රණවිරු වැන්දඹුවන්ට නිලධාරීන්ගෙන් ලිංගික පීඩා සිදුවන බවට චෝදනා

0

අතුරුදහන්වූ තම ස්වාමි පුරුෂයන් පිලිබඳ තොරතුරු විමසන්නට ආ භාර්යාවන්ට සහ යුද හමුදාවේ සේවයේ යෙදී සිටියදී මියගිය ස්වාමි පුරුෂයන් ගේ සේවා ප්‍රතිලාභ ලබාගන්නට උත්සාහ කළ වැන්දඹුවන්ට එරෙහිව රජයේ හා ආරක්ෂක අංශ නිලධාරීන් ලිංගික අපයෝජන සිදුකළ බවට චෝදනා වාර්තා වී තිබේ.

රටපුරා දෙමළ ජනතාවට එරෙහිව ආණ්ඩුව විසින් කරන වෙනස්කම් පෑම් මෙන්ම ආරක්ෂක අංශ විසින් තමන්ගේම නිලධාරින්ගේ භාර්යාවන්ට අඩන්තේට්ටම් සිදු කරන බව ඇමරිකා එක්සත් ජනපද රාජ්‍ය දෙපාර්තමේන්තුව පවසයි.

යුද්ධයෙන් පසුවත් උතුරේ යුද පීඩිත කාන්තාවන්ට මෙන්ම යුද්ධයෙන් ස්වාමි පුරුෂයන් අහිමි වූ හෝ අතුරුදහන් වූ යුද වැන්දඹුවන්ද ඇතුලු කාන්තාවන් වෙනුවෙන් එදිනෙදා රාජකාරි කටයුතු කිරීමට පවා ලිංගික අල්ලස් ඉල්ලන බවට ශ්‍රී ලංකාවේ සංහිඳියාව භාර ප්‍රධානතම ආයතනයේ මුලිකත්වය දරන චන්ද්‍රිකා කුමාරතුංග විදේශීය මාධ්‍යවේදීන්ගේ සංගමය හමුවු අවස්ථාවක දී පිළිගෙන තිබුණි.

“තවමත් ලිංගික අපචාර සිදුවෙනවා. ඉතා පහලම මට්ටම දක්වා ග්‍රාමසේවකයන් ද ඇතුළු දෙමළ නිලධාරීන් ගෙන් පවා. ලියැවිල්ලක් අත්සන් කරන්න පවා. සහතික වශයෙන්ම යුද හමුදාවේ ඉන්න අයත් කරනවා,” යනුවෙන් හිටපු ජනාධිපතිනිය පැවසුවාය.

හිටපු ජනපතිනියගේ ප්‍රකාශය යුද හමුදාව නිවේදනයක් නිකුත් කරමින් ප්‍රතික්ෂේප කළ අතර එයට ප්‍රතිප්‍රහාර එල්ල කරමින් කරුණු හරිහැටි විමසා නොබලා තමන්ට විරුද්ධව ප්‍රසිද්ධියේ ප්‍රකාශයක් නිකුත් කිරීම ගැන යුද හමුදාවේ මාධ්‍ය ප්‍රකාශකයා හිටපු සේනාධිනායිකාවගේ දෝෂ දර්ශනයට ලක් විය.

දේශපාලන සිරකරුවන්

ශ්‍රී ලංකා මානව හිමිකම් කොමිසමේ වාර්තාවන්ට අනුව පසුගිය වසරේ සැප්තැම්බර් දක්වා කාලය තුල වධ හිංසා කිරිම් සම්බන්ධව පැමිණිළි 271 ලැබී ඇති බවට එක්සත් ජනපද රාජ්‍ය දෙපාර්තමේන්තුව පසුගිය වසරේ මානව හිමිකම් වාර්තාවේ සඳහන් කර තිබේ.

ශ්‍රී ලංකාවේ මානව හිමිකම් සහ සංවර්ධනය සඳහා නීතිවේදීන් උපුටා දක්වමින් දේශපාලන සිරකරුවන් 130 දෙනෙකු තවමත් බන්ධනාගාර තුල රඳවා ඇති බව පවසන එක්සත් ජනපද රාජ්‍ය දෙපාර්තමේන්තුව තවත් 24 දෙනකු ඇප ලබා ගොස් ඇති බව කියා සිටි.

කෙසේ නමුත් රට තුල දේශපාලන සිරකරුවන් සිටින බවට රජය විසින් තවමත් නොපිළිගන්නා බව එම වාර්තාවේ වැඩි දුරටත් සඳහන් වේ.

වාර්තාව නිකුත් වී දින කිහිපයකින් පසුව බීබීසියේ සම්මුඛ සාකච්ඡාවකට එක්වෙමින් කිසිදු දේශපාලන සිරකරුවකු ශ්‍රී ලංකාවේ නැති බව ජනාධිපතිවරයා නැවත වරක් කියා තිබුනි.

Facebook Comments