බාල ළමා දරුවන් වීරයන් බවට පත් කිරීමට ගන්නා වෑයම මගින් දරුවන් ප්‍රචණ්ඩ ක්‍රියා වලට යොමු කරන බවට දෙමාපියන් සහ මාධ්‍ය ආයතන ළමාරක්ෂක බලධාරීන්ගේ විවේචනයට ලක්වී තිබේ.
ළමා අපයෝජන නිවාරණ කාර්යාංශය එම විවේචනය කර ඇත්තේ බාල දරුවන් මැරකම් පාන වීඩියෝ පට පලකිරීම සම්බන්ධයෙන් කිහිප දෙනකු අත් අඩංගුවට ගැනීමෙන් අනතුරුවයි.
විවිධ වැඩ සටහන් හරහා පුංචි දරු පැටවුන් “තාරකා” කිරීමට දෙමාපියන් ගන්නා උත්සාහය සම්බන්ධයෙන් කනගාටුව පල කරන ළමා අපයෝජන නිවාරණ කාර්යාංශයේ ඉහල පොලිස් නිලධාරියෙක් කුඩා දරුවන් වීරයන් හා දක්ෂයන් බවට පත් කළ යුත්තේ ශ්‍රී ලංකාවේ පවතින නීතියට අනුකූලව බව වැඩිහිටියන්ට අවධාරණය කරයි.
“අපේ ශ්‍රී ලංකාවේ දකින දෙයක් තමයි, ඉතාමත්ම කනගාටුදායක කරුණක් ඒක, පුංචි දරු පැටවුන්ව වීරයෝ කරන්නට යනවා,” යි
“විවිධ වැඩ සටහන් අපි දැක්කා පහුගිය කාලය පුරාවටම විවිධ තාරකා බිහිවෙනුවා. පුංචි දරු පැටවුන්ට දරා ගන්න බැරි දේවල් ඔවුන් ලවා කරවලා බොහෝ දරුනු විදිහට ඒක ප්‍රසිද්ධියට පත් කිරීම”
කුඩා දරුවන් අවි ආයුධ ගෙන ඉතා ප්‍රචණ්ඩ ලෙස හැසිරෙනු දැක්වෙන වීඩියෝ පසුගියදා සමාජමාධ්‍ය වල මුදාහැර තිබුනේ එවැනි වැඩසටහන් වල ප්‍රතිපලයක් ලෙස බව ළමා හා කාන්තා අපයෝජන නිවාරණ කාර්යාංශයේ මහජන සම්බන්ධතා අංශයේ ස්ථානාධිපති ප්‍රධාන පොලිස් පරීක්ෂක මනෝජ් සමරසේකර පෙන්වා දෙයි.
බාල වයස්කරුවකුගේ ප්‍රචණ්ඩ හැසිරීමක් දැක්වෙන වීඩියෝවක් පසුගිය දිනවල සමාජ මාධ්‍යජාලා අවුළුවා තිබු අතර එම වීඩියෝව නිකුත් කිරීම සදහා උපදෙස් දුන් බවට සැකපිට 21 හැවිරිදි තරුණයකු ද මේ වන විට පොලීසිය විසින් අඩංගුවට ගෙන තිබේ.
අපරාධ පරික්ෂණ දෙපාර්තමේන්තුවේ පරිගණක අපරාධ විමර්ශන ඒකකය විසින් මැයි 6 බදාදා රත්නපුර වේවැල්වත්ත ප්‍රදේශයේ දි එම තරුණයා අත්අඩංගුවට ගෙන තිබුණු අතර සැකකරු සමාජ මාධ්‍ය ක්‍රීයාකාරිකයකු සහ ජායාරූපශිල්පියකු ලෙසද කටයුතු කර තිබෙන බව මාධ්‍ය විසින් වාර්තා කර තිබුණි.
සැකකරු සහ සමාජ මාධ්‍ය වෙත එම ව්ඩියෝව මුදාහල බවට සැක කෙරෙන බාල වයස්කරු අතර දැන හැදිනකම් ගොඩනැගි තිබුණේ ද සමාජ මාධ්‍ය හරහා බව මාධ්‍ය විසින් වාර්තා කර තිබේ.
Yarl TV මුහුණු පොත හරහා නිකුත් කර තිබෙන වීඩියෝ පටයක් මගින් ප්‍රධාන පොලිස් පරීක්ෂක මනෝජ් සමරසේකර වැඩිහිටියන්ගෙන් සහ දෙමාපියන්ගෙන් ඉල්ලා සිටින්නේ “දරු පැටවුන්” කරන දේ සම්බන්ධයෙන් සැලකිලිමත් වන ලෙසයි.
දරු පැටවුන් අන්තර්ජාලය සහ විවිධ තාක්ෂණික උපරණ භාවිත කිරීමේදී ඒ සදහා ප්‍රමිතියක් ඇති කරන ලෙස ළමා හා කාන්තා අපයෝජන නිවාරණ කාර්යාංශයේ මහජන සම්බන්ධතා අංශයේ ස්ථානාධිපතිවරයා වැඩි දුරටත් ඉල්ලා තිබේ.
Facebook Comments
