ඛණිජ තෙල් අත්‍යවශ්‍ය සේවාවක් වෙයි : කොළොන්නාව සහ මුතුරාජවෙල තෙල් ගබඩා හමුදාව යටතට (VIDEO)

0

වර්ජනයේ නිරත සේවකයන් රැදී සිටි කොළොන්නාව සහ මුතුරාජවෙල තෙල් ගබඩා සංකීර්ණයට 26 බදාදා අළුයම යුද හමුදාව ඇතුළු වී තිබේ.

හමුදාව විසින් වර්ජනයට එක්ව සිටින සේවකයන් තෙල් ගබඩා සංකීර්ණයෙන් ඉවත් වර්ජනයට සහය නොදක්වන සේවකයින්ගේ ආරක්ෂාව මේ වන විට තහවුරු කර ඇති බව හමුදා මාධ්‍ය ප්‍රකාශක බ්‍රිගේඩියර් රොෂාන් සෙනෙවිරත්න පවසයි.

කෙසේ වෙතත්, වර්ජනයට එක්ව සිටින සේවකයින් කොළොන්නාව තෙල් ගබඩා සංකීර්ණය ඉදිරිපිට රැදී සිටින අතර ඛණිජ තෙල් වෘත්තීය සමිති එකමුතුවේ මාධ්‍ය ප්‍රකාශක බන්දුල සමන් කුමාර කියා සිටියේ කුමන බාධා පැමිණියත් සිය වර්ජනය තවදුරටත් ක්‍රියාත්මක කරන බවයි.

ත්‍රිකුණාමලය – චීන වරායේ තෙල් ටැංකි සංකීර්ණය ඛනිජ තෙල් නීතිගත සංස්ථාවට පැවරීම, හම්බන්තොට තෙල් ටැංකි සංකීර්ණය, සංස්ථාවට පැවරීම සහ සපුගස්කන්ද තෙල් පිරිපහදුව කඩිනමින් නවීකරණය කිරීම යන ඉල්ලීම් තුන මුල් කරගනිමින් ඛණිජ තෙල් සේවකයන් වර්ජනයක් ආරම්භ කළේ පෙරේදා මධ්‍යම රාත්‍රියේය.

අත්‍යවශ්‍ය සේවාවක්

මේ අතර ඛණිජ තෙල් බෙදාහැරීම අත්‍යවශ්‍ය සේවාවක් බවට පත් කරමින් ජනාධිපතිවරයා විසින් ගැසට් නිවේදනයක් 25 අඟහරුවාදා මධ්‍යම රාත්‍රියේ නිකුත් කෙරුණි.

ජනාධිපතිවරයාගේ උපදෙස් පරිදි ජනාධිපති ලේකම් ඔස්ටින් ප්‍රනාන්දු විසින් නිකුත් කෙරුණු මෙම ගැසට් නිවේදනයේ දැක්වෙන්නේ ප්‍රෙට්ට්‍රෝලියම් නිෂ්පාදන හා ද්‍රව වායු ඇතුළු සියලූම ඉන්ධන සැපයුම හා බෙදා හැරීම අත්‍යවශ්‍ය සේවාවක් බවට පත් කරන බවයි.

එමෙන්ම වරායන් තුළ නැවකින් තෙල් හෝ ඉන්ධන බැහැර කිරීම, ප්‍රවාහනය කිරීම, ගොඩබෑම, ගබඩා කිරීම, භාර දීම හෝ ඉවත් කිරීමට අදාළව සිදුකළ යුතු හෝ අත්‍යවශ්‍ය වන සියලුම සේවාවන් ඉටු කළ යුතු බවට ද එම ගැසට් නිවේදනයේ දැක්වෙයි.

ඛනිජ තෙල් බෙදා හැරීම අත්‍යවශ්‍ය සේවාවක් බවට පත් කිරීමෙන් පසුව සේවකයන් සේවයට වාර්තා නොකළහොත් ඔවුන් සේවය අතහැර ගියා සේ සලකන බව රජය නිවේදනය කරයි.

ආරක්ෂාව තහවුරුයි

එමෙන්ම මේ වන විට කොළොන්නාව සහ මුතුරාජවෙල තෙල් ගබඩා පර්යන්තවල බෙදා හැරීම යථා තත්ත්වයට පත් කර ඇති බැවින් තෙල් බෙදා හරින බවුසර්වලට එම ස්ථාන සඳහා යන ලෙස ද රජය දැනුම් දෙයි.

මේ අතර, හමුදා මාධ්‍ය ප්‍රකාශක, බ්‍රිගේඩියර් රොෂාන් සෙනෙවිරත්න සඳහන් කළේ කොළොන්නාව සහ මුතුරාජවෙල තෙල් ගබඩා පර්යන්තවල ආරක්ෂාව තහවුරු කර ඇති බැවින් උදෑසන වන විට බෙදා හැරීමේ කටයුතු ආරම්භ කළ හැකි බවයි.

වර්ජනය සමග ඉන්ධන පිරවුම්හල් වෙත පැමිණි පාරිභෝගිකයින් අතර නොසන්සුන්කාරී තත්ත්වයක් ද ඇති වූ අතර, ඇතැම් ඉන්ධන පිරවුම්හල් වසා දමා තිබුණේ ඒවායේ ඉන්ධන අවසන්වීම හේතුවෙනි.

එමෙන්ම ඊයේ දිනයේ කොළොන්නාව නිමාව, සපුගස්කන්ද සහ මුතුරාජවෙල තෙල් පර්යන්තවලින් ඉන්ධන නිකුත් කිරීමක් සිදුවූයේ නැත.

Facebook Comments

wedding people