ජනාධිපතිවරයාගේ මුලිකත්වයෙන් පිහිටුවන ලද උතුරු නැගෙනහිර සංවර්ධනය සඳහා වන කාර්ය සාධක බලකායේ මංගල රැස්වීම උතුරේ මහ ඇමතිවරයා විසින් වර්ජනය කර තිබේ.
කොළඹ හිඳිමින්ම රැස්වීම වර්ජනය කළ උතුරේ මහ ඇමැතිවරයා මෙය උතුරු නැගෙනහිර ජනතාවට ඔවුන්ගේ අයිතිය නොදී පළාත මධ්‍යම ආණ්ඩුවට අත්පත් කර ගැනීමේ වෑයමක් යැයි චෝදනා කළේය.
උතුරු නැගෙනහිර සංවර්ධන කටයුතු කාර්යක්ෂම කිරීම, විධිමත් කිරීම සහ වේගවත් කිරීම නව බලකායේ අරමුණ බව 30 සඳුදා පස්වරුවේ සිය කාර්යාලයේ පැවති පළමු රැස්වීම අමතා ජනාධිපතිවරයා කියා සිටියේය.
අගමැතිවරයා, කැබිනට් අමාත්‍යවරුන් 15 දෙනෙක් , පළාතේ දෙකේ ආණ්ඩුකාරවරුන්, පළාත් ප‍්‍රධාන අමාත්‍යවරුන් දෙදෙනා, අමාත්‍යාංශ කිහිපයක ලේකම්වරුන් සහ ති‍්‍රවිධ හමුදා ප‍්‍රධානින්ගෙන් එම කාර්ය සාධක බලකාය සමන්විත වෙයි.
යුද පීඩිත උතුරු නැගෙනහිර භෞතික සම්පත් දියුණු කිරීම සඳහා වර්තමාන රජය විශාල වැඩ කොටසක් කළ බව ජනාධිපති මෛත්‍රිපාල සිරිසේන ප්‍රකාශ කළත් පළාත් සභාව වෙනුවෙන් ලබා දිය යුතු ප්‍රතිපාදන පවා ගිය ආණ්ඩුව මෙන්ම මේ ආණ්ඩුවත් ලබා දී නැති බවටයි මහ ඇමැති සී වී විග්නේස්වරන් වැඩි දුරටත් චෝදනා කරන්නේ.
Facebook Comments
