTE සංවිධානයේ පිරිස් සිහිපත් කිරීමේ අරමුණින් සිදු කිරීමට යන “උත්සව,” මොනවා දැයි මෙම අධිකරණ නියෝගයේ ද පැහැදිලි කර නොමැති නමුත් අධිකරණයෙන් ලබාගත් තහනම් නියෝග යොදා ගනිමින් නැගෙනහිර පළාතේ කැඳ දන්සල් දෙකක්ම තහනම් කිරීමට පසුගියදා පොලීසිය ක්‍රියා කර තිබුනි.

මැයි 15 සිට මැයි 19 දක්වා බලපැවැත්වෙන පරිදි පාන්ඩිරිප්පු 02, පදිංචි කරුවෙකු වන තාමෝදරම් ප්‍රදීපන්, පුෂ්පරාජ් තුෂානන්දන්, කාර්තිව් 07, පදිංචි කරුවෙකු වන විනාගයම් විමලනාදන්, කාර්තිව් 08, පදිංචි කරුවෙකු වන ක්‍රිෂ්නපිල්ලෙයි ජය සිරිල් හා තිරුක්කෝවිල් පදිංචි කරුවෙකු වන තම්බිරාසා සෙල්වරානිගේ නමින් කල්මුනේ මහේස්ත්‍රාත්වරයා මැයි 14 වැනිදා නිකුත් කර ඇති නිවේදනයේ වැඩි දුරටත් අවධාරණය කර ඇත්තේ එම නියෝගය දෙමළ ජාතික ජනතා පෙරමුණේ සාමාජිකයන්ට ද වලංගු වන බවයි.

දෙමළ ජාතික ජනතා පෙරමුණේ (TNPF) නායකයා පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ය. එම පෙරමුණේ ලේකම් ධුරය හොබවන්නේ සෙල්වරාජා ගජේන්ද්‍රන් මන්ත්‍රීවරයාය.

තහනම් නියෝගයේ නම් සදහන් වන තිරුක්කෝවිල් පදිංචි කාරිනියක වන තම්බිරාසා සෙල්වරානි අම්පාර දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපති ලෙස කටයුතු කරන අතර පුෂ්පරාජ් තුෂානන්දන් දෙමළ ජාතික ජනතා පෙරමුණේ අම්පාර දිස්ත්‍රික් සංවිධායක ලෙස කටයුතු කරනු ලබයි.

සාම්පුර් පොලිස් ස්ථානය විසින් 12 වැනිදා ඉරිදා රාත්‍රියේ දී කාන්තාවන් තිදෙනෙකු ඇතුළු සිව් දෙනෙකු අත්අඩංගුවට ගැනිම සම්බන්ධයෙන් පැහැදිලි කිරීම සදහා පොලිස් මාධ්‍ය කොට්ඨාසය මැයි 14 වැනිදා නිකුත් කළ මාධ්‍ය නිවේදනයක සදහන්ව තිබුනේ විමුක්ති කොටි සංවිධානයේ සාමාජිකයන් මිය යාම සැමරීම සදහා නැගෙනහිර පළාතේ පොලිස් වසම් කීපයක සැමරුම් උත්සව සංවිධානය කිරීමට සුදානම් වන බවට පොලීසියට තොරතුරු වාර්තා වී ඇති බවයි.

“එල්.ටී.ටී.ඊ සංවිධානයේ සාමාජිකයන් මිය යාම සැමරීම සදහා නැගෙනහිර පළාතේ පොලිස් වසම් කීපයක සැමරුම් උත්සව සංවිධානය කිරීමට සුදානම් වන බවට බුද්ධි අංශ මගින් පොලීසිය වෙත දැනුම් දී තිබු අතර විශේෂයෙන්ම 2009 වෙල්ලමුල්ලි වෛක්කාල් ප්‍රදේශයේ මිය ගිය එල්.ටී.ටී.ඊ සාමාජිකයන් සැමරීම මෙම පිරිසගේ අරමුණ බවද පොලීසිය වෙත තොරතුරු වාර්තා වී තිබිණි.”

නැගෙනහිර පළාතේ වාර්තා වී සැමරුම් වැළැක්වීම සදහා පොලිස් ස්ථානාධිපතිවරුන් අධිකරණයෙන් ලබා ගත් නියෝග වලට අවනත වෙමින් අදාල පාර්ශව විසින් මෙම සැමරුම් උත්සව පැවැත්වීම සිදු නොකිරීමට කටයුතු කර ඇති බවත් පොලිස් නිවේදනයේ වැඩි දුරටත් සදහන් ව තිබේ.