රගර් ක්‍රීඩක වසීම් තාජුඩීන්ගේ මරණයට අදාළ පරීක්ෂණ කටයුතු කඩිනම් කරන ලෙස කොළඹ අතිරේක මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට දැනුම් දී තිබේ.
අදාළ නඩුව ඊයේ (16) කැඳවු අවස්ථාවේ නිශාන්ත පීරිස් මහේස්ත්‍රාත්වරයා විවෘත අධිකරණයේ දැනුම් දී ඇත්තේ මෙම නඩුව වසර දෙකක පමණ පැරණි බැවින් ගත වී ඇති කාලය සැලකිල්ලට ගෙන පරීක්ෂණ කටයුතු කඩිනම් කිරීමට පියවර ගන්නා ලෙසයි.
මේ අතර වසීම් තාජුඩීන්ගේ මරණය සිදුවීමට පැය කිහිපයකට පෙර ඔහුගේ මිතුරෙකුගෙන් ලැබුණු දුරකථන ඇමතුමක් පිළිබඳව පරීක්ෂණ පවත්වන බව අධිකරණයට වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව දැනුම් දී ඇත.
එම පරීක්ෂණය තුළින් සිද්ධියට අදාළ විමර්ශන කටයුතු වැදගත් පියවර ගනු ඇති බව ද පොලීසිය අධිකරණය හමුවේ ප්‍රකාශ කළ බව අප අධිකරණ වාර්තාකරු සඳහන් කළේය.
සිද්ධියට අදාළව අත්අඩංගුවට ගෙන සිටින හිටපු ජ්‍යෙෂ්ඨ නියෝජ්‍ය පොලිස්පති අනුර සේනානායක සහ නාරාහේන්පිට පොලීසියේ අපරාධ අංශයේ හිටපු ස්ථානාධිපති සුමිත් පෙරේරා යන සැකකරුවන් ලබන 30 වන දින දක්වා රක්ෂිත බන්ධනාගාර ගත කිරීමට මෙහිදී මහේස්ත්‍රාත්වරයා නියෝග කර ඇත.
Facebook Comments
