රොහින්ග්‍යාවරුන් මියන්මාරයට නොයවන බවට විරෝධතාකරුවන්ට පොරොන්දුවක්

යුද පීඩිත වන්නියේ ගුවන් හමුදා කඳවුරක් තුළ රඳවාගෙන සිටින රොහින්ග්‍යා යුද අනාථයන් බලහත්කාරයෙන් පිටමං නොකරන බවට ජනාධිපතිවරයාගේ සම්බන්ධීකරණ ලේකම්වරයකු සහතික වූ බව ඒ වෙනුවෙන් කොළඹදී උද්ඝෝෂණයක් මෙහෙයවා මහජන පෙත්සමක් බාර අතුරුදහන්වූවන් පිළිබඳ සොයා බැලීමේ කමිටුව පවසයි.

“එතුමා පිළි ගත්තා, ඒ අයව නැවත මියන්මාරයට යවන්නේ නෑ කියන අදහස, ආණ්ඩුව දැනට අරන් තියනවා. නමුත් අපි ඉල්ලීම් කළා නිදහස් පරිසරයකට ගෙනල්ලා ඒ ගොල්ලන්ව නවත්තන්න කියලා. එතකොට ඒ අය පිළි ගත්තා අපි සාකච්ඡා කරනවා, ඇත්තටම නිදහස් පරිසරයකට ගෙනියන්න ඕන කියන එක ඒ ගොල්ලන් පිළි ගත්තා.”

නව සම සමාජ පක්ෂයට අනුබද්ධ අතුරුදහන්වූවන් පිළිබඳ සොයා බැලීමේ කමිටුවේ කැදවුම්කරු සුන්දරම් මහේන්ද්‍රන් විරෝධතාවයෙන් පසු තවත් සිවිල් සංවිධාන ක්‍රියාධරයන් කිහිප දෙනකු සමග ජනාධිපති ලේකම් කාර්යාලයේ දී ජනාධිපති සම්බන්ධීකරණ ලේකම්වරයකු මුණ ගැසී සාකච්ඡා පවත්වා, සන්දේශය බාර දී පිටතට පැමිණිමෙන් පසු අගනගරයේ මාධ්‍යවේදීන් වෙත ඒ බව පවසා තිබේ.

යුද භීතියෙන් මියන්මාරයෙන් පලා ආ රොහින්ග්‍යා වරුන් ආපසු එරටට පිටමං නොකරන ලෙස බලකරමින් සිවිල් ක්‍රියාධරයන්, දේශපාලන නායකයන්, වෘත්තීය සමිති නායකයන් ඇතුළු පිරිස කොළඹ ජනාධිපති ලේකම් කාර්යාලය ඉදිරිපිට 2025 ජනවාරි මස 10 වැනි සිකුරාදා විරෝධතාවය දියත් කර තිබුනේ ‘ලංකාවෙන් රොහින්ග්‍යාවරුන් ක්ලීන් නොකරනු, මියන්මාර් භීෂණයෙන් පලා ආ රොහින්ග්‍යාවරුන් ආරක්ෂා කරනු, පොහොසත් රටේ යුද අනාථයන් ලගින්නේ යුද කඳවුරේද?, රොහින්ග්‍යා යුද අනාථයන් හමුදා කඳවුරක හිර කළේ කාගේ අනින්ද?, ශ්‍රී ලංකාවෙන් රොහින්ග්‍යාවරුන් පලවා නොහරිනු’ ආදිය සිංහල, දෙමළ හා ඉංශ්‍රිසි බසින් සඳහන් විරෝධතා පුවරු ප්‍රදර්ශනය කරමිනි.

විරෝධතාවය අතරතුරදී අතුරුදහන්වූවන් පිළිබඳ සොයා බැලීමේ කමිටුවේ කැදවුම්කරු සුන්දරම් මහේන්ද්‍රන් අගනගරයේ මාධ්‍යවේදීන් වෙත කියා තිබුනේ ජීවිත ආරක්ෂාව පතා පලා යමින් සිටියදී මෙරටට පැමිණි මියන්මාර් රෝහින්ග්‍යා මුස්ලිම්වරුන් ආරක්ෂා කිරීම මෙරට පුරවැසියන්ගේ වගකීමක් බවයි.

“මියන්මාර් රෝහින්ග්‍යා මුස්ලිම්වරුන්ට දිගින් දිගටම ප්‍රහාර එල්ල කරනවා. මරා දමනවා. ඒ නිසා ඒ ගොල්ලන් තමන්ට ජීවත් වීම සහ, ජීවත් වීමේ අයිතිය, ජීවත්වීමේ ආශාවෙන් ඒ රට අත හැර ඒ ගොල්ලන් මුහුදු මාර්ගයෙන් අද ලංකාවට ඇවිල්ලා ඉන්නවා. එකසිය ගාණක්. ඒකේ පොඩි දරුවන් ඉන්නවා. ඒ අය ආරක්ෂා කිරීම අපේ වගකීමක්, මේ රටේ පුරවැසියන් හැටියට.”

යුද සමයේත්, ඉන් පසුවත් උතුරේ මෙන්ම දකුනේද සිදුවු බලහත්කාරී අතුරුදහන් කිරීම් වලට එරෙහිව, ජීවිත අවදානම පවා නොතකා ඔවුන්ට යුක්තිය අත්කරදීම වෙනුවෙන් දිගින් දිගටම පෙනී සිටි මානව හිමිකම් ක්‍රියාධරයෙක් වන අතුරුදහන්වූවන් පිළිබඳ සොයා බැලීමේ කමිටුවේ කැදවුම්කරු සුන්දරම් මහේන්ද්‍රන් රෝහින්ග්‍යා මුස්ලිම්වරුන් හමුදා කදවුරක රදවා තබා ගැනීමට විරෝධය දැක්විමට හේතුද
මාධ්‍යවේදීන් හමුවේ අවධාරණය කර තිබුනි.

“නමුත් ඒ අයව අද හමුදා කඳවුරක තබාගෙන ඒ ගොල්ලන්ට රැකවල් දාගෙන ඉන්න එකට අපි විරුද්ධයි. මොකද ඒ ගොල්ලන් හමුදා භීෂණයට බයෙන් තමයි මේ රටට ආවේ. ඇවිල්ලත් නැවතත් ඒ ගොල්ලන් හමුදා කදවුරක ඉන්නවා කියන්නේ තවම ඒ දරුවන්ට මානසික පීඩනය සහ බයෙන් සැකයෙන් තමයි රැය ගත කරන්න වෙන්නේ. ඒ නිසා අපි ඉල්ලීම කරනවා මේ ගොල්ලන්ව වහාම නිදහස් පරිසරයකට, ඒ කියන්නේ හමුදා කදවුරෙන් එළියට අරගෙන වෙනත් කදවුරකට යොමු කරලා ඒකට ආරක්ෂාව දීලා ඒ ගොල්ලන්ට වෛද්‍ය පහසුකම් සහ අනෙකුත් කෑම බීම පහසුකම් ලබා දෙන්න කියලා.”

යුද අනාථයන් පිරිස රඳවා සිටින කඳවුරකට ඇතුල්වී ඔවුන්ගේ සුබසිද්ධිය සැලසීමට ශ්‍රී ලංකා මානව හිමිකම් කොමිසම විසින් දරන ලද උත්සාහය ගුවන් හමුදාව විසින් වලක්වා තිබීම සම්බන්ධයෙන්ද මානව හිමිකම් ක්‍රියාධරයා එහිදි හෙලා දැකීමට ලක් කර තිබුනි.

“ආණ්ඩුවට ඒක කරගන්න නොහැකියාවක් තියනවා නම් වහාම ඒ ගොල්ලන් එක්සත් ජාතිනීට බාර දෙන්න කියලා තමයි අපි ඉල්ලිම කරන්නේ. එක්සත් ජාතින්ගේ සංවිධානයට බාර දුන්නොත් ඒ ගොල්ලන් එක පිළිගන්නවා. නමුත් ආණ්ඩුව කදවුරට ඇතුල් වෙලා ඒ ගොල්ලන්ව බලන්න හෝ ඒ ගොල්ලන්ගේ සුවදුක් විමසන්නවත් දෙන්න ආණ්ඩුව ලැස්ති නෑ. ඒ නිසා අපි තරයේ හෙළි දකිනවා මෙවැනි ක්‍රියාදාමයක්. ”

මහසයුරේ අතරමංව සිටි රොහින්ග්‍යාවරුන් පිරිස ගලවා ගන්නා ලද්දේ යුද පීඩිත වන්නියේ ධීවරයන් විසිනි. එවන් දෙමළ ජනයාගේ මානව හිමිකම් දැඩි ලෙස කඩකරන ලද ඉතිහාසයත් සුන්දරම් මහේන්ද්‍රන් කොළඹදී සිහිපත් කර දී තිබුනි.

මියන්මාරයෙන් පලා ආ රොහින්ග්‍යාවරුන් පිරිස එරටටම බලහත්කාරයෙන් පිටමං කරන බව ඉංග්‍රීසි පුවත්පතකට කී මහජන ආරක්ෂක ඇමැති ආනන්ද විජේපාල ඔවුන් සරණාගතයන් ලෙස හඳුනා ගන්නේ නම් ජාත්‍යන්තර නීතිය අනුව කටයුතු කරන්නට සූදානම් බව මහජන විරෝධතා හමුවේ පසුගිය සතියේ පාර්ලිමේන්තුවට සහතික වී තිබුනි.

කෙසේ තවත් ලක්ෂයක පමණ අනවසර සංක්‍රමණිකයන් පිරිසක් ඉදිරි දිනවලදී මෙරටට පැමිණිමේ නියමිතව ඇති බවට ආනන්ද විජේපාල අමාත්‍යවරයා බුද්ධි අංශ වාර්තා උපුටා දක්වමින් අනතුරු ඇඟවීමක්ද සිදු කර තිබු අතර, අතුරුදහන්වූවන් පිළිබඳ සොයා බැලීමේ කමිටුවේ කැදවුම්කරු සුන්දරම් මහේන්ද්‍රන් චෝදනා කළේ රටේ ජනතාව කුපිත කිරීමේ අරමුණින් ආණ්ඩුව එවැනි ප්‍රකාශ සිදු කරන බවටයි.

“නිකං බොරුවට මිනිසුන්ව මුලා කිරීමට, මිනිසුන් කෝප ගැන්වීමට ලක්ෂ ගණන් මියන්මාර් පුරවැසියෝ ලංකාවට එනවා, එනවා, කියලා, ජනතාව කුපිත කරන්න එපා කියලා තමයි ආණ්ඩුවට අපි කියන්නේ. අපි කියන්නේ කීයක් ආවත් හරි ඒ ගොල්ලන්ව සරණාගතයන් හැටියට බාර අරගෙන ඒ ගොල්ලන්ගේ නිසි ජීවිත ආරක්ෂාව ලබා දෙන්න ඕන කියන එක තමයි ප්‍රධානම ඉලක්කය.”

විසි දිනකට වැඩි කාලයක්, මුලතිව් ගුවන් හමුදා කඳවුරේ රඳවාගෙන සිටින මියන්මාරයේ භීෂණයෙන් දිවි ගලවාගෙන පලා ආ දරු දැරියන් ඇතුළු රොහින්ග්‍යාවරුන් ආපසු එරටට පිටමං නොකරන ලෙස බලකරමින් යුද පීඩිත මුලතිව් හිද 2025 ජනවාරි 09 වැනිදා දෙමළ ජනතාව විරෝධතාවක් දියත් කර තිබුනි.

සති තුනකට ඉහතදී ශ්‍රී ලංකාවට පැමිණි අනාථයන් 115 දෙනා මේ වනවිට රඳවා සිටින්නේ මුලතිව් ගුවන් හමුදා කඳවුරේය. ඔවුන් පැමිණි යාත්‍රාව පදවාගෙන පැමිණි බවට සැක කොට රක්ෂිත බන්ධනාගාර ගතකොට සිට 2025 ජනවාරි 7 වැනි බදාදා ත්‍රිකුණාමලය මහේස්ත්‍රාත් අධිකරණය විසින් නිදහස් කරන ලද 12 දෙනකුද ඒ අතර වෙයි.

ඔවුන් අතර දරු දැරියන් හතලිහකට වැඩි සංඛ්‍යාවක් ඉන්නා බව ශ්‍රී ලංකා මානව හිමිකම් කොමිසම නිවේදනය කර ඇත. ඔවුන්ගේ අපේක්ෂාව ආරක්‍ෂිත රටක දේශපාලන රැකවරණ ලබාගැනීමයි. මුලතිව් ගුවන් හමුදා කඳවුරට ඇතුල්වී රොහින්ග්‍යාවරුන්ගේ සුබසිද්ධිය විමසා බැලීමට මානව හිමිකම් කොමිසමට බාධා කිරීම ගැන ආගමන හා විගමන පාලිකා සමාව ඉල්ලා තිබු නමුත්, කොමිසමේ නියෝජිතයන් තවමත් එහි ගිය වගක් දැනගන්නට නැත.