ජාතීන් අතර වෛරය පතුරන ආකාරයට ප්‍රකාශ නිකුත් කල හා සිංහල නොවන ජාතීන්ට හට එරෙහි ප්‍රචණ්ඩ ප්‍රහාර දියත් කිරීමට උද්ඝෝෂණය කරමින් සිටි පුද්ගලයකු රිමාන්ඩ් ගත කොට තිබේ.
ශ්‍රී ලංකා තව්හීද් ජමාද් සංවිධානයේ නායක අබ්දුල් රාසික් හා ඩෑන් ප්‍රියසාද් ලෙසින් තමන් හඳුන්වාගන්නා දෙමටගොඩ සුදේශ් ප්‍රියසාද් නැමැත්තන් මෙසේ අත්අඩංගුවට ගෙන රිමාන්ඩ් බන්ධනාගාර ගත කර ඇත.
ඊයේ (15) දිනයේදී ඩෑන් ප්‍රියසාද් නැමැත්තා පොලිසිය විසින් අත්අඩංගුවට ගෙන කොටුව මහේස්ත්‍රාත් වෙත ඉදිරිපත් කල අතර අබ්දුල් රාසික් අද (16) අලුත්කඩේ මහේස්ත්‍රාත් වෙත ඉදිරිපත් කිරිමෙන් අනතුරුව රිමාන්ඩ් ගත කරන ලෙස නියෝග කළේය.
අසාත් සාලිගෙන් පැමිණීල්ලක්
රටේ සංහිඳියාවට තර්ජනයක් වෙමින් ජාතිවාදය වපුරුවන අන්තවාදීන් පිරිසකට විරුද්ධව තමන් පොලිස්පතිවරයාට කළ පැමිණිල්ලකින් අනතුරුව මේ අත් අඩංගුවට ගැනීම සිදුවූ බව ජාතික සමගි සන්ධානයේ නායක අසාත් සාලි පැවසීය.
සුදේශ් ප්‍රියසාද් ,බොදුබල සේනානායක ගලබොඩඅත්තේ ඥාණසාර, නැගෙනහිර උප ප්‍රධාන සංඝනායක අම්පිටියේ සුමනරතන සහ තව්හිඩ් ජමාද් නායක අබ්දුල් රාසික්ට එරෙහිව මෙම පැමිණිලි කරන ලද බව අසාත් සාලි සිලෝන් ජර්නල්ස් වෙත ප්‍රකාශ කළේය.
ලාබාල තරුණියන් විවාහ කරගැනීමට ෂරියා නීතියෙන් දී ඇති අවසරය වෙනස් කරමින් ශ්‍රී ලංකාවේ ව්‍යවස්ථා සංශෝධනය කිරීමට එරෙහිව පසුගියදා කුපිතකාරී උද්ඝෝෂණයක යෙදුනු ශ්‍රී ලංකා තව්හීද් ජමාද් සංවිධානයේ නායක අබ්දුල් රාසික් මාලිගාවත්තේ පැවති එම උද්ඝෝෂණ රැලියේදී වෙනත් ආගම් සම්බන්ධයෙන් වෛර සහගත ප්‍රකාශ කිරීමත්, අපහාසාත්මක වෙබ් අඩවියක් පවත්වාගෙන යාමත් හේතුවෙන් අත්අඩංගුවට ගත් බව පොලිසිය පවසයි.
අබ්දුල් රාසික්ට විරුද්ධව පැමිණිල්ලක් ගොනු කළ ජාතික සමගි සන්ධානයේ නායක අසාත් සාලි විසින් තව්හීද් ජමාද් නායකයා හඳුන්වනු ලැබුයේ ‘ඉස්ලාම් ධර්මයට අපහාසයක්’ ලෙසිනි.
සමාජ මාධ්‍ය ජාල ඔස්සේ තර්ජනාත්මක ජාතිවාදී වාගාඩම්බර පලකරමින් සිටි ප්‍රියසාද් නොවැම්බර් 15 දා අත්අඩංගුවට ගන්නා අවස්ථාවේ තමන් අත වරද නැති බවට පොලිස් නිලධාරීන්ට සෝබරව පවසනු වීඩියෝවක් සාමාජ ඡාලා ඔස්සේ පැතිරි යමින් ඇත.
රිමාන්ඩ් ගත කොට සිටින මේ දෙදෙනාට අමතරව බොදුබල සේනානායක ගලබොඩඅත්තේ ඥාණසාර සහ නැගෙනහිර උප ප්‍රධාන සංඝනායක අම්පිටියේ සුමනරතන දෙදෙනාට එරෙහිව ද ජාතිවාදය ඇවිස්සීම සම්බන්ධයෙන් පොලිස්පතිවරයාට තමන් පැමිණිලි කළ බව අසාත් සාලි පැවසීය.
අත්අඩංගුවට පත් වු ඩෑන් ප්‍රියසාද් ලෙසින් තමන් හඳුන්වාගන්නා දෙමටගොඩ සුදේශ් ප්‍රියසාද් නොවැම්බර් 25 දක්වා රිමාන්ඩ් ගත කොට ඇති අතර ශ්‍රී ලංකා තව්හීද් ජමාද් සංවිධානයේ නායක අබ්දුල් රාසික් මේ මස 29 දක්වා රිමාන්ඩ් ගත කිරීමට අධිකරණය නියෝග කොට තිබේ.
Facebook Comments
