උසාවිය මගහරින ලංකාවේ ඉහළම නැව්පතිට තුන්වැනි වතාවටත් සිතාසි

0

අපරාධ නඩුවක් සම්බන්ධව චෝදනා ලබා දෙවතාවක්ම අධිකරණය මඟ හැර සිටින හිටපු නාවික හමුදාපතිවරයකු කැඳවීමට සිතාසි නිකුත් කර තිබේ.

කෙළඹ ඇතුළු තදාසන්න ප්‍රදේශ වලින් 11 දෙනකු පැහැරගෙන ගොස් අතුරුදහන් කිරීමේ චෝදනා යටතේ කොළඹ ත්‍රිපුද්ගල මහාධිකරණයේ ගොනු කර ඇති නඩුවට සහභාගී වීම හිටපු නාවික හමුදාපති වසන්ත කරන්නාගොඩ දෙවතාවක්ම මඟ හැර ඇත.

අදාළ නඩුව 06 සිකුරාදා කැඳවු අවස්ථාවේදී අධිකරණය මඟ හැර සිටින හිටපු නාවික හමුදාපතිවරයා හට වර්තමාන නාවික හමුදාපතිවරයා සහ වැඩබලන පොලිස්පතිවරයා මාර්ගයෙන් යළි සිතාසි නිකුත් කරන ලෙස චම්පා ජානකී රාජරත්න, අමල් රණරාජා සහ නවරත්න මාරසිංහ යන විනිසුරු මණ්ඩලය නියෝග කළේය.

මීට පෙර හිටපු නැවිපති හට සිතාසි බාර දීමට ඔහු පදිංචිව සිටින බැද්දගාන ප්‍රදේශයේ පිහිටි නිවසකට වැලිකඩ පොලීසිය ගොස් තිබුණත් ඔහු එහි නොසිටි බව දන්වා ඇතැයි නීතිපතිවරයා වෙනුවෙන් පෙනී සිටින අතිරේක සොලිසිටර් ජනරාල් සරත් ජයමාන්න අධිකරණය වෙත දැනුම් දුන්නේය.

අධිකරණය හමුවේ පෙනී සිටි වැලිකඩ පොලීසියේ ස්ථානාධිපතිවරයා ද මෙම කරුණු තහවුරු කරමින් කියා සිටියේ සිතාසි බාර දීම සඳහා දෙවතාවක්ම ගියත් එම නිවස වසා තිබු බවයි.

නිවස වසා තිබුණ ද ඔහු තවමත් එහි පදිංචිව සිටින බව විනිසුරුවරුන් මතු කළ ප්‍රශ්නයකට පිළිතුරු දුන් වැලිකඩ පොලිසිය ස්ථානාධිපතිවරයා සඳහන් කළේය.

හිටපු නාවික හමුදාපති වසන්ත කරන්නාගොඩට අයත් තවත් නිවසක් කිරුළපන ප්‍රදේශයේ තිබෙන බවත් ඊට රහස් පොලිසියේ නිලධාරීන් ගොස් සිතාසි බාර දීමට උත්සාහ කලද ඔහු එම නිවසේ නොසිටි බවද ප්‍රකාශ වී තිබේ.

ශ්‍රී ලංකා නාවික හමුදාවට සිටින එකම අද්මිරාල් ඔෆ් ද ෆ්ලීට් වන වසන්ත කරන්නාගොඩ ප්‍රසිද්ධ රාජ්‍ය උත්සවවලට පවා පෙනී සිටින බව කී අතිරේක සොලිසිටර් ජෙනරාල්වරයා එසේ තිබියදී රාජ්‍ය යාන්ත්‍රණයේ කොටසක් වන රහස් පොලිසියට ඔහු සොයා ගැනීමට නොහැකි වීම සම්බන්ධව කනස්සල්ල පළ කළේය.

එම නිසාවෙන් නාවික හමුදාපතිවරයා සහ වැඩබලන පොලිස්පති වරයා මාර්ගයෙන් යළි සිතාසි නිකුත් කරන ලෙසට අතිරේක සොලිසිටර් ජනරාල් සරත් ජයමාන්න කරන ලද ඉල්ලීම ත්‍රිපුද්ගල විනිසුරු මඩුල්ල විසින් පිළිගෙන තිබේ.

පෙබරවාරි 04 වනදා පැවැති රාජ්‍ය නිදහස් දින උත්සවය සහභාගී වී සිටි අද්මිරාල් ඔෆ් ද ෆ්ලීට් වන වසන්ත කරන්නාගොඩ නීතිපති දප්පුල ලිවේරා අසල අසුන් ගෙන සිටිනු දැක ගත හැකි විය.

මෙම නඩුවේ සෙසු විත්තිකරුවන් ලෙස නම් කර සිටින හිටපු නාවික හමුදා මාධ්‍ය ප්‍රකාශක ඩී .කේ. පී. දසනායක ඇතුළු නාවික හමුදා බුද්ධි අංශ සාමාජිකයින් 13 දෙනා අධිකරණය හමුවේ පෙනී සිට ඇත.

නඩුව නැවත පෙබරවාරි මස 24 වනදා කැඳවීමට මහාධිකරණ විනිසුරු මණ්ඩලය නියෝග කළේය.

මෙම නඩුව දේශපාලන පලිගැනීමක් බව පවසමින් නැවත දැනුම් දෙන තුරු නඩු කටයුත්ත නවතා දමන ලෙසට දේශපාලන පළිගැනීම් පිළිබඳව පරීක්‍ෂා කොට කොට තොරතුරු ලබාගැනීම සඳහා පත් කළ ජනාධිපති පරීක්‍ෂණ කොමිසම දෙන ලද නියෝගය නීතිපතිවරයා විසින් ප්‍රතික්ෂේප කරන ලදී.

කොමිසන් සභාව විසින් දුන් ලිඛිත නියෝගයට පෙරළා පිළිතුරු යවා ඇති නීතිපති දප්පුල ලිවේරා අධිකරණයේ විභාග වන නඩු කටයුත්තක් සම්බන්ධව නිර්දේශ හෝ නියෝග ලබා දීමට පරීක්ෂණ කොමිසන් සභාවකට බලයක් නොමැති බව දන්වා තිබුනි.

Facebook Comments