වැට්‌ පනතට විරෝධය දක්‌වමින් උද්ඝෝෂණය කළ වෙළඳ ව්‍යාපාරිකයන් දඩයම් කර එම ව්‍යාපාර මුද්‍ර තැබීමේ ක්‍රියාවලියට රේගු නිලධාරීන් යොදවා ගැනීමේ මුදල් ඇමැතිවරයාගේ ක්‍රියාකලාපය දැඩි පිළිකුලෙන් යුතුව හෙළා දකින බව රේගු වෘත්තීය සමිති පවසනවා.
ශ්‍රී ලංකා නිදහස්‌ රජයේ රේගු වෘත්තීය සමිති සංවිධානය සහ රේගුව සුරැකීමේ සංවිධානයේ සම කැඳවුම්කරු ඩබ්ලිව්. එම්. ආර්. විඡේකෝන් මාධ්‍ය වෙත මේ බව පවසා තිබේ.
වැට්‌ පනතට එරෙහිව ප්‍රසිද්ධියේ පෙනී සිටි ව්‍යාපාරිකයන් සතු සාප්පු රැසක්‌ මේ වන විට මුදල් ඇමැතිවරයාගේ නියෝගය මත රේගු නිලධාරීන් විසින් මුද්‍ර තබා ඇතැයි ඔහු චෝදනා කරනවා.
රේගු අධ්‍යක්‍ෂ ජනරාල්වරයා ශ්‍රී ලංකාවේ නොමැති අවස්‌ථාවක වැඩ බලන අධ්‍යක්‍ෂ ජනරාල්වරයා ලෙස පත් කළ මුදල් අමාත්‍යාංශ නිලධාරියකු විසින් රේගු නිලධාරින් ලවා මෙසේ වෙළෙඳ ව්‍යාපාර කිහිපයක්‌ පසුගිය සතියේ මුද්‍ර තබා ඇතැයි වෘත්තිය සමිති පවසනවා.
මෙවැනි දේශපාලන පළිගැනීම් සඳහා රේගු නිලධාරීන් යොදවා ගැනීමේ මුදල් ඇමැතිවරයාගේ ක්‍රියා කලාපය දැඩිව හෙළා දකින බව ද මේ බව ජනාධිපතිවරයාට සහ අගමැතිවරයාට පැමිණිලි කරන බව ද කැඳවුම්කරු ඩබ්ලිව්. එම්. ආර්. විඡේකෝන් කියා සිටියේය.
රේගු ආඥා පනත යටතේ වරදක්‌ සිදුකර නැති අවස්‌ථාවක මෙසේ මෙම ව්‍යාපාරිකයන්ට එරෙහිව කටයුතු කරන්නේ වැට්‌ පනතට එරෙහිව ඔවුන් හඬ නැඟීම නිසා බවටයි රේගු වෘත්තිය සමිති විසින් චෝදනා කර සිටින්නේ.
කෙසේවුවද මුදල් අමාත්‍යංශය පවසන්නේ, ලංකා රේගුව විසින් පසුගියදා පරීක්‍ෂාවට ලක්‌ කළ ඇතැම් වෙළෙඳසල් කලක්‌ තිස්‌සේ බදු ගෙවීමකින් තොරව සංවිධානාත්මක ලෙස රට තුළට රෙදිපිළි රැගෙනවිත් ඇති බව මෙතෙක්‌ කළ පරීක්‍ෂණවලදී අනාවරණය වී ඇති බවයි.
Facebook Comments
