ශ්‍රී ලංකන්-මිහින් ලංකා කොමිසම වැඩ පටන් ගනී

0

ශ්‍රී ලංකන් ගුවන් සමාගම, සීමාසහිත ශ්‍රී ලංකන් කේටරින් සමාගම හා මිහින් ලංකා පෞද්ගලික සමාගමෙහි සිදුවී තිබෙන වංචා දූෂණ පිළිබඳ සොයා බැලීමේ ජනාධිපති පරීක්ෂණ කොමිසම සිය පරීක්ෂණ කටයුතු ආරම්භ කර තිබේ.

කොමිසමේ සභාපති හිටපු ශ්‍රේෂ්ඨාධිකරණ විනිසුරු අනිල් ගුණරත්නගේ ප්‍රධානත්වයෙන් 15 බ්‍රහස්පතින්දා කොමිසම සිය පළමු රැස්වීම බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ දී පවත්වා ඇත.

ප්‍රථම රැස්වීමේදී කොමිසම ඉදිරියෙහි කටයුතු කරන ආකාරය ඇතුළුව කොමිසමට නීතිපති දෙපාර්තමේන්තුවේ සහ පොලිසියේ සහාය ලබාගැනීම පිළිබඳව සාකච්ඡා පැවති බවයි වාර්තා වන්නේ.

ඒ අනුව නීතිපතිවරයා වෙනුවෙන් නීතිඥවරුන් පත්කර ගැනීම මෙන්ම විමර්ශන කටයුතු සඳහා පොලිස් කණ්ඩායමක් පත්කර ගැනීමට අදාළව කඩිනමින් පියවර ගැනීමට කොමිසම තීරණය කර තිබේ.

වසර 2006 ජනවාරි 6 දා සිට වසර 2018 ජනවාරි 31 දා දක්වා ශ්‍රී ලංකා එයාර් ලයින් සීමාසහිත ශ්‍රී ලංකන් කේටරින් සහ මිහින් ලංකා සමාගම්වල සිදුවන වංචා දූෂණ රාජ්‍ය සම්පත් අවභාවිතය පිළිබඳව කොමිසම පරීක්ෂණ සිදුකරනු ලැබේ.

ශ්‍රී ලංකන් ගුවන් සමාගම, සීමාසහිත ශ්‍රී ලංකන් කේටරින් සමාගම හා මිහින් ලංකා පෞද්ගලික සමාගම සම්බන්ධයෙන් සිදුව ඇතැයි කියන අක්‍රමිකතා සොයා බැලීමට පංච පුද්ගල ජනාධිපති කොමිසම පෙබරවාරි 03 ජනාපති මෛත්‍රීපාල සිරිසේන විසින් පත් කරන ලදී.

විශ්‍රාමලත් ශ්‍රේෂ්ඨාධිකරණ විනිසුරු අනිල් ගුණරත්න, අභියාචනාධිකරණ විනිසුරු ගාමිණී රොහාන් අමරසේකර, විශ්‍රාමික මහාධිකරණ විනිසුරු පියසේන රණසිංහ, විශ්‍රාමලත් නියෝජ්‍ය විගණකාධිපති ඇන්තනී හැරල්ඩ් සහ ශ්‍රී ලංකා ගිණුම් හා විගණන ප්‍රමිති සමීක්ෂණ මණ්ඩලයේ අධ්‍යක්ෂ ජනරාල් පියසීලි කපුගම එම කොමිසමේ සාමාජිකයින් වේ.

Facebook Comments