දේශීය සහ ජාත්‍යන්තර මානව හිමිකම් සංවිධාන වල විවේචනයට ලක්ව ඇති ත්රස්තවාදය පිටුදැකීමේ පනතට ජනතා විමුක්ති පෙරමුණ ද විරෝධය එල්ල කර තිබේ.
පවතින මෙන්ම නව ත්රස්තවාදය වැලැක්වීමේ පනත් කෙටුපත හරහා ද සිදුවන්නේ මර්දනකාරී රාජ්‍ය යාන්ත්‍රණය ශක්තිමත් කිරීම බවයි ජවිපෙ ප්‍රචාරක ලේකම් විජිත හේරත් පෙන්වා දෙන්නේ.
“සැබැවින්ම ත්රස්තවාදය වැළැක්වීම සඳහා යැයි කියමින් ආණ්ඩුවට එරෙහි සියලු දෙනා මර්දනය කරන්න, හිංසා පීඩා කරන්න මේ පනත පාවිචිචි කළා. 1979 මේ පනත ගේන කොට ඔය කියන ආකාරයේ ත‍්‍රස්තවාදී සංවිධානයක් ප‍්‍රබලව මතුවෙලා තිබුණේ නැහැ. එදා තිබුණේ ජේ.ආර්.ගෙ අලුත් ආණ්ඩුවේ වැරදි ආර්ථික ප‍්‍රතිපත්තියට එරෙහිව වෘත්තීය සමිති, ශිෂ්‍ය සංගම් විසින් දියත් කරන ලද විරෝධතාවයක්. ඒවා මැඩපවත්වන්න තමයි මේ පනත ගෙනාවේ,” යි මන්ත්‍රීවරයා කියා සිටියේය.
පවතින පනතේ කිහිපයක් ඉවත් කර එම වගන්තිවලටත් වඩා බරපතල වගන්ති රැසක්ම මෙම නව කෙටුම්පතට ඇතුළත් කර ඇති බව ද විජිත හේරත් මන්ත්‍රීවරයා ප්‍රකාශ කළේය.
රටේ සිවිල් පුරවැසියන්ගේ අයිතිවාසිකම්වලට මෙවැනි පනත් බාධාවක් බව පෙන්වා දුන් මන්ත්‍රීවරයා යහපාලන රජයට බලයට පත්වන විට ත්‍රස්ත පනත අහෝසි කරන බවට දුන් පොරොන්දුව ද සිහිපත් කර දුනි.
යහපාලන රජය ජනතාවට මෙන්ම ජාත්‍යන්තරයට ද දුන් පොරොන්දු අනුව ත්රස්තවාදය වැළැක්වීමේ පනත අහෝසි කළ යුතු බවයි ජවිපෙ ප්‍රචාරක ලේකම් විජිත හේරත් වැඩි දුරටත් කියා සිටියේ.
Facebook Comments
