දෙමළ ජාතියට අහිමි වී තිබෙන මූලික අයිතිවාසිකම් දිනා ගැනීම සඳහා වගකීම සහ යුතුකම ඉටු කරන බවට නිලවරණයකින් පත්වු පළමු ඉලංගෙයි තමිල් අරසු කච්චි නායකයා සහතික වී තිබේ.
ඉලංගෙයි තමිල් අරසු කච්චි (ITAK) පක්ෂයේ නව නායකයා ලෙස ජනවාරි 21 වැනිදා තේරී පත් වු සිවඥානම් ශ්‍රීධරන් මන්ත්‍රීවරයා ත්‍රිකුණාමලය නගර සභා ශාලාව ඉදිරිපිටදී මාධ්‍යවේදීන් අමතමින් සදහන් කළේ සිය භුමිකාව දෙමළ ජාතිකත්වය මත පදනම් වීම බවයි.
“ජනතාවගේ උරුමය වෙනුවෙන්, ජාතියේ පැවැත්ම වෙනුවෙන්, දෙමළ ජාතියේ පැවැත්ම වෙනුවෙන්, අපේ වගකීම සහ යුතුකම තවදුරටත් අපේ පක්ෂය ඉෂ්ඨ කරනවා. ඒ යුතුකම අපි හරියට ඉෂ්ඨ කරනවා. අපෙ භූමිකාව තමයි, ජාතිය මත පදනම් වීම, දෙමළ ජාතිකත්වය මත පදනම් වීම, අපේ ජාතියට අහිමි වී තිබෙන මූලික අයිතිවාසිකම් මත පදනම් වීම. මේ අයිතිවාසිකම් දිනා ගැනීම සඳහා අපි අපේ දෑත් එක වගේ ශක්තිමත් කරමු. ”
සිවඥානම් ශ්‍රීධරන් මන්ත්‍රීවරයා එහිදී තව දුරටත් කියා තිබුනේ ජාතිකත්වය වෙනුවෙන් පෙනී සිටින සියළු දෙනා එක් කර ගනිමින් අලුත් විමුක්ති සම්ප්‍රදායකට මුල පුරන බවයි.
“අපි ඔක්කොම එකතු වෙලා, අපිත් එක්ක එකතු වෙලා වැඩ කරන්න පුළුවන් ජාතිකත්වය වෙනුවෙන් පෙනී සිටින එළියේ ඉන්න හැමෝම එකතු කරලා අපේ ජනතාවගේ නිදහස වෙනුවෙන් අපි අලුත් විමුක්ති සම්ප්‍රදායකට මුල පුරනවා. ඒ වෙනුවෙන් අපි එක්සත් වෙලා තමයි වැඩ කරන්න යන්නේ.”
පාර්ලිමේන්තු මන්ත්‍රීවරුන් වන ජනාධිපති නීතිඥ එම්.ඒ.සුමන්තිරන්, එස්. ශ්‍රීධරන් සහ හිටපු පාර්ලිමේන්තු මන්ත්‍රී සිනීතම්බි යෝගේස්වරන් යන තිදෙනා පක්ෂයේ නායකත්වය වෙනුවෙන් තරග කළහ. ශ්‍රීධරන් මන්ත්‍රීවරයාට සහාය දක්වමින් හිටපු මන්ත්‍රී යෝගේස්වරන් තරගයෙන් ඉවත් විය.
නව නායකයාට සුභ පතමින් එම් ඒ සුමන්දිරන් මන්ත්‍රීවරයා මාධ්‍යවේදීන් හමුවේ සඳහන් කළේ තමන් තව දුරටත් එක්ව ගමන් කරන බවයි.
“මගේ හිතවත් ශ්‍රීධරන්ට මගේ හෘදයාංගම සුබපැතුම් පිරිනමනවා. මාවෙයි අයියා මෙච්චර කාලයක් දරාගෙන හිටපු ඉලංගෙයි තමිල් අරසු කච්චි නායකත්වයේ බර දැන් ශ්‍රීධරන්ගේ හිස මත පැටවිලා තියෙනවා. ගොඩාක් සතුටුදායක කාරණයක්. මේ ගමන තව දුරටත් අපි එකටම ගමන් කරනවා. “
ඉලංගෙයි තමිල් අරසු කච්චි නායකත්වය වෙනුවෙන් පැවැති රහස් ඡන්දයෙන් පක්ෂයේ දිස්ත්‍රික් සභාවන්හි සාමාජිකයන් 184 දෙනකුගේ කැමැත්ත සිවඥානම් ශ්‍රීධරන් මන්ත්‍රීවරයා වෙතත් දිස්ත්‍රික් සභාවන්හි සාමාජිකයන් 137 දෙනකුගේ කැමැත්ත එම් ඒ සුමන්දිරන් මන්ත්‍රීවරයා වෙතත් හිමිවි තිබුනි.
74 වසරක ඉතිහාසයක් සහිත ඉලංගෙයි තමිල් අරසු කච්චි පක්ෂ නායකත්වය සඳහා ඡන්දයක් පැවැත්වූ පළමු අවස්ථාව මෙය වන අතර අපේක්ෂකයන් දෙදෙනෙකු හෝ වැඩි ගණනක් සිටී නම් ඡන්දයක් පැවැත්විය යුතු බව පක්ෂ ව්‍යවස්ථාවේ සඳහන් වේ.
පක්ෂයේ සම-නිර්මාතෘ සහ සිය අනුගාමිකයන් අතර “තන්දෙයි චෙල්වා” ලෙසින් ගෞරවයට පාත්‍ර වූ නායකයකු වන සැමුවෙල් ජේම්ස් වේලුප්පිල්ලෙයි චෙල්වනායගම් විසින්, ජ්‍යෙෂ්ඨ නායකයන් අතර එකඟතාවයකින් නායකයකු තෝරා පක්ෂ සම්මේලනයේ දී පාක්ෂිකයන්ගේ අනුමැතිය ලබා ගැනීමේ පුරුද්ද අනුගමනය කර තිබේ.
Facebook Comments
