ජනාධිපතිවරණ අපේක්ෂකයා සම්බන්ධව ඉක්මනින් තීන්දුවක් ගන්නා ලෙස එක්සත් ජාතික පෙරමුණේ නායකයින් අගමැතිවරයා හට දැඩි බලපෑම් එල්ල කර තිබේ.
අගමැති රනිල් වික්‍රමසිංහගේ ප්‍රධානත්වයෙන් 27 අඟහරුවාද පැවති හමුවට සජිත් ප්‍රේමදාස, රවී කරුණානායක, මනෝ ගනේෂන්, රවුෆ් හකීම්, රිෂාඩ් බද්දුර්දින්, පාඨලී චම්පික රණවක, රාජිත සේනාරත්න ඇතුළු එක්සත් ජාතික පෙරමුණ නියෝජනය කරන සියලුම නායකයින් පැමිණ ඇත.
නව සන්ධානයේ ලේකම්වරයා සහ ජනාධිපති අපේක්ෂකයා එක්සත් ජාතික පක්ෂය විසින් නම් කළ යුතු බව සන්ධාන ව්‍යවස්ථාවට ඇතුලත් කර ඇති අතර එයට එක්සත් ජාතික පෙරමුණේ පක්ෂ නායකයින්ගේ අනුමැතිය හිමිවිය යුතු බවට ද ව්‍යවස්ථාවේ සඳහන් කර ඇති බවයි වාර්තා වන්නේ.
කෙසේ වෙතත් ජනාධිපතිවරණය සඳහා ඉදිරිපත් කරනු ලබන අපේක්ෂකයා තීන්දු කරනු ලබන්නේ එක්සත් ජාතික පක්ෂයේ කෘත්‍යාධිකාරී මණ්ඩලයෙන් බව පවසන අමාත්‍ය ලක්ෂ්මන් කිරිඇල්ල ඒ බව සන්ධාන ව්‍යවස්ථාවේද සඳහන් බවයි මාධ්‍ය වෙත කියා සිටියේ.
සන්ධානයේ වැඩපිලිවල සහ ප්‍රතිපත්ති සම්බන්ධයෙන් ඉදිරි දෙසතිය තුළ සාකච්ඡා කර සන්ධානය පිහිටුවිමේ ගිවිසුමට අත්සන් කරන බවද අමාත්‍යවරයා වැඩි දුරටත් සඳහන් කළේය.
Facebook Comments
