පොලිස් ප්‍රධානියා විසින් දියත් කරමින් සිටින මත්ද්‍රව්‍ය විරෝධී ‘යුක්තිය මෙහෙයුම’ වහාම අත්හිටුවා යලි සමාලෝචනය කරන ලෙස එක්සත් ජාතීන්ගේ මානව හිමිකම් කවුන්සිලය ශ්‍රී ලංකාවේ බලධාරීන්ගෙන් ඉල්ලා තිබේ.
එක්සත් ජාතීන්ගේ විශේෂඥ මණ්ඩලයක් ජනවාරි 22 නිකුත් කළ නිවේදනයක් මගින්
ඉල්ලා ඇත්තේ එම මෙහෙයුම සමාලෝචනය කර සෞඛ්‍ය හා මානව හිමිකම් මත පදනම් වූ ප්‍රතිපත්ති කෙරෙහි අවධානය යොමු කරණ ලෙසයි.
“මත්ද්‍රව්‍ය භාවිතා කරන්නන්ටත් මානව හිමිකම් තිබේ” යැයි අවධරණය කරන එම නිවේදනය මගින් වැඩි දුරටත් පෙන්වා දී ඇත්තේ වෙනස් කොට සැලකීමට හා අපකීර්තියට පත් කරනු ලැබීමට ලක් නොවී ගෞරවාන්විත ජීවිතයක් ගත කිරීමට ඔවුනු සුදුස්සන් වන බවයි.
වැදගැම්මකට නැත්තවුන් සේ කොන්කර සිටින සමාජ-ආර්ථික කණ්ඩායම්වලට අයත් මත්ද්‍රව්‍ය වරදකරුවන් දහස් ගණනක් අත්තනෝමතික ලෙස අත්අඩංගුවට ගැනීම් සහ සන්නද්ධ හමුදා විසින් පවත්වාගෙන යනු ලබන අනිවාර්ය පුනරුත්ථාපන මධ්‍යස්ථානවල සිය ගණනක් රඳවා තබා ගැනීම් වධහිංසා පැමිණවීම් හා හිංසා කිරීම් පිළිබඳව ‘යුක්තිය’ නමින් හැඳින්වෙන ආරක්ෂක මෙහෙයුම තුලදී වාර්තා වූ සිද්ධීන් එක්සත් ජාතීන්ගේ මානව හිමිකම් කවුන්සිලය හෙළා දැක තිබේ.
ඖෂධ ගැනීම ප්‍රතික්ෂේප කිරීමේ අයිතිය ඇතුළුව මත්ද්‍රව්‍ය භාවිතා කරන්නන්ගේ ස්වාධීනත්වයට සහ දැනුවත් කැමැත්තට ගරු කරමින් හානිය අඩු කිරීමේ දෘෂ්ටි කෝණයකින් පුනරුත්ථාපනය සිදු කළ යුතු බව ඔවුන් තව දුරටත් අවධාරණය කර ඇත.
අනිවාර්ය පුනරුත්ථාපන මධ්‍යස්ථාන වහාම වසා දැමිය යුතු බවත් ඒ වෙනුවට සිය කැමැත්තෙන් ඉදිරිපත් කරන හා සාක්ෂි හා සාධාරණත්වය මත පදනම් වූ, ප්‍රජා මූලික සමාජ සේවා ආයතන ආදේශ කළ යුතු යැයිද මේ සම්බන්ධයෙන් තාක්ෂණික සහයෝගීතාව ලබා දීමට සූදානම් ව සිටින මෙම විශේෂඥයන් සදහන් කර තිබේ.
මත්ද්‍රව්‍ය වැරදි සම්බන්ධයෙන් දැනට පනවා ඇති නීති යලි සමාලෝචනය කරන ලෙසත්, ජාත්‍යන්තර මානව හිමිකම් නීතිය ට හා ප්‍රමිතීන්ට අනුකූලවෙමින් මත්ද්‍රව්‍ය පාලනය සහ ප්‍රතිකාර ක්‍රියාකාරකම් සඳහා සන්නද්ධ හමුදා සම්බන්ධ කර ගැනීම නතර කරන ලෙසත් ඔවුහු වැඩි දුරටත් ආණ්ඩුවෙන් ඉල්ලා තිබේ.
සිරකරු අයිතිවාසිකම් සුරැකීම සම්බන්ධයෙන් ක්‍රියාත්මක වන ශ්‍රී ලංකාවේ ප්‍රධාන පෙළේ සංවිධානයක ප්‍රධානියකු වන සුදේශ් නන්දිමාල් සිල්වා විසින් යුක්තිය මෙහෙයුම “අයුක්ති සහගත මෙහෙයුමක්” ලෙස ප්‍රතික්ෂේප කරමින් පසුගියදා කොළඹදී පැවැති මාධ්‍ය හමුවකදී අවධාරණය කළේ මෙම මෙහෙයුම මගින් මහජනතාව විශාල ලෙස අසරණ වී ඇති බවයි.
යුක්තිය මෙහෙයුම සම්බන්ධයෙන් එක්සත් ජාතීන්ගේ මානව හිමිකම් කවුන්සිලය මීට ඉහත දී නිකුත් කළ ලිපියට ප්‍රතිචාර දක්වමින් මහජන ආරක්ෂක අමාත්‍ය ටිරාන් අලස් ජනවාරි 18 වැනිදා සදහන් කර තිබුනේ එම ලිපිය තුට්ටු දෙකකට මායිම් නොකරන බවයි.
Facebook Comments
