රට ගොඩනඟමින් ඉදිරියට ගෙන යාමට රටට අලුත් ආණ්ඩුවක් අවශ්‍ය යැයි ජනාධිපතිවරයා ප්‍රකාශ කර තිබේ.
එය පක්ෂය හා පුද්ගලයාට වඩා රටට ආදරය එකුවකින් යුතුව ශ්‍රී ලංකා නිදහස් පක්ෂ නායකත්වයෙන් යුත් ආණ්ඩුවක් විය යුතු යැයි ජනපති පවසා ඇත.
“මොන පක්ෂයේ ද මොන පුද්ගලයා ද කියන කාරණය නොවෙයි අවශ්‍ය වෙන්නේ. රටට අවංකව ආදරය කරන රට පිළිබඳව අවබෝධයක් තිබෙන රටේ දේශපාලනය පිළිබඳව හැඟීමක් තිබෙන රටේ හෙට දවස හොඳ දවසක් කරන්න හිතන ඒ සියලු දෙනාගේ එකතුවක් අවශ්‍යයි. ඒ සඳහා ශ්‍රී ලංකා නිදහස් පක්ෂය නායකත්වය දිය යුතුයි.”
ජනාධිපති මෛත්‍රීපාල සිරිසේන 08 සිකුරාදා “මතින් තොර දේශයක් – තුටින් පිරි කැදැල්ලක්” තේමාව යටතේ කොළඹ විහාර මහා දේවි එළිමහන් පීඨයේ පැවති ශ්‍රී ලංකා නිදහස් පක්ෂ කාන්තා දින සැමරුම් උත්සවය අමතමින් මෙසේ නව ආණ්ඩු ඉල්ලීම ඉදිරිපත් කළේය.
කාන්තා දිනය සැමරුමකට හෝ සුහද සාදයකට සීමා විය යුතු නැති බව කී ජනපති එය පීඩාවට සහ හිංසාවට පත් කාන්තාවන්ගේ අයිතිවාසිකම් වෙනුවෙන් ප්‍රබල හඬක් නගන දිනයක් බවට එදින පත්කරගත යුතු බව අවධාරණය කරන ලදී.
විශේෂ කුසලතා ඇති දිරිය කාන්තාවන්ට කුසලාන සහ සහතික පත් පිළිගැන්වීම මෙහිදී ජනාධිපතිවරයා අතින් සිදු වු අතර මත්ද්‍රව්‍ය නිවාරණ කාර්යාංශයේ, වැටලීම් අංශයේ කාන්තා පොලිස් පරීක්ෂක නිලුකා පෙරේරා සහ තාරකා විද්‍යාව පිළිබඳ දස්කම් දැක්වූ දිල්රුක්ෂි සඳරේඛා කුමාරසිංහ ඇතුළු කිහිප දෙනෙකු කුසලාන සහ සහතික පත් ලබා ගත්හ.
Facebook Comments
