වසරකට ආසන්න කාලයක් ශ්‍රී ලංකා මහ බැංකු බැඳුම්කර වංචාවට සැක පිට අත්අඩංගුවට ගෙන බන්ධනාගාර ගත කර සිටි පර්පෙචුවල් ට්‍රෙෂරීස් සමාගමේ අධ්‍යක්ෂ අර්ජුන් ඇලෝසියස් සහ එහි ප්‍රධාන විධායක නිලධාරි කසුන් පලිසේන ඇප මත නිදහස් කර තිබේ.
එක් අයෙකුට රුපියල් ලක්ෂ 10 බැගින් වන මුදල් ඇපයක් සහ රුපියල් ලක්ෂ 20 බැගින් වන ශරීර ඇප 4 බැගින් නියම කොළඹ කොටුව ප්‍රධාන මහේස්ත්‍රාත් ලංකා ජයරත්න සැක කරුවන් නිදහස් කර ඇත.
සැකකරුවන්ගේ විදෙස් ගමන් තහනම් කෙරුණු අතර ඇප ලබා ගැනීමෙන් පසු සෑම ඉරු දිනකම අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසට ද අධිකරණය නියෝග කරන ලදී.
මීට පෙර අර්ජුන ඇලෝසියස් සහ කසුන් පලිසේන යන සැකකරුවන් වෙනුවෙන් ඇප ඉල්ලීම ඉදිරිපත් කළ ඔවුන්ගේ නීතිඥවරු සඳහන් කර සිටියේ සැකකරුවන් දෙදෙනාගේ දරුවන් සහ බිරින්ඳෑවරුන් රෝගී තත්ත්වයන්ට මුහුණ පා ඇති බැවින් ඒ සුවිශේෂී කරුණක් සේ සලකා ඇප මත මුදා හරින ලෙසයි.
ඒ අනුව අදාළ කරුණ සුවිශේෂී කරුණු සේම කරුණු සේ පිළිගත් මහේස්ත්‍රාත්වරිය මෙම සිද්ධියේ ප්‍රධාන සැකකරු වන අර්ජුන් මහේන්ද්‍රන් මේ දක්වා අත්අඩංගුවට ගෙන නොමැති නිසාත් පරීක්ෂණ නිමා වන කාලය පිළිබඳ අවිනිශ්චිත තත්ත්වයක් උද්ගතව ඇති නිසාත් එම කරුණ ද සුවිශේෂි කරුණක් සේ සලකා මෙම ඇප නියෝගය ප්‍රකාශයට පත්කරන බවද සදහන් කර තිබේ.
2015 වසරේ මහ බැංකු බැඳුම්කර ගණුදෙනුවේදී සිදුව ඇති වංචාව සම්බන්ධයෙන් පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් සහ එම සමාගමේ ප්‍රධාන විධායක අධ්‍යක්ෂ කසුන් පලිසේන පසුගිය වසරේ පෙබරවාරි 05 වනදා රහස් පොලිස් අත්අඩංගුවට පත් විය.
Facebook Comments
