වාම වාදී සිනමාවේදියා ලෙස බෞතිස්ම ලබා දශක තුනකට වැඩි කාලයක් සිංහල සිනමාව පෝෂණය කල සම්මානීය සිනමාවේදී ආචාර්ය ධර්මසේන පතිරාජ දිවි ගමන නිමා කර තිබේ.
මාස දෙකකට ආසන්න කාලයක් රෝගාතුරව සිට ධර්මසේන පතිරාජයන් ජනවාරි 28 ඉරිදා මිය යන විට 74වියෙහි පසු විය.
අවසන් කටයුතු අද පස්වරුවේ මහනුවර, මහයියාව පොදු සුසාන භූමියේදී සිදු කිරීමට නියමිත බව දැනුම් දෙන ඔහුගේ පවුලේ උදවිය එතෙක් පතිරාජයන්ගෙ නිසල දේහය මහනුවර මහ රෝහල පාරේ පිහිටි පෞද්ගලික මල්ශාලාවක අවසන් ගෞරව දැක්වීම සඳහා තැන්පත් කර තබන බව පවසයි.
1943 මාර්තු 28 වැනිදා මහනුවරදී උපත ලැබ මහනුවර ධර්මරාජ විද්‍යාලයෙන් අධ්‍යාපනය හැදෑරු ආචාර්ය පතිරාජ පේරාදෙණිය විශ්ව විද්‍යාලයේ සරසවි අධ්‍යාපනයෙන් අනතරුව මොනෑෂ් විශ්ව විද්‍යාලයෙන් ආචාර්ය උපාධිය හිමි කර ගෙන තිබේ.
1970 වසරේ සතුරෝ නම් කෙටි චිත්‍රපටයක් මගින් සිය සිනමා ගමනට පියවර තැබු ආචාර්ය පතිරාජයන් 1974 අහස ගව්ව නිර්මාණය කරමින් සිනමාවේදියෙක් ලෙස මෙරට සිනමා ඉතිහාසයට එක්විය.
පතිරාජයන් අහස්ගව්ව, බඹරු ඇවිත්, පාරදිගේ ,එයා දැන් ලොකු ළමයෙක්,සොල්දාදු උන්නැහේ , වාසුලි, මතුයම් දවස , සක්කාරං,පොන්මනී, ස්වරූප ඇතුළු සිනමා නිර්මාණ රැසක් බිහිකළ අග්‍රගන්‍ය සිනමාකරුවෙකි.
Facebook Comments
