“වෙලේ සුදා” සිරගෙයින් පිටතට රැගෙන යාමේ තහනම තවදුරටත්

බූස්ස බන්ධනාගාරයේ සිරගත කොට සිටින හෙරොයින් ජාවාරම් කිරීම සම්බන්ධයෙන් මරණීය දණ්ඩනය නියමවූ ගම්පොල විදානලාගේ සමන්ත කුමාර හෙවත් “වෙලේ සුදා” ඉන් පිටතට රැගෙනයාම වළක්වාලමින් පනවා තිබු නියෝගය ලබන ඔක්තෝම්බර් මස 6 වනදා දක්වා දීර්ඝ කිරීමට අභියාචනාධිකරණය ජුලි ( 27 වැනිදා ) තීරණය කළේය.

විමර්ශන පවත්වන මුවාවෙන් තම පුත්‍රයා බන්ධනාගාරයෙන් පිටතට රැගෙන ගොස් මරාදැමීමේ සූදානමක් පවතින බවත්, එම නිසා ඔහුව බන්ධනාගාරයෙන් පිටතට රැගෙනයාම වළක්වාලන නියෝගයක් නිකුත්කරන ලෙස ‘’වෙලේ සුදා’ ගේ මව වන ආර්. ජී. මාලනී පෙත්සමක් ඉදිරිපත් කරමින් අභියාචනා අධිකරණයෙන් ඉල්ලා තිබුණි.

අභියාචනාධිකරණ විනිසුරු සෝභිත රාජකරුණා සහ ධම්මික ගණේපොල ඇතුළු විනිසුරු මඩුල්ලක් විසින් අදාල පෙත්සම අද කැඳවූ අවස්ථාවේ දී මෙම නියෝගය දීර්ඝ කළේය.

මේ අතර ඉකුත් කාලය තුලදී විමර්ෂණ පවත්වන බවට පවසමින් සිරමැදිරියෙන් පිටතට ගෙන ගොස් පොලිස් වෙඩි පහරින් මරා දැමුණු සැකකරුවන් රැසකි.

2019-11-12 දිනේෂ් චමින්ද ලියනාරච්චි, ගාල්ල කරාපිටිය අධිකරණ වෛද්‍ය නිලධාරි වෙත ඉදිරිපත් කිරීමට යන විට මත්ද්‍රව්‍ය නාශක අංශයේ පොලිස් නිලධාරීන්ගේ වෙඩි පහරින් මිය ගියේය. පොලිසිය පවසනුයේ පොලිස් නිලධාරියා පසෙකට තල්ලු කොට පලා යාමට තැත් කරද්දී මෙම වෙඩි තැබීම වූ බවය.

2020-09-23 දේවමුණි හැරල්ඩ් රෝහණ ද සිල්වා නොහොත් රත්මලානේ රොහා, පොලිස් වාර්තා සඳහන් කරන්නේ පොලිසිය සමග වෙඩි හුවමාරුවකින් මිය ගිය බවය. මිගමුව කොච්චිකඩේ ප්‍රදේශයේ සැඟව සිටියදී අත්අඩංගුවට ගැනීමට යාමේදී මෙම වෙඩි හුවමාරුව සිදුවූ බව පොලිසිය පවසයි.

2020-08-23 චමින්ද එදිරිසුරිය නොහොත් චමියා, පොලිස් අත්අඩංගුවේ සිටියදී ගම්පහ ඔරුතොට ප්‍රදේශයේ දී පොලිස් නිලධාරියෙක්ගේ ගිණි අවියක් උදුරා වෙඩි තැබීමට උත්සහා කිරීමේදී සෙසු පොලිස් නිලධාරින් විසින් වෙඩි තැබීමෙන් මිය ගිය බව පොලිසිය වාර්තා කරයි.

2020-08-29 ඉඳුනිල් වජිර කුමාර නොහොත් ඉන්ද්‍ර, පොලිස් අත් අඩංගුවේ සිටියදී නවගමුව ඇඹුල්ගමුව ප්‍රදේශයේදී පොලිසිය විසින් වෙඩි තැබීමෙන් මරා දැමුණු අතර පොලිසිය පවසන්නේ ආයුධ පෙන්වීමට ගිය අවස්ථාවේදී පොලිස් රථයේ රියදුරුගේ ගෙළ සිරකිරීමට තැත් කිරීමේදී මෙම වෙඩි තැබීම වූ බවය.

2020-06-07 පතිරණගේ රාජා විමලධර්ම නොහොත් ගොනා කෝවිලේ රාජා, මිනුවන්ගොඩ බල්ලපාන ප්‍රදේශයේදී අත්අඩංගුවට ගැනීමට ගිය කැළණිය කොට්ඨාශ අපරාධ විමර්ශණ අංශය සහ පෑලියගොඩ අපරාධ විමර්ශණ පොලිස් නිලධාරින් සමඟ ඇතිවූ වෙඩි හුවමාරුවකින් මිය ගිය බව පොලිසිය පවසයි.

2020-06-20 රන්කොත් පේඩිගේ සම්පත් සංජිව නොහොත් කැටවලපිටියේ සම්පත්, මල්වතුහිරිපිටිය රබර්වත්ත ප්‍රදේශයේදී පොලිසිය සමඟ ඇතිවූ වෙඩි ප්‍රහාරයකින් මිය ගිය බව පොලිසිය වාර්තා කරයි.

2020 -10-20 සමරසිංහ ආරච්චිගේ මදුෂ් ලක්ෂිත නොහොත් මාකඳුරේ මදුෂ්, කොළඹ අපරාධ කොට්ඨාශයේ සිරගත කර තිබියදී කොළඹ මාලිගාවත්ත මහල් නිවාස අසල සඟවා තිබු මත්ද්‍රව්‍ය තොගයක් පෙන්වීමට රැගෙන ගිය අවස්ථාවේ දී ඇතිවූ වෙඩි හුවමාරුවකදී මිය ගිය බව පොලීසිය පවසයි.

2020-08-12 අසිත හේමසිරි නොහොත් සෙල්ටා, මුල්ලේරියාව වැලිවිට ප්‍රදේශයේදී පොලිස් වෙඩි පහරින් මිය ගිය අතර පොලිසිය පවසනුයේ ඔහු විසින් පොලිසිය වෙත අත් බෝම්බ ප්‍රහාරයක් එල්ල කිරීමට යාමේදී වෙඩි තැබීම සිදුවූ බවය.

2021-05-11 මාබුලගේ දිනිත් මෙලෝන් මාබුල නොහොත් ඌරු ජුවා, පොලිස් අත්අඩංගුවේ සිටියදී වෙඩි තැබීමකින් මිය ගිය අතර ඊට දින කිහිපයකට පසු පොලිස් අත්අඩංගුවේ සිටියදී විමර්ශන සඳහා පිටතට රැගෙන ගිය අවස්ථාවක පොලිස් වෙඩි පහරින් මිය ගියේය.