ආදි ශිෂ්‍ය සංගමයේ සිදුවී ඇතැයි කියන අක්‍රමිකතා සම්බන්ධයෙන් අවුරුදු අටක ගිණුම් විගණනය නොකිරීම ගැන කරුණු දැක්වීමට ලබන ජනවාරි 13 වැනි දා අධිකරණයේ පෙනී සිටින ලෙස ගම්පහ බණ්ඩාරනායක විද්‍යාලයයේ විදුහල්පතිට අධිකරණය මගින් නොතීසි නිකුත් කර තිබේ.
ගම්පහ අතිරේක දිසා විනිසුරු නන්දන අමරසිංහ විසින් එම විද්‍යාලයයේ විදුහල්පති ලාල් දිසානායක ඇතුළු පිරිසකට නොතීසි නිකුත් කර ඇත්තේ 09 සිකුරාදා දිනයි.
ගම්පහ බණ්ඩාරනායක විද්‍යාලයයේ විදුහල්පති ලාල් දිසානායක, ආදි ශිෂ්‍ය සංගමයේ විධායක ලේකම් ලංකා බණ්ඩාර, හිටපු විධායක ලේකම් අතුල රණවීර, හිටපු ජ්‍යෙෂ්ඨ භාණ්ඩාගාරික ලයනල් එදිරිසූරිය සහ ඩබ්ලිව් කේ සුමනසේකර ඇතුළු 15 දෙනෙක් එම පෙත්සමෙන් වගඋත්තරකරුවන් කරනු ලැබ සිටිති.
එම විද්‍යාලයයේ ආදි සිසුන් හතර දෙනකු වන දුමින්ද හපුආරච්චි, සුජිත් ප්‍රියන්ත රුබේරු, අසංක දර්ශන ජයසිංහ සහ දීපාල් නිශජිත් වීරක්කොඩි හා එම පාසලේ ආදි ශිෂ්‍ය නීතීඥවරු පිරිසක් නඩුව ගොනු කර තිබේ.
සමාගම් රෙජිස්ටාර් දෙපාර්තමේන්තුවේ ලියාපදිංචි කර ඇති ආදි ශිෂ්‍ය සංගමයේ 2007 සිට ගිණුම් රජයේ පිළිගත් ලියාපදිංචි විගණකවරයකු මගින් විගණනය කර නැතැයි ද, එම කාල සීමාවේ රුපියල් කෝටි තුනක වියදමින් ඉදි කළ පාසලේ පිහිනුම් තටාක ව්‍යාපෘතියේ ගෙවීම්වලදී මූල්‍ය අක්‍රමිකතා සිදුවී ඇති බවට චෝදනා එල්ල වී ඇතැයි ද පැමිණිල්ලේ සදහන් වේ.
අධ්‍යාපන අමාත්‍යංශ චක්‍රලේඛ අනුව විදුහල්පති නිල බලයෙන් ආදි ශිෂ්‍ය සංගමයේ සභාපති වන බවත්, සංගමයේ සියලුම මූල්‍ය කටයුතුවල විදුහල්පති වගකිව යුතු බවත්, නඩුවේ දෙවැනි විත්තිකාර ලාල් දිසානායක විද්‍යාලයයේ ආදි ශිෂ්‍ය සංගමයේ කටයුතු සදහා සක්‍රීයව දායක වී ඇති බවත් පැමිණිල්ලේ දැක්වේ.
අධ්‍යාපන අමාත්‍යංශ චක්‍රලේඛ අනුව රජයේ විගණකාධිපති මගින් හෝ රජයේ ලියාපදිංචි වෙනත් විගණකවරයකු මගින් 2007 සිට 2012 දක්වා ගිණුම් විගණනය කරන ලෙස ද, එමගින් මූල්‍ය අලාභයක් සංගමයට සිදුවී ඇතැයි අනාවරණය වන්නේ නම් විදුහල්පතිවරයා ඇතුළු අදාළ වගඋත්තරකරුවන්ගෙන් අය කර දෙන ලෙස ද පැමිණිල්ල ඉල්ලා සිටියි.
නීතීඥවරුන් වන තරංග වීරසිංහ, සමන් කිරිඇල්ල, ලක්දිනු ධීරසේකර, චවිරු සිරිසේන, සහ තුසිත රණතුංග සමග ජ්‍යෙෂ්ඨ නීතීඥවරුන් වන නිමල් රණසිංහ සහ චන්දන විජේසූරිය පැමිණීල්ල වෙනුවෙන් පෙනී සිට ඇත.
Facebook Comments
