ගෝඨාභය රාජපක්ෂ ජනාධිපතිවරයාගේ පාලන කාලය තුළ මර්දනයක් ක්‍රියාත්මක නොවනු ඇති බවට ජනාධිපතිවරණයේ දී සජිත් ප්‍රේමදාස හට සහාය දැක්වු වාමාංශික නායකයකු විශ්වාසය පළ කර තිබේ.
ඉතිහාසය තුළ ඔහුට ඇති නරක නාමය තවත් නරක් කර ගැනීමට ක්‍රියා නොකරනු ඇති බවට නව සම සමාජ පක්ෂ නායකයා සමාජ මාධ්‍ය වෙත නිකුත් කර ඇති විඩියෝවකින් කියා සිටී.
“ගෝඨාභයගේ බලය තුළ ලෝකය පිලිගත් ආණ්ඩුවක් හදන්න පුලුවන් වෙන්නේ නෑ. දැනට යම් යම් රටවල් පිළිගත්තත් ඔහුගේ ඉතිහාසය තුල ඔහු කරලා තියෙන දේවල් සුද්ද වෙලා නැහැ. ඒ නිසා ශක්තිමත් ආණ්ඩුවක් ලෝක ප්‍රජාතන්ත්‍රවාදය පිළිගන්න ආණ්ඩුවක් සකස් කිරීමට ඔහුට හැකියාවක් නැහැ. ඉතා දුර්වල තැනක තමයි ඔහු ඉන්නෙ ඒ නිසා ඔහු යම් කිසි මර්දනකාරී වැඩ පිලිවෙලකට එළඹෙන එකක් නැහැ කියලා අපි විශ්වාස කරනවා. මොකද ඔහුට තියෙන නරක නාමය තවත් නරක නාමයක් කර ගැනීමට ඔහු ක්‍රියා කරන එකක් නැහැ. නමුත් කෙටි කාලිනවම ඔහු තම බලය ශක්තිමත් කර ගැනීමට ක්‍රියා කරාවි.”
සිංහල බලවේග වල ශක්තිමත් බව මැතිවරණ ප්‍රතිඵලය තුලින් පෙනෙන්නට තිබුන ද ශ්‍රී ලංකාවේ අට වන ජනාධිපතිවරයා හට ජාත්‍යන්තරය පිලිගන්නා ආණ්ඩුවක් පිහිටුවිය නොහැකි බවයි ආචාර්යවරයා අවධාරණය කරන්නේ.
ඉතිහාස තුල පවා ජාතිවාදය ආගම්වාදය ඉදිරියට අවස්ථා ඇති බව ද පෙන්වා දෙන නව සම සමාජ පක්ෂ නායකයා පසුගාමී අමනුෂ්‍ය අදහස් මනුෂත්වයේ ගමන තුල කිසි විටකත් ජයගෙන නැති බවද ඔහු කියා සිටියේය.
ගෝඨාභය රාජපක්ෂ ජය ගැනීමත් සමඟ සිය තනතුරු වලින් ඉල්ලා අස්වන නායකයන් හට දොස් පවරන ආචාර්ය වික්‍රමබාහු කරුණාරත්න ජනතා සතුරන් නොවී තමන් සතු බලයෙන් ඉදිරියට යා යුතු බවයි පෙන්වා දෙන්නේ.
මනුෂ්‍යත්වය සමඟ එක්වු සියලු බලවේග සමඟ එක්ව ඉදිරියට යායුතු බව පෙන්වා දෙන නසසප නායකයා අචාර්ය වික්‍රමබාහු කරුණාරත්න තනිව ගමන් කිරිමට ගොස් ජවිපෙට ද එක්සත්ව සටන් කිරීමට ආරාධනා කර සිටී.
Facebook Comments
