ආර්ථිකය අර්බුදයක් නොවේ අභියෝගයක් – මංගල

ශ්‍රී ලංකාවේ ඇත්තේ ආර්ථික අර්බුදයක් නොව ආර්ථිකය හමුවේ ඇති අභියෝග පමණක් බව මුදල් අමාත්‍යවරයා අවධාරණය කර තිබේ.

පසුගිය ඔක්තෝබර් 26 සිදුවු දේශපාලන කුමන්ත්‍රණයෙන් ආර්ථික අර්බුද පැ නැගුණ බවත් ආණ්ඩුව යළි බලයට පත් වීමෙන් පසු එම අර්බුද සමනයට පියවර ගත් බව මංගල සමරවීර ඇමැතිවරයා 07 බ්‍රහස්පතින්දා මුදල් අමාත්‍යාංශයේ පැවති මාධ්‍ය හමුවක දී කියා සිටියේය.

“සැබැවින් ම අපි ඉදිරියේ ඇත්තේ ආර්ථික අර්බුදයක් නෙවෙයි. ආර්ථික අභියෝග තමයි තියෙන්නෙ. විශේෂයෙන් ම ඔක්තොබර් 26 පත්වුණ ආණ්ඩුව දින 51ක් තුළ සිදු කළ හානිය යළි සකස් කරන්න අපි කටයුතු කළා. රුපියල ස්ථාවර කර ගන්න පමණක් ඔවුන් ඩොලර් බිලියනයක් පමණ වැය කළා. ජාත්‍යන්තර මූල්‍ය අරමුදල තමන්ගෙ ගිවිසුම්වලින් ඉවත් වුණා. පස්සෙ මම වොෂිංන්ටන් නුවරට ගිහින් ජාත්‍යන්තර මූල්‍ය අරමුදල් ප්‍රධානීන් හමුවෙලා සාකච්ඡා කළාට පස්සෙ තමයි ඔවුන් ශ්‍රී ලංකාවට පැමිණියේ.”

ආර්ථික ලිහිල්කරණ ප්‍රතිපත්තිය ඉදිරියට ගෙන යන සමාජ වෙළෙඳපොළ ආර්ථිකයක් තුල සමාජ ආරක්ෂණ ක්‍රමවේද ඇතුලත් සැලසුම් සහගත වැඩපිළිවෙළක පිහිටා මෙවර අයවැය ඉදිරිපත් කළ බවද අමාත්‍යවරයා පැවසීය.

ශ්‍රී ලංකාව යනු ලොව අඩුවෙන්ම බදු අය කරමින් තොටිල්ලේ ඉඳල මරණ මංචකය දක්වා රජය විසින් සහන දෙන රටක් බව මුදල් අමාත්‍යවරයා පෙන්වා දුනි.

“ගොඩක් දෙනා මම දැකල තියෙනවා මෙන්න බදු ගහනවා කියල කෑ ගහනවා. ශ්‍රී ලංකාව කියන්නෙ අඩුම බදු ගන්න රටක්. ඒ වගේ ම තොටිල්ලේ ඉඳල මරණ මංචකය දක්වා රජයේ වියදමෙන් සහන දෙන රටක් මේ. සෞඛ්‍ය නොමිලේ, අධ්‍යාපනය නොමිලේ. රටේ ඉන්නව මිලියන 22ක ජනතාවක් බදු ගොනු තියෙන්නෙ 246000යි. මේ මට්ටම ලක්ෂ 10 දක්වා වත් වැඩි කළ යුතුයි. බදුවලින් 82%ක් තියෙන්නෙ වක්‍ර බදු. ඒ නිසා මේ බදු පදනම පුළුල් කළ යුතුයි. බදු කියන්නෙ සමාජ වගකීමක්.”

මෙම මාධ්‍ය හමුවට මුදල් රාජ්‍ය අමාත්‍ය ඉරාන් වික්‍රමරත්න, භාණ්ඩාගාර ලේකම් ආචාර්ය ආර්.එච්.එස්. සමරතුංග, රාජ්‍ය මූල්‍ය ප්‍රතිපත්ති දෙපාර්තමේන්තුවේ අධ්‍යක්ෂ ජනරාල් විමලේන්ද්‍ර රාජා සහ බදු උපදේශිකා තනුජා පෙරේරා ඇතුළු පිරිසද සහභාගී විය.