‘කොටි නැවත නැගිට්ටීම’ ගැන නඩුවෙන් විජයකලා මහේෂ්වරී නිදහස්

දෙමළ ඊළාම් විමුක්ති කොටි සංවිධානයේ නැවත නැගිටීමක් අපේක්‍ෂා කිරීම ගැන හිටපු රාජ්‍ය ඇමතිනියකට ත්‍රස්ත පනත යටතේ එල්ල කළ චෝදනා පස් වසකට පසු අධිකරණය මගින් ප්‍රතික්ෂේප කොට තිබේ.

“උතුරු නැගෙනහිර ජනතාව නිදහසේ ජිවත් වීමට නම් කොටි සංවිධානය නැවතත් නැගී සිටින්න ඕනෑ.“ යැයි යහපාලන ආණ්ඩුවේ රාජ්‍ය ඇමැතිනියකව සිටී විජයකලා මහේෂ්වරී 2018 ජුනි 02 වැනිදා යාපනේ වීරසිංහම් ශාලාවේ පැවති උත්සවයක් අමතමින් පැවසීම රටේ ආරක්‍ෂාවට තර්ජනයක් මෙන්ම ජාතීන් අතර ගැටුම් ඇතිවීමට හේතු වන බවට අපරාධ පරීක්ෂණ දෙපාර්තමේන්තුව විසින් ත්‍රස්ත පනත යටතේ ඇයට එරෙහිව කොළඹ මහේස්ත්‍රාත්වරයා ඉදිරියේ නඩු පැවරිණි.

පස් වසරකට පසු ඉකුත් දින කොළඹ ප්‍රධාන මහේස්ත්‍රාත්වරයා ඉදිරියේ කැඳවා තිබු නඩු විභාගයේදී හිටපු රාජ්‍ය ඇමැතිනිය වෙනුවෙන් පෙනී සිටී ජ්‍යෙෂ්ඨ නීතිඥ කේ. වී. තවරාසා ඉදිරිපත් කළ කරුණු සලකා බැලු අධිකරණය හිටපු රාජ්‍ය ඇමැතිනිය එම චෝදනා වලින් නිදහස් කළේය.

ඇගේ කතාව තුලින් කොටි සංවිධානය යළි නැගිටීමට තුඩු දෙන කිසිදු කරුණක් ප්‍රකාශ වී නොමැති බවට නීතිඥ තවරාසා විසින් 2018 ජුනි 02 වැනිදා යාපනේ පැවති ජනාධිපති ජංගම සේවයකදී ඇය කළ ප්‍රකාශය උසාවිය හමුවේ ඉදිරිපත් කරමින් කරුණු දැක්විය.

“උතුරු නැගෙනහිර පලාත්වල කාන්තාවන්ට එරෙහිව හිංසනය දිගටම කරගෙන යනවා. කොටින්ගේ පාලන කාලයේදී මේ වගේ තත්වයක් පැවතියේ නැහැ. ඒ කාලේ මේ වගේ දේ වලට දඩුවම් දැඩි විදිහට තිබුණා. දැන් ඒ වගේ එකක් නැහැ. කාන්තාවන්ට එරෙහිව ප්‍රචන්ඩත්වය, හිංසන ක්‍රියා වැඩි වෙලා. කොටි නැවත ඇති වුනොත් නම් හොඳයි,“ යනුවෙන් විජයකලා මහේෂ්වරී පවසා තිබුණි.

නීතිඥ තවරාසා පෙන්වා දුන්නේ ඇය විසින් මෙම ප්‍රකාශය කරනු ලැබුවේ එවකට යහපාලන ආණ්ඩුවේ සිටී ඇමැතිවරුන් ද ඉදිරියේ බවයි. මේ සම්බන්ධයෙන් අත්අඩංගුවට ගත් හිටපු රාජ්‍ය ඇමැතිනිය පසුව 2018 ඔක්තෝම්බර් 08 වැනිදා රුපියල් ලක්ෂයක මුදල් ඇප මත මුදා හළ බව ද අවධාරණය කරමින් නීතිඥ තවරාසා ඉල්ලා සිටියේ මෙම නඩුවෙන් ඇය නිදහස් කරන ලෙසයි.

ඇගේ ප්‍රකාශය මගින් 1978 ආණ්ඩුක්‍රම ව්‍යවස්ථාවේ හයවැනි සංශෝධනයට අනුව ත්‍රස්තවාදය වැළක්වීමේ පනත හා අපරාධ නඩු විධාන සංග්‍රහයේ 120 වැනි වගන්තිය උල්ලංඝණය කර ඇති බැවින්, ඇය වරදක් සිදු කොට ඇති බවට අපරාධ පරීක්ෂණ දෙපාර්තමේන්තුව උසාවියට ඉදිරිපත් කළ වාර්තාවේ සඳහන් කොට තිබේ.

යුද්ධය පැවති අවධියේ එක්සත් ජාතික පක්ෂ යාපනය සංවිධායක හා පසුව 2000 වසරේ දී පාර්ලිමේන්තුවට තේරීපත්ව ඇමැතිධූරයක් හෙබවූ ටී. මහේශ්වරන් විජයකලා ගේ සැමියායි. කොටහේන හින්දු කෝවිල් පරිශ්‍රයකදී ඔහුට වෙඩි තබා ඝාතනය කිරීමෙන් පුරප්පාඩු වූ සංවිධායක ධුරය විජයකලාට පිරිනැමුණු අතර ඇය 2016 දී පාර්ලිමේන්තුවට තේරී පත් වුවාය.