දේශපාලන සිරකරුවෙකු වන තම පියා නිදහස් කරන ලෙස ඉල්ලා දෙමළ දැරිවියක් ජනාධිපතිවරයාගේ දියණිය වන දර්ශණි චතුරිකා සිරිසේන හට ලිපියක් යවා තිබේ.
කිලිනොච්චි මරඳපුරම් හි පදිංචි දහතුන් හැවිරිදි ආනන්ද සුදාහරන් සංගීතා විසින් ජනපති මෛත්‍රීපාල සිරිසේනගේ දියණිය හට යොමු කරන ලද ලිපියකින් ජිවිතාන්තය දක්වා සිරකර ඇති තම පියා නිදහස් කරන ලෙස ආයාචනා කර ඇත.
පසුගිය දිනක සිය මවගේ දේහයට අවසන් ගෞරවය දැක්වීමට පැමිණි සිරගත කර ඇති පියා සමඟ සංගීතා දියණි බන්ධනාගාර බස් රථයට නැඟ යාමට සැරසෙන අයුරු දැක්වෙන හද කම්පා කරවන විඩියෝවක් මාධ්‍ය මඟින් ප්‍රචාරණය විය.
“හිතවත් චතුරිකා අක්කෙ මට අම්මාත් තාත්තාත් දෙදෙනාම නැහැ. මමයි අයියයි ඉන්නේ අපේ ආච්චි ලඟ මම මගේ තාත්තා ගැන දන්නේ නැහැ මම තාත්තාව පලවෙනි වරට දැක්කේ අම්මාගේ මළ ගෙදරදී” යි සංගීතා විසින් චතුරිකා සිරිසේනට යවන ලද ලිපියේ සඳහන් වේ.
“අපි ඉන්නේ තනියම ඔබ ඉන්න‍ෙ ඔබේ පියා සමඟ ඒ නිසා ඔබ පියෙකුගේ ආදරය ගැන දන්නවා ඇති මම දෙවියන් විශ්වාස කරන්නේ නැහැ මම විශ්වාස කරන්නේ ඔබේ පියාව.”
මේ අතර ආන්නද සුදාරහන් සංගීතා සහ ඇගේ සොහොයුරා විසින් තම පියා වන සචින්තනම් ආනන්ද සුදාහරන් නිදහස් කරන ලෙස සහ ජනාපතිවරයා හමුවීමට දිනයක් ලබා දෙන ලෙස ඉල්ලා ලියමනක් යොමු කර තිබේ.
උතුරු යුද්ධයෙන් පීඩාවට පත් වු කාන්තාවන්ට හා දියණියන්ගේ බිඳ වැටුනු සිතුම් පැතුම් වලට ජනපති මෛත්‍රීපාල සිරිසේන සාධාරයක් ඇති කරනු ඇති බවට විශ්වාස කරන බව ජනාධිපතිවරයාගේ දියණිය දර්ශණි චතුරිකා සිරිසේන පෙර පැවති සම්මුඛ සාකච්ඡාවක දී සිලෝන් ජර්නල් හා කියා සිටියාය.
ජනාධිපති මෛත්‍රීපාල සිරිසේන ඝාතනය කිරිමට ආ බව කියන කොටි සාමාජිකයෙකු ද ජනාධිපතිවරයා විසින් නිදහස් කර යවා ඇත.
Facebook Comments
