සන්ඩේ ලීඩර් පුරෝගාමී කතුවර ලසන්ත වික්‍රමතුංග ඝාතනය කළ බවට සටහනක් ළඟ තිබුනු හිටපු හමුදා බුද්ධි අංශ නිලධාරියකු සියදිවි නසාගෙන ඇති බව පොලිසිය පවසයි.
ලසන්ත වික්‍රමතුංග ඝාතනයේ වගකීම බාරගත් බව පැවසෙන එම ලියුම හමුවී ඇත්තේ සියදිවි හානිකරගත් බවට සැක කෙරෙන නමැති හිටපු බුද්ධි අංශ නිලධාරියකු වෙත තිබීය.
සියදිවි නසාගෙන ඇති බවට සැක කෙරෙන සාජන් මේජර් ඉලන්දාරිගේ එදිරිසිංහ ජයමාන්න විසි අට වසරක සේවයෙන් පසු 2007 දී හමුදා සේවයෙන් විශ්‍රාම ගිය අයකු බව යුද හමුදා ප්‍රකාශකයා පවසයි.
ලසන්ත වික්‍රමතුංග ඝාතනය කෙරුනේ 2009 ජනවාරි 8 දාය.
හමුදා පරීක්ෂණයක් නෑ
විශ්‍රාම ගිය හමුදා නිලධාරියාගේ මරණය සම්බන්ධයෙන් යුද හමුදාව පරීක්ෂණයක් පැවැත්වීමේ අවශ්‍යතාවක් පැන නොනගින බව හමුදා ප්‍රකාශක බ්‍රිගේඩියර් රොෂාන් සෙනෙවිරත්න කියා සිටියේ ගගන කළ විමසීමකදීය.
දුරකථන ඇමතුමක් අනුව ගිය ත්‍රිරෝද රථ රියදුරකුට මියගිය හමුදා නිලධාරියා නිවසේ මුළුතැන්ගෙය තුල ගෙල වැලලාගෙන සිටිනු දකින්නට ලැබී තිබෙන බව ජ්‍යෙෂ්ඨ පොලිස් නිලධාරියකු ගගන හා පැවසීය.
ගෙල වැලලාගෙන එල්ලී සිටි හමුදා නිලධාරියා මියගොස් ඇති බව කෑගල්ල මහ රෝහලේ දී ප්‍රකාශයට පත් කෙරිනි.
ලසන්ත ඝාතනය සම්බන්ධයෙන් දැනට රිමාන්ඩ් භාරයේ සිටින යුද හමුදා බුද්ධි අංශයේ ‘සිය මිතුරු’ මිලින්ද උදලාගම වරදකරු නොවන බව සඳහන් ලිපිය සැකකරු නිදහස් කරන ලෙස ඉල්ලා සිටී.
අණ දුන් අය ගලවා ගැනීම
“මෙය ඝාතනයට අණ දුන් පුද්ගලයන් ගලවා ගැනීමේ උපායක් විය හැකි,” යයි අපරාධ පරීක්ෂණ දෙපාර්තමේන්තුවේ නිලධාරියකු ප්‍රකාශ කළ බව බීබීසී කොළඹ වාර්තාකරු සමාජ මාධ්‍ය ජාල ඔස්සේ ප්‍රකාශයට පත් කර තිබේ.
ලිපියේ සත්‍යතාව තහවුරු කෙරෙන වෝහාරික පරීක්ෂණ රජයේ රස පරීක්ෂක දෙපාර්තමේන්තුව විසින් හමාර කොට නැත.
කෑගල්ල, කරඬුපන පදිංචිව සිටි මියගිය හමුදා නිලධාරියා තිදරු පියෙකි.
(Radio gagana)
Facebook Comments
