මන්නාරම සතොස ගොඩනැගිල්ල ආශ්‍රිතව සොයාගන්නා ලද සමුහ මිනිවලේ අස්ථි කොටස් කාල නිර්ණය සඳහා ලබන ජනවාරි මාසයේ දී ඇමරිකාවට රැගෙන යන බව එම මිනීවළෙහි කැණීම් කටයුතු භාර විශේෂඥයෝ පවසති.
මියාමි නුවර බීටා ඇනලිටික්ස් ආයතනය විසින් කාල නීර්ණ පරීක්ෂණය සිදු කිරීමට නියමිත බවයි කැණීම් සිදු කරන විශේෂඥණයින් පවසන්නේ.
මේ සඳහා අවශ්‍ය මුල්‍යාධාර අතුරුදහන් වූ පුද්ගලයන් පිළිබඳ කාර්යාලය (OMP) විසින් සපයන බවට විශේෂඥ අධිකරණ වෛද්‍ය සමින්ද රාජපක්ෂ පැවසු බව ශ්‍රී ලංකාවේ ප්‍රජාතන්ත්‍රවාදය උදෙසා මාධ්‍යවේදීයෝ (JDS) සංවිධානය වාර්තා කරයි.
“ඕඑම්පී එක එකඟ වෙලා තියනවා පරීක්ෂණයේ සියළු වියදම් දරන්න. ඒකට පරීක්ෂණ ගාස්තුයි, ගුවන් ටිකට් පත් සහ නැවතීමේ හෝටල් ගාස්තුයි සියල්ලම ඊට ඇතුළත්”. යැයි විශේෂඥ අධිකරණ වෛද්‍ය සමින්ද රාජපක්ෂ පවසා ඇත.
අස්ථි කොටස් තෝරා ගැනීම මෙන්ම, ඒවා පරීක්ෂණ සඳහා අදාළ ආයතනය වෙත යෑවීමේ කටයුතුත් ඉතා සුපරික්ෂාකාරීව සිදු කිරීමට සැළසුම් කොට ඇති බව වෛද්‍යවරයා JDS හා කියා තිබේ.
2015 වසරේදී කාල නිර්ණය සඳහා යොමුකරන ලද, දිවයින තුළින් මෙතෙක් සොයාගත් දෙවැනි විශාලතම සමූහ මිනීවළ සේ සැළකෙන මාතලේ සමූහ මිනීවළෙන් ගොඩගත් අස්ථි සාම්පල 1950 වකවානුවට අයත් යැයි නිගමනය කරන ලද්දේ ද මියාමි හි බීටා ඇනලිටික්ස් ආයතනය විසිනි.
සිරුරු 154කට අයත් ඇට සැකිලි සොයාගනු ලැබූ මාතලේ මිනීවළ ආශ්‍රිතව වෝහාරික පුරාවිද්‍යා කැණීම් මෙහෙයවූ මහාචාර්ය රාජ් සෝමදේව එකී නිගමනය ප්‍රතිකේෂ්ප කරමින් කියා සිටියේ අදාළ මළ සිරුරු 1986-90 වකවානුවට අයත් බවට සාක්ෂි ඇති බවට ප්‍රකාශ කර තිබු බව ද ශ්‍රී ලංකාවේ ප්‍රජාතන්ත්‍රවාදය උදෙසා මාධ්‍යවේදීයෝ (JDS) සංවිධානය වාර්තා කර ඇත.
Facebook Comments
