ජනාධිපතිවරයා සමඟ සාකච්ඡාවක් ලබා දෙන බවට ඌව පළාත් ආණ්ඩුකාරවර ලේකම්වරයා දුන් පොරොන්දුව මත උමා ඔය ව්‍යාපෘතියට එරෙහිව බණ්ඩාරවෙල නගරයේ ක්‍රියාත්මක කර තිබූ හර්තාල් ව්‍යාපාරය අවසන් කිරීමට ප්‍රදේශවාසීන් තීරණය කර තිබේ.
උමා ඔය බහු විනාශකාරී ව්‍යාපෘතියට එරෙහිව විරෝධය පළ කරමින් 28 බදාදා උදෑසන සිට බණ්ඩාරවෙල නගරයේ කඩ සාප්පු වසා දමා කළු කොඩි ඔසවා ප්‍රදේශවාසීන් හර්තාල් ව්‍යාපාරයක නිරත වූහ.
හානියට පත් ජනයාට සහන සැලසීම, දිය කාන්දුව වලක්වා ගැනීම, උමගේ ඉදිරි කැනීම් කටයුතු සිදු කිරීමට පෙර පරිසර හානි අවම කිරීම සදහා පියවර ගැනීම ඇතුළු ඉල්ලීම් ගණනාවක් සදහා රජයේ අවධානය දිනා ගැනීම සදහා මෙම හර්තාල් ව්‍යාපාරය ක්‍රියාත්මක කල බවයි ප්‍රදේශයේ ජනතාව පවසන්නේ.
බණ්ඩාරවෙල – හීල්ඔය, බණ්ඩාරවෙල – බදුල්ල, බණ්ඩාරවෙල – ඇටම්පිටිය සහ බණ්ඩාරවෙල – දියතලාව යන මාර්ග ඔස්සේ විරෝධතා පාගමනකින් පැමිණි ප්‍රදේශවාසීන් බණ්ඩාරවෙල නගරයට පිවිස එහි විරෝධතාවයක නිරිත විය.
අදාළ විරෝධතාවය වළක්වාලන ලෙස ඉල්ලමින් පොලිසිය බණ්ඩාරවෙල මහේස්ත්‍රාත් අධිකරණයෙන් කළ ඉල්ලීම ද ප්‍රතික්ෂේප කර ඇති බවයි වාර්තා වන්නේ.
බණ්ඩාරවෙල, වැලිමඩ , ඇල්ල, හාලි ඇල, වැල්ලවාය ප්‍රාදේශිය ලේකම් කොට්ටාස වල පීඩාවට පත්වූ පිරිස් මෙම විරෝධතාවයට එක්ව සිටි අතර හර්තාල් ව්‍යාපාරයට සහාය දක්වමින් බණ්ඩාරවෙල සහ වැලිමඩ අවට ගම්මාන 42 කළු කොඩි ඔසවා තිබු බවයි අප වාර්තාකරවන් පවසන්නේ.
උමා ඔය ගැන හොයන්න කමිටුවක්
මේ අතර උමා ඔය සංවර්ධන ව්‍යාපෘතිය නිසා මතුවී ඇති ගැටලූ පිළිබදව සොයා බැලීම සදහා අමාත්‍ය මණ්ඩල කමිටුවක් පත් කර ඇති බව 28 බදාදා පැවති කැබිනට් මණ්ඩල තීරණ දැනුම් දීමේ මාධ්‍ය හමුවේදී අනාවරණය විය.
අමාත්‍යවරුන් වන පාඨලී චම්පික රණවක, මහින්ද අමරවීර, විජිත් විජයමුනි සොයිසා මෙම කමිටුවේ සාමාජිකයන් ලෙස පත් කර තිබේ.
ජනතාව සාධාරණයි
බදුල්ල දිස්ත්‍රික්කය නියෝජනය කරන හරීන් ප්‍රනාන්දු අමාත්‍යවරයා කොළඹ පැවති මාධ්‍ය හමුවකදී කියා සිටියේ උමා ඔය ව්‍යාපෘතිය හේතුවෙන් පීඩාවට පත්වුවන්ට සාධාරණයක් ඉටු කිරීමට රජය කටයුතු කරනු ඇති බවට තමා විශ්වාසය පල කරන බවයි.
උමා ඔය ව්‍යපෘතිය හේතුවෙන් බහුතර ජනතාව අපහසුතාවය පත්ව ඇති බව කී ඇමතිවරයා ජනතා විරෝධය සාධාරණ බව කියා සිටි අතර යම් හෙයකින් එම ගැටලු විසඳීමට රජය අපොහොසත් වුවහොත් තමන්ද රජයට විරුද්ධ වන බවට අනතුරු ඇඟවීය.
Facebook Comments
