සංහිඳියාව යථාර්ථයක් කිරීමේ ආණ්ඩුවේ අධිෂ්ඨානයේ වෙනසක් නැහැ

උතුරේ යුද්ධය ඇතුළු විවිධ හේතූන් මත මානව හිමිකම් උල්ලංඝණය වීම් වලින් පීඩාවට පත් වූවන්ට යුක්තිය ලබා දීම හා ජාතික සංහිඳියාව ගොඩනැංවීම සඳහා ශ්‍රී ලංකා රජයේ පවතින අධිෂ්ඨානය වෙනස් නොවී පවතින බව විදේශ කටයුතු අමාත්‍ය මංගල සමරවීර අවධාරණය කරයි.

“දෙදහස් පහළොව වසරේ දී එක්සත් ජාතීන්ගේ මානව හිමිකම් කවුන්සිලය ඒකමතිකව සම්මත කළ ශ්‍රී ලංකාවේ සංහිඳියාව සහ වගවීම ප්‍රවර්ධනය කිරීම” යන යෝජනාවලියට සමඅනුග්‍රාහකත්වය දැක්වීම සම්බන්ධයෙන් රට තුළ විවිධ පාර්ශව රජයට චෝදනා කළා. ඇතැම් පාර්ශවයන් මෙය දුටුවේ ජාතිය පාවා දීමේ ක්‍රියාවක් විදියටයි. පටු දේශපාලන අදහස් දරන අන්තවාදී පාර්ශ්වයන් කුමන බාධක එල්ල කළද සාර්ථක ඉදිරි ගමනක් යාමට අපි කටයුතු කරනවා.” යනුවෙන් ඇමතිවරයා කියා සිටියේ එක්සත් ජාතීන්ගේ මානව හිමිකම් කවුන්සිලයේ 34වන සැසි වාරයේ ඉහළ පෙළේ හමුවක් අමතමිනි.

පසුගිය වසර දෙක ඇතුළත ආණ්ඩුව අත්කරගත් ඉලක්ක සඳහා දිගින් දිගටම විරුද්ධ වෙමින් ඒවා පිලිනොගමින් ඇතැම් පුද්ගලයන් කටයුතු කරන පෙන්වා දුන් අමාත්‍යවරයා ආණ්ඩුව 2016 වසරේ උතුරේ ජනයාට අක්කර 5,515.98 ක රජයේ ඉඩම් ද අක්කර 1,383.51 ක්ද ලබා දුන් අතර ජනවාරි මස ඉඩම් අක්කර 30.54 ක් ලබා දී තිබෙන අතරම සංහිඳියාව උදෙසා වන කාර්ය සාධක බලකාය සමඟ එක්ව ලංකාවේ ප්‍රථම වතාවට උතුරේ ජනතාවගේ අදහස් ලබා ගනිමින් වාර්තාවක් නිර්මාණය කර ඇති බවයි අමාත්‍යවරයා කියා සිටියේ.

සත්‍ය දැන ගැනීමේ යාන්ත්‍රනය මේ වන විටත් ක්‍රියාත්මක වන අතර සත්‍ය දැන ගැනීමේ කොමිසමට අදාළ නීති කෙටුම්පත ඉදිරි මාස 2ක ඇතුළත කැබිනට් අමාත්‍ය මණ්ඩලය වෙත ඉදිරිපත් කරන බවද ඇමතිවරයා සැසිය අමතමින් සඳහන් කළේය.

සත්‍ය සෙවීම, හානි පූරණය, යුක්තිය සහ වෙනත් සංහිඳියා ක්‍රියාදාම සඳහා අවශ්‍ය යාන්ත්‍රණ සැලසුම් කිරීමේ අරමුණින් සංහිඳියාව උදෙසා වන ප්‍රවිචාරණ කාර්ය සාධක බලකාය ජනතාවගේ අදහස් විමසමින් සකස් කළ සංහිඳියාව වාර්තාව ආණ්ඩුව විසින් අධ්‍යයනය කරමින් පවතින බවයි අමාත්‍ය මංගල සමරවීර මෙහිදී වැඩිදුරටත් කියා සිටියේ.

රට බේද භින්න වීමේ අවදානමක්

ආචාර්ය මනෝරි මුත්තෙට්ටුවේගමගේ ප්‍රධානත්වයේ යුත් සංහිඳියාව උදෙසා වන ප්‍රවිචාරණ කාර්ය සාධක බලකාය විසින් සකස් කරන ලද වාර්තාව පසුගිය ජනවාරි 3 දින රජයට බාර දුන් අතර රජය වෙනුවෙන් හිටපු ජනාධිපතිනි චන්ද්‍රිකා බණ්ඩාරනායක කුමාරතුංග එය භාරගනු ලැබීය.

රජයට බාර දුන් සංහිඳියාව උදෙසා වන ප්‍රවිචාරණ කාර්ය සාධක බලකායේ වාර්තාව සම්බන්ධයෙන් රජය ගන්නා ක්‍රියාමාර්ගය කුමක්දැයි නොදන්නා මුත් එම වාර්තාව රජයට සාධනීය පියවර ගැනීමට බලකිරීමක් සිදුවනු ඇති බවට කමිටුව විශ්වාසය පල කළේය.

සංහිඳියාව ඇති කිරීම වෙනුවෙන් යුද්ධයෙන් පීඩාවට පත් ශ්‍රී ලාංකිකයන් ලබාදුන් අදහස් හා යෝජනා රජයට භාරදෙමින් එම වාර්තාව සකස් කළ කාර්ය සාධක බලකායේ නායිකාව එම වාර්තාව රජයට ලබා දෙමින් රට බේද භින්න වීමේ අවදානමක් ගැන අනතුරු අඟවා තිබුණි.

යුද අපරාධ චෝදනා ඇතුළු බරපතල මානව හිමිකම් උල්ලංඝන පරීක්ෂා කෙරෙන අධිකරණ යාන්ත්‍රණයට එක් විදේශීය විනිසුරුවකු හෝ සම්බන්ධ විය යුතු බවට එම වාර්තාව නිර්දේශයක් ඉදිරිපත් කල අතර ජනාධිපතිවරයා සහ අධිකරණ අමාත්‍යවරයා ඇතුළු ආණ්ඩුවේ ඉහළම අමාත්‍යවරුන් විසින් ප්‍රසිද්ධියේම එම නිර්දේශය ප්‍රතික්ෂේප කරන ලදී.