මුල් පිටුව බොර කර ඉරිදා ඇපල් පත්තරය ලෝකයට දුන් වටිනා පණිවුඩය

ලෝක ජල දිනය මාර්තු 22 දිනට යෙදී තිබෙන අතර ‘Why Waste Water’ මෙවර ජගත් ජල දිනයේ තේමාව ලෙස නම් කර ඇත.

තරුණයන් වෙනුවෙන් නිකුත් වන ඉරිදා ඇපල් පුවත් පත ලෝක ජල දිනය වෙනුවෙන් විශේෂ වැඩ පිළිවෙලක් ලෙස පුවත්පතේ මුල් පිටුව බොර කරමින් ජලය දුෂණ නොකරන ලෙසට ආයාචනයක් කර සිටී.

පෘථිවි ගෝලයෙන් හතරෙන් තුනක් ජලයෙන් වැසී පැවතියද ඉන් මිනිස් පරිභෝජනයට සුදුසු ජලය ඇත්තේ 3% ප්‍රතිශතයක් පමණ බවයි විශේෂඥයින් පෙන්වා දෙන්නේ.

වසර 2050 වන විට සම්පුර්ණයෙන්ම පාහේ ලෝකයේ පිරිසිදු ජලය දුෂණයවීමේ අවධානමක් පවතින බවටයි පරිසර විද්‍යාඥයින් අනතුරු අඟවන්නේ.

ලෝක ජන ගහනයෙන් මිලියන 633 පානය කරන ජලය පිරිසිදු සහ සෞඛ්‍ය ආරක්ෂිත නොවන බවත් එම හේතුවෙන් හට ගන්නා රෝග වලින් මිය යන සංඛ්‍යාව 842,000 වන බවයි ලෝක සෞඛ්‍ය සංවිධානයේ දත්ත පවසන්නේ.

ජලය සම්බන්ධ ගැටලු හා ප්‍රශ්න පිළිබඳව ලෝකවාසි ජනතාව දැනුවත් කිරිමේ අරමුණින් ලෝක සෞඛ්‍ය සංවිධානය 1993 සිට සෑම වසරකම ලෝක ජල දිනය සමරනු ලබයි.

මෙවර ජල දිනයේදී පිරිසිදු ජලය දෙවෙනි වන්නේ මව් කිරට පමණක් බවත් මවුකිරි නොබොන සියලු සත්වයින්ට මිය යන තෙක්ම ජිවය ලබා දෙන්නේ ජලය බව මතක් කරමින් උතුම් ජල සම්පත් දුෂණය නොකර ලෙසට සියලු ජනතාවගෙන් ඉල්ලා සිටිමින් මෙසේ සිය පුවත්පතේ මුල් පිටුව බොර වු ස්වාභාවයකින් මුද්‍රණය කළ බවයි ඉරිදා ඇපල් පුවත් පත සඳහන් කරන්නේ.