මහනුවර සහ අම්පාර ප්‍රදේශයේ සිදුවු මුස්ලිම් විරෝධි ප්‍රහාරයන්ගෙන් අනතුරුව තහනමට ලක් වු සමාජ ජාලා වෙබි අඩවි නිදහස් කිරීම සම්බන්ධයෙන් ජනාධිපති මෛත්‍රීපාල සිරිසේන ජපානයේ වෙසෙන ශ්‍රී ලංකිකයන් හට කරුණු දක්වා තිබේ.
ෆේස්බුක් සමාජ ජාලය තාවකාලිකව තහනම් කිරීම ඉදිරි දින කිහිපයේදී ඉවත් කරන බව මෙන්ම සමාජ යහපත වෙනුවෙන් වන ප‍්‍රවාහයකට ඉඩ දුන්න ද සමාජය විනාශ කරන යම් දෙයක් ඇතොත් එය පාලනය කිරීමට යම් ක‍්‍රමවේදයක ඇති අවශ්‍යතාවයද ජනාධිපතිවරයා මෙහිදි පෙන්වා දුන් බවයි ජනාධිපති මාධ්‍ය ඒකකය පවසන්නේ.
ජංගම දුරකථන, පරිගණකය, අන්තර් ජාලය, සමාජ මාධ්‍ය නිර්මාණය වූයේ මානව සමාජයේ යහපත සඳහා බවත්, එයින් ලෝකයක දැනුම තමන්ට අත්කර ගත හැකි වුව ද අවාසනාවකට ශ්‍රී ලංකාවේ ඇතැම් දෙනා මෙම සම්පත් භාවිතා කරන්නේ රට විනාශ කිරීමට බව 13 අඟහරුවාදා ජපානයේ වෙසෙන ලාංකිකයින් අතර හමුවක දී ජනපති පවසා ඇත.
මෙම සම්පත් නිසි ලෙස භාවිතා කිරීම පිළිබඳ නව වැඩපිළිවෙලක් ඉදිරි සති කිහිපය තුළ රටට හඳුන්වාදීමට අපේක්ෂා කරන බව සඳහන් කර ඇති ජනපති මෛත්‍රීපාල සිරිසේන ඒ සඳහා රජය මෙන්ම සියලූ පුරවැසියන් ද තම වගකීම් ඉටුකිරීමේ අවශ්‍යතාවය පෙන්වා දුන් බවයි ජනාධිපති මාධ්‍ය ඒකකය නිවේදනය කරන්නේ.
ජාතික සමගිය නැති කිරීම, ජාතික ආරක්ෂාවට හානි කිරීම, පුද්ගලයන්ට කරන බරපතල නින්දා කිරීම් වැනි දේ ඉවත් කර යහපත් සහ නිවැරදි දේ පමණක් හුවමාරු කෙරෙන මාධ්‍ය වැඩි වැඩියෙන් අවශ්‍ය බව ද ජනාධිපතිවරයා වැඩි දුරටත් අවධාරණය කර තිබේ.
Facebook Comments
