තාජුඩීන්ගේ ඝාතන සීසීටිවී දර්ශන කැනඩාවට

රගර් ක්‍රීඩක වසීම් තාජුඩීන්ගේ ඝාතනයට අදාළ සීසීටීවී දර්ශන ඇතුළත් සී. ඩී. පටයක් මේ මස 22 වන දින කැනඩාවේ කොලොම්බියානු රසායනාගාරයවෙත ගෙන යාමට සූදානම් බවට රහස් පොලිසිය ඊයේ (03) කොළඹ අතිරේක මහේස්ත්‍රාත් මොහොමඩ් මිහාල් මහතා වෙත දැනුම් දුන්නේය.

පොලිස් සමීප රූ ආවේක්ෂණ කොට්ඨාසය විසින් අධිකරණයට බාර දුන් සී. ඩී. පට අතරින් එක් පිටපතක් මෙසේ නීතිපති උපදෙස් මත කැනඩා කොලොම්බියානු රසායනාගාරය වෙත ගෙන යාමට නියමිතය.

2012/5/16 රාත්‍රී 11 සිට 2012/5/17 අලුයම 2 දක්වා වූ කාලය ආවරණය වන පරිදි බේස්ලයින් පාර මංසන්ධිය, හයිලෙවල් පාර මංසන්ධිය, කිරුළපන හා නාරාහේන්පිට මංසන්ධියේ සවිකර ඇති පොලිස් සමීප රූප ආවේක්ෂණ කොට්ඨාසයට අයත් සීසීටීවී කැමරාවල පටිගත වූ දර්ශන ඇතුළත් සී. ඩී. පට 2 හා ඩීවීඩී පට 8 ක් එම කොට්ඨාස භාර ස්ථානාධිපතිවරයා විසින් 2016/7/11 වන දින අධිකරණයට බාර දී තිබිණ.