දිවයිනට බලපා ඇති අයහපත් කාළගුණයෙන් ඇති වු නායයාම් හා ගංවතුර හේතුවෙන් අවම වශයෙන් එකසිය දහතුන් දෙනකු මරුමුවට පත්වී අනු එක් දෙනෙකු අතුරුදහන් වී තිබේ.
පනස් හයදහසකට අධික පවුල් සංඛ්‍යාවක දෙලක්ෂය ඉක්මවූ ජනතාවක් පීඩාවට පත්ව සිටින බව පවසන ආපදා කළමනාකරණ මධ්‍යස්ථානය දෙසිය පනස් දෙනකුට මරු කැඳවමින් නිවාස දස දහසක් විනාශ කරමින් 2003 මැයි මාසයෙන් පසු ගැලු හානිකරම ගංවතුර මෙය බවද කියා සිටී.
ගංවතුර සහ නායයාම් හේතුවෙන් ගාලු දිස්ත්‍රීක්කයේ වැඩි පිරීසක් පීඩාවට පත් වී ඇති අතර එම සංඛ්‍යාව වන එක්ලක්ෂ විසිදහසකට අධික බවයි ආපදා කළමනාකරණ මධ්‍යස්ථානයේ වාර්තා පෙන්වා දෙන්නේ.
වැඩිම ජීවිත හානි ප්‍රමාණයක් සිදුව ඇත්තේ රත්නපුර දිස්ත්‍රීක්කයේ වන අතර ජිවිතක්ෂයට පත් වු ගණන හතලිස් හතක් වේ.
වසංගත රෝග පැතිර යාම වැළැක්වීම සඳහා මහජන සෞඛ්‍ය පරීක්ෂකවරුන් ඇතුළු වෛද්‍ය කණ්ඩායම් සඳහා උපදෙස් ලබාදෙමින් සුරක්ෂිත මධ්‍යස්ථාන සඳහා යොමු කර ආරක්ෂිත වැඩපිළිවෙළක් ක්‍රියාත්මක කර තිබෙන බවයි සෞඛ්‍ය අමාත්‍ය රාජිත සේනාරත්න පවසන්නේ.
තවදුරටත් දිස්ත්‍රික්ක හතක නායයාම් අවධානම පවතින බව පවසන ජාතික ගොඩනැගිලි පර්යේෂණ සංවිධානයේ නායයාම් හා අවධානම් පර්යේෂණ සංවිධානයේ අධ්‍යක්ෂ ආර්.එම්.එස්. බණ්ඩාර එම මධ්‍යස්ථානය විසින් ලබාදෙන නිවේදන නිසි ලෙස පිළිපදින ලෙස හා එම නිවේදන අනුව ක්‍රීයා කරන්නැයි ජනතාවගෙන් ඉල්ලා සිටී.
Facebook Comments
