උතුරු නැගෙනහිර ක්‍රියාධාරීන් සම්බන්ධයෙන් පොලිස් මර්දනය දියත් කිරීම අලුත් ආණ්ඩුව යටතේත් දිගටම පවත්වාගෙන යන ආකාරයක් දිස් වෙයි.
විසි දිනකට වැඩි කාලයක්, මුලතිව් ගුවන් හමුදා කඳවුරේ රඳවාගෙන සිටින මියන්මාරයේ භීෂණයෙන් දිවි ගලවාගෙන පලා ආ දරු දැරියන් ඇතුළු රොහින්ග්‍යාවරුන් ආපසු එරටට පිටමං නොකරන ලෙස බලකරමින් යුද පීඩිත මුලතිව් හි විරෝධතාවක් සංවිධානයක කිරීම ගැන රාජ්‍ය නොවන සංවිධාන ක්‍රියාකාරිකයකු අපරාධ පරීක්ෂණ දෙපාර්තමේන්තුවට කැඳවා තිබේ.
පොලිස් 265 පනිවිඩ පෝරමය මගින් ජනවාරි 12 වැනිදා නිකුත් කර ඇති පනිවිඩය මගින් දැනුම් දී ඇත්තේ 2025.01.09 දින මුලතිව් දිස්ත්‍රික් ලේකම් කාර්යාලය ඉදිරිපිට සිදු කරන ලද උද්ඝෝෂණය සම්බන්ධයෙන් තොරතුරු ලබා ගැනීමට අවශ්‍යව ඇති බැවින් ඒ සම්බන්ධව ප්‍රකාශයක් ලබා දීම සදහා උතුරු නැගෙනහිර සම්බන්ධිකරණ කමිටුවේ සම සංවිධායක ජේසුමනි යාර්ටන් ෆිගුරාඩෝට අපරාධ පරීක්ෂණ දෙපාර්තමේන්තුව වෙත පැමිණෙන ලෙසයි.
ඒ සදහා 2025.01.15 වැනි දින පැය 9 ට කොළඹ 01, පැරණි පොලිස් මුලස්ථාන ගොඩනැගිල්ලේ පිහිටි අපරාධ පරීක්ෂණ දෙපාර්තමේන්තුවේ තැනැත්තන් වෙළදාම් ජාවාරම් විමර්ශන අංශයේ සමුද්‍රීය අපරාධ විමර්ශන අංශයේ ස්ථානාධිපති හමුවන ලෙස එහි වැඩි දුරටත් සඳහන්ව තිබේ.
මුලතිව් ගුවන් හමුදා කඳවුරේ රඳවාගෙන සිටින එකසිය පහලොස් දෙනෙකුගෙන් සමන්විත රොහින්ග්‍යාවරුන් පිරිස ආපසු එරටට පිටමං නොකරන ලෙස බලකරමින් යුද පීඩිත මුලතිව් හිදී ජනවාරි 09 වැනිදා දියත් කළ විරෝධතාවයට කොළඹ සිට මුලතිව් ගිය ප්‍රකට මානව හිමිකම් ක්‍රියාධරයකු වන රුකී ප්‍රනාන්දු ද සහභාගී වී තිබුනි.
යුද භීතියෙන් මියන්මාරයෙන් පලා ආ රොහින්ග්‍යා වරුන් ආපසු එරටට පිටමං නොකරන ලෙස බලකරමින් සිවිල් ක්‍රියාධරයන්, දේශපාලන නායකයන්, වෘත්තීය සමිති නායකයන් ඇතුළු පිරිස කොළඹ ජනාධිපති ලේකම් කාර්යාලය ඉදිරිපිට 2025 ජනවාරි මස 10 වැනි සිකුරාදා දින විරෝධතාවයක් දියත් කර ජනාධිපති ලේකම් කාර්යාලයට ලිපියක් බාර දී තිබු අතර ඊට නායකත්වය ලබා දී තිබුනේ නව සම සමාජ පක්ෂයට අනුබද්ධ ක්‍රියාත්මක වන අතුරුදහන්වූවන් පිළිබඳ සොයා බැලීමේ කමිටුවයි.
Facebook Comments
