ශ්‍රී ලංකා ආරක්ෂක හමුදා පාලනය යටතේ පැවති අධි ආරක්ෂක කලාපයක් තුලදී මරා දමා විසි හතර වසරක් ගතවීත් යුක්තිය නොලද දෙමළ මාධ්‍යවේදියකුට යුක්තිය ඉල්ලා සිටින වන්නියේ මාධ්‍ය සමාජයක් ඔහුට යුක්තිය යනු එක සිද්ධියක් විසඳාලීම පමණක් නොවන බව අවධාරණය කර තිබේ.
නිබය, සරල මාධ්‍යවේදියකු ලෙස නම් දැරූ වෙඩිල්ලෙන් නිහඬ කෙරුනු නිමලරාජන් මයිල්වාගනම්ගේ 24 වැනි අනුස්මරණය වෙනුවෙන් මුලතිව් මාධ්‍ය සමාජයේ සභාපතිගේ අත්සනින් යුතුව නිකුත් කර තිබෙන මාධ්‍ය නිවේදනයක් මගින් මාධ්‍යවේදීන්ගේ ආරක්ෂාව වෙනුවෙන් ඔවුන් ඉල්ලා සිටින්නේ ජාත්‍යන්තර සහභාගිත්වයෙන් යුත් අධිකරණ බලතල සහිත විමර්ශනයකි.
“නිමලරාජන්ට යුක්තිය යනු එක සිද්ධියක් විසඳාලීම පමණක් නොවේ. එය ප්‍රචණ්ඩත්වය සහ භීෂණය නිර්බාධිතව පවත්වාගෙන යාමට ඉඩ සලසන ක්‍රමය උගුලා දැමීම පිළිබඳ ප්‍රශ්නයකි. එසේ හෙයින්, මෙම අපරාධ සම්බන්ධ වගඋත්තරදායකත්වයත්, සකල මාධ්‍යවේදීන්ගේ ආරක්ෂාවත් සහතික කිරීම සඳහා නොපමාව ගතයුතු පියවරක් ලෙස අප ඉල්ලා සිටින්නේ ජාත්‍යන්තර මාධ්‍ය සංවිධාන, විමර්ශකයන් හා නීති විශේෂඥයන්ගේ දායකත්වයෙන් යුත් අධිකරණ බලතල සහිත විමර්ශනයකි. ”
දෙමළ මාධ්‍යවේදී නිමලරාජන් මයිල්වාගනම් ඝාතනය කොට විසිහතර වසරක් ගතවී ඇතත්, අදත් යුක්තිය අඛණ්ඩවම අහිමි කෙරෙමින් පවතින බව පෙන්වා දෙන මුලතිව් මාධ්‍ය සමාජය අවධාරණය කරන්නේ ඔහු ඇතුළු තවත් බොහෝ දෙනාගේ ඝාතන සම්බන්ධයෙන් පිළිතුරක් නොදෙන්නේ අපරාධකරුවන්ට විපාක අත් විඳීමේ බියෙන් තොරව කටයුතු කිරීමට මග සලසන දණ්ඩ මුක්තිය දිගටම පවත්වාගෙන යාමට ඉඩ සලසමින් බවයි.
මසකට ඉහත දී බලයට පත් නව ජනාධිපතිවරයාගේ ආණ්ඩුව, ඝාතනයට සහ අතුරුදහන් කිරීමට ලක්වු 50 ට ආසන්න මාධ්‍යවේදීන් සම්බන්ධයෙන් විමර්ශනය නොකිරීම පිළිබදවද මුලතිව් මාධ්‍ය සමාජය ප්‍රශ්න කර තිබේ.
“අනුර කුමාර දිසානායක ජනාධිපතිගේ අලුත් ආණ්ඩුව ධර්මරත්නම් සිවරාම් ඝාතනය ඇතුළු අවධානයට ලක්වූ සිද්ධීන් කිහිපයක් නැවත විභාග කරන බව ප්‍රකාශයට පත්කර ඇතත්, ප්‍රත්‍යක්ෂ ප්‍රගතියක් පෙන්වා නැත. තරාකි සිවරාම්ට යුක්තිය සලසා දීම බොහෝ කල් පමා වූවක් වන්නා සේම, තවත් මාධ්‍යවේදීන් 50කට ආසන්න පිරිසකගේ ඝාතන සහ අතුරුදහන් කිරීම් විමර්ශනය නොකරන්නේ මන්දැයි අලුත් ආණ්ඩුව පැහැදිලි කොට නැත. ”
සිය නිවේදනය මගින් මුලතිව් මාධ්‍ය සමාජය තව දුරටත් පෙන්වා දෙන්නේ දෙමළ මාධ්‍යවේදීන් රාජ්‍ය බුද්ධි අංශ සහ යුද හමුදාවේ අඩන්තේට්ටම්වලට, බියගැන්වීම්වලට සහ සෝදිසිකිරීම්වලට තවමත් මුහුණ දෙමින් සිටින්නේ බියත්, භාෂණයේ නිදහසට අගුලු දැමීමත් වඩාත් දරුණු කෙරෙන පරිසරයක් තුල බවයි.
මාධ්‍ය මර්දනය ද හෙළා දකිමින් මුලතිව් මාධ්‍ය සමාජය නිකුත් කර තිබෙන නිවේදනය මගින් ඔවුන් තව දුරටත් ඉල්ලා ඇත්තේ මාධ්‍යවේදීන් බියවද්දන සහ ඉලක්ක කරන’වුන් දිරිගන්වන මේ දණ්ඩමුක්ති සංස්කෘතිය අවසන් කරන ලෙසයි.
“දිගටම පවත්වාගෙන යන මර්දනය හෙලා දකින අපි, මාධ්‍යවේදීන් බියවද්දන සහ ඉලක්ක කරන’වුන් දිරිගන්වන මේ දණ්ඩමුක්ති සංස්කෘතිය අවසන් කරන ලෙස ඉල්ලා සිටිමු. මාධ්‍ය නිදහස යනු රක්ෂා කළ යුත්තකි. සත්‍යය වාර්තා කරන’වුන්ගේ ආරක්ෂාව යනු ප්‍රමුඛත්වයෙහි ලා සැලකිය යුත්තක් විනා අවදානමේ හෙළිය යුත්තක් නොවේ. ”
දිගින් දිගටම ප්‍රකාශනයේ නිදහස අඩස්සි කරමින්, සක්‍රිය ලෙස දණ්ඩමුක්තිය ප්‍රවර්ධනය කරන මුල්බැසගත් ව්‍යුහයන් ප්‍රතිසංස්කරණය කරන තාක්කල් එක මාධ්‍යවේදියකුගේ ඝාතනය පිළිබඳ පරීක්ෂණයකින් පමණක් මාධ්‍ය නිදහස අපේක්ෂා කිරීම අසීරු බව එම නිවේදනයේ වැඩි දුරටත් සදහන්ය.
දකුණේ කිසිදු මාධ්‍ය සංවිධානයක් වැඩි වශයෙන්ම සිංහලෙන් උතුර වාර්තා කළ නිමලරාජන් සැමරූ බවක් දැනගන්නට නැතත් යාපනය සහ මුලතිව් මාධ්‍ය සමාජ මෙවරත් නිමලරාජන් මයිල්වාගනම් අනුස්මරණය කර තිබුනි.
විනාශකාරී යුද්ධයත්, එයින් පීඩා විඳින උතුරේ දෙමළ ජනකායත් පිළිබඳව යුද පීඩිත භූමියේ සිට දෙස් විදෙස් මාධ්‍ය ඔස්සේ ලෝකයේ අවධානය යොමු කිරීමට මාධ්‍යවේදි නිමලරාජන් මයිල්වාගනම්ට හැකිවිය.
හරය, බීබීසී සහ වීරකේසරී ඇතුළු ආයතන වෙත දෙමළ සිංහල දෙබසින්ම වාර්තා සැපයීමේ නිරත නිමලරාජන් 2000 ඔක්තෝබර් 19 රාත්‍රියේ යාපනයේ සිය නිවසේදී වෙඩි තබා මරා දමන ලද්දේ යුද පීඩිත ජනයා පිළිබඳව වීරකේසරී පුවත්පතට ලිපියක් ලියමින් සිටියදීය.
හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පාලන සමයේ සිදුකළ එම ඝාතනය සම්බන්ධයෙන් අදත් යුක්තිය ඉටුවී නැත.
මයිල්වාගනම් නිමලරාජන්ට සිය නිවස තුලදී අත් බෝම්බ ගසා වෙඩිතබා ඝාතනය කිරීම සම්බන්ධයෙන් චෝදනා එල්ල වුනු රජය සමග එක්ව සිටි ඊපීඩීපී අතුරු හමුදා කල්ලි සාමාජිකයන් 2003 දී වව්නියාවේ අධිකරණය විසින් නිදහස් කර යවන ලදී.
එම ඝාතනය සම්බන්ධයෙන් සෘජුවම සැකකෙරෙන ඊපීඩීපී ප්‍රබලයකු වන නැපෝලියන් යනුවෙන් ප්‍රකට සෙබස්තියන් පිල්ලේ රමේෂ් පොලිස් ප්‍රශ්න කිරීමකින් තොරවම රටින් පලාගොස් බ්‍රිතාන්‍යයේ රැකවරණ ලබා සිටින බව වාර්තා විය.
ශ්‍රී ලංකාවේ සිදුවූ පැහැරගැනීම්, නඩු නැති ඝාතන, වධහිංසා සහ අතුරුදහන් කිරීම් ඇතුළු බරපතල මානව හිමිකම් උල්ලංඝන සම්බන්ධයෙන් රට තුල යුක්තිය ඉටුවන බවට කිසිදු විශ්වාසයක් නැති දෙමළ ජනතාව ඉල්ලා සිටින්නේ ජාත්‍යන්තර යුක්ති විනිශ්චයකි.
Facebook Comments
