සැබෑ ජාතික සංහිඳියාව ඇති කරලීම සඳහා සමානාත්මතාව පදනම් කරගත් දේශපාලනික තීන්දු තීරණ ගැනීමේ ව්‍යුහයන් හඳුන්වාදීමේ වැදගත්කම ජනාධිපතිවරයා පාර්ලිමේන්තුවට පෙන්වා දී තිබේ.
එම අරමුණු ජයගැනීම උදෙසා දැනට ක‍්‍රියාත්මක පළාත් සභා ක‍්‍රමය ශක්තිමත් කිරීම අවශ්‍ය බව ජනාධිපති මෛත්‍රීපාල සිරිසේන 08 අඟහරුවදා පාර්ලිමේන්තුවේ නව සභාවාරයේ සමාරම්භක දේශනය සිදුකරමින් කියා සිටියේය.
“දැනට ක‍්‍රියාත්මක පළාත් සභා ක‍්‍රමය ශක්තිමත් කිරීම අද දවසේ අවශ්‍යතාවක් යැයි මම විශ්වාස කරමි.කුමන විවේචන තිබුණ ද උතුරු නැගෙනහිර ජනතාවගේ නොසන්සුන්තාව ස්ථිර වශයෙන් සමනය කිරීම සඳහා එදා මෙදාතුර ජනතාවගේ කැමැත්ත හා එකඟත්වය මත කිසියම් දේශපාලන වැඩපිළිවෙළකට අවතීර්ණ විය යුතු” යැයි ජනපති පාර්ලිමේන්තුවට පෙන්වා දී ඇත.
භෞතික වශයෙන් ත‍්‍රස්තවාදීන් පරාජය කළ ද ඔවුන්ගේ මතවාදය සම්පූර්ණ ලෙස පරාජය කිරීම තවමත් සම්පූර්ණ වී නොමැති බව පවසන ජනාධිපතිවරයා පසුගිය වසර තුන හමාරක කාලය තුළ තමන් වඩාත් උත්සාහ ගත්තේ ජාත්‍යන්තර සහයෝගිතාව තුළ එම මතවාදය පරාජය කිරීම සඳහා බව ද ප්‍රකාශ කර තිබේ.
තමන් ආණ්ඩුව බාර ගන්නා විට පශ්චාත් යුද කළමනාකරණයේ ඇතිව තිබු ගැටලු වලට පිළිතුරු සැපයීම අවුරුදු හතකින් පමා වී අසීරුව පැවති බවත් දශක තුනක් පුරා සමාජයේ මුල් බැසගෙන තිබුණ යුද මානසිකත්වය ඉවත් කර සහජීවනය ස්ථාපිත කරන්නට තවදුරටත් බොහෝ දෑ කල යුතුව ඇතැයි ද ජනපති අවධාරණය කළේය.
ආණ්ඩුවකට පමණක් එය තනිව ඉටු කල නොහැකි බව පෙන්වා දුන් ජනාධිපතිවරයා ඒ සඳහා සමාජයේ සෑම පාර්ශ්වයකම සෘජු මැදිහත්වීම අත්‍යාවශ්‍යතාවය හා එකී අරමුණ වෙනුවෙන්, සියලූ දෙනා එකමුතු වී කටයුතු කරන මෙන් සෑම පාර්ශ්වයකටම ආරාධනා කරන බවයි වැඩි දුරටත් කියා සිටියේ.
Facebook Comments
