රජයේ අසාර්ථකත්වය වසා ගැනීම සදහා සමාජ මාධ්‍ය වාරණයට ලක් කර ඇති බවට වෘත්තීය වෙබ් මාධ්‍යවේදින්ගේ සංගමය චෝදනා කරයි.
පසුගිය කාලය පුරාවට රජය සමාජ මාධ්‍ය තුල අපකීර්තියට පත්වු බව පෙන්වා දෙන සංගමයේ ලේකම් කැළුම් ශිවන්ත සමාජ මාධ්‍ය නිසි ලෙස භාවිත කිරීමට හැකි දක්ෂ පිරිසක් රජය සතුව නොමැති බවයි පවසන්නේ.
“රජය අපකීර්තියට පත්වුණා මේ ෆේස්බුක් එක හින්දා, සමාජ ජාලා තුල රජයේ වැඩ අපකීර්තියට පත් වුණා. මේ මාධ්‍ය භාවිතා කරන්න පුලුවන් දක්ෂ පිරිසක් නැහැ ඉතාම අදක්ෂ පිරිසක් ඉන්නෙ ඔවුන්ට මේකෙන් ගන්න පුලුවන් වාසිය අබ මල් රේණුවක්වත් ගන්න බැරි වුණා පසුගිය කාලේ ඒ අසාර්ථකත්වය වහගන්න කරන කුමන්ත්‍රණයක්” යි කැළුම් ශිවන්ත කියා සිටියේය.
මාධ්‍ය වාරණයක්
මුස්ලිම් විරෝධි ප්‍රහාරත් සමඟ පැය 72 කාලයකට පනවන ලද සමාජ මාධ්‍ය තහනම මෙතෙක් ඉවත් නොකිරීමට රජය කටයුතු කිරිම මාධ්‍ය වාරණයක් බව වෘත්තීය වෙබ් මාධ්‍යවේදින්ගේ සංගමයේ සභාපතිවරයා පෙන්වා දෙයි.
පැය 72 ක කාලයක් සදහා වුවත් සමාජ මාධ්‍ය වාරණය කිරීමට අවශ්‍ය නොමැති බව පෙන්වා දෙන සංගමයේ සභාපති ෆ්‍රෙඩී ගමගේ එයට තම සංගමයේ දැඩි විරෝධය පල කරන බව “මෙය මාධ්‍ය වාරණයක් පැය 72 ත් අවසන් “තේමා ව කරගනිමින් 13 බදාදා මරදාන පිහිටි සමාජ හා සාමයික කේන්ද්‍රෙය්දී වෘත්තීය වෙබ් මාධ්‍යවේදීන්ගේ සංගමය විසින් පැවැත්වු මාධ්‍ය සාකච්ඡාවක් අමතමින් කියා සිටියේය.
සමාජ මාධ්‍ය ක්‍රියාත්මක වන ආකාරය පිළිබඳව ගැටලු ගණනාවක් පැවතියද එයට විසඳුම සමාජ මාධ්‍ය තහනම් කිරිම නොවන බව පෙන්වා දුන් සභාපතිවරයා ආචාර ධාර්මික සමාජ මාධ්‍ය කලාවක් රට තුළ ස්ථාපිත විය යුතු බව අවධාරණය කළේය.
සමාජ මාධ්‍ය වාරණය සම්පුර්ණයෙන්ම අහෝසි කර දැමීම සදහා රජය වහාම තීන්දුවක් ගත යුතු බව ද ඔහු වැඩි දුරටත් සදහන් කළේය.
Facebook Comments
