ත්‍රස්ත පොලිසිය ශ්‍රී ලංකාවේ අධ්‍යාපන ප්‍රතිපත්තිය ගැන ප්‍රශ්න කරයි

දෙමළ ජනයාට සම්ප්‍රදායික වශයෙන් උරුම වූ යෙදුමක් සමාජ මාධ්‍ය තුළ භාවිතා කිරීම ත්‍රස්තවාදී ක්‍රියාවක් සේ සැලකීම ලංකාවේ අධ්‍යාපන ප්‍රතිපත්තියට විරුද්ධ වීමක් බව ප්‍රශ්න කිරීමට ලක් වු උතුරේ දේශපාලන ක්‍රියාධරයෙක් ත්‍රස්ත මර්දන හා විමර්ශන කොට්ඨාශයට දැනුම් දී තිබේ.

ත්‍රස්ත මර්දන හා විමර්ශන කොට්ඨාශ (CTID) යේ කිලිනොච්චි ඒකකයට දෙසැම්බර් 28 වැනිදා උදෑසන කැඳවා පැය දෙකකට ආසන්න කාලයක් පොලීසිය විසින් කරච්චි ප්‍රාදේශිය සභාවේ හිටපු සභාපති අරුනාචලම් වේලමාලිගිදන් ප්‍රශ්න කර ඇත්තේ ඔහුගේ සමාජ මාධ්‍ය පරිශීලනය සම්බන්ධයෙනි.

දෙමළ සාහිත්‍යයේ එන ‘වීර වනක්කම් නම් යෙදුම මුහුණු පොතේ කොමෙන්ටුවක් ලෙස භාවිත කර තිබීම සම්බන්ධයෙන්ද ත්‍රස්ත මර්දන හා විමර්ශන කොට්ඨාශය තමන්ගෙන් ප්‍රශ්න කළ බව අරුනාචලම් වේලමාලිගිදන් පවසයි.

පාසල් පොත්වල පවා එන එවැනි කරුණක් සම්බන්ධයෙන් ප්‍රශ්න කිරීම ලංකාවේ අධ්‍යාපන ප්‍රතිපත්තියට පවා විරුද්ධව සිදු කරන ප්‍රශ්න කිරීමක් බව දෙමළ ක්‍රියාධරයා පොලිස් නිලධාරියාට පවසා තිබේ.

“වීර වනක්කම් කියන්නේ දෙමළ සම්ප්‍රදාය විසින් උරුම කරදුන් වචනයක්. එය එල්ටීටීඊයේ වචනයක් හෝ ඔවුන් විසින් නිර්මාණය කරන ලද වචනයක් හෝ තහනම් වචනයක් හෝ නෙමෙයි. පැරණි දෙමළ සාහිත්‍යයේ එන වචනයක්. එය දෙමළ සංස්කෘතිය හා බැඳුණු දෙයක්. මම කිව්වා ඒක උසස් පෙළ දෙමළ සාහිත්‍ය පොතේත් තියෙනවා කියලා. මම කිව්වා මේ විෂය රජයේ පෙළ පොතේ තියෙනවා කියලා. ඉතින් මම එයාට කිව්වා ඔයා අපිට කතා කරලා ප්‍රශ්න කරන්නේ ලංකාවේ අධ්‍යාපන ප්‍රතිපත්තියට විරුද්ධව කියලා.”

ජනතාව වෙනුවෙන් සේවය කර හා සටන් කර මිය ගිය අයකුට ගෞරවාචාර දැක්වීම සදහා දෙමළ සංස්කෘතිය තුළ විර වනක්කම් යන යෙදුම භාවිතයට ගැනේ. ‘විරු උපහාර’ යන්න එහි සරල සිංහල අරුතයි.

‘කමෙන්ට්, ලයික් එපා’

තමන්ගේ සමාජ මාධ්‍ය භාවිතය සම්බන්ධයෙන් දෙසැම්බර් 28 වැනිදා ත්‍රස්ත මර්දන හා විමර්ශන කොට්ඨාශ (CTID) යේ කිලිනොච්චි ඒකකයේ නිලධාරියා තව දුරටත් ප්‍රශ්න කළ බව සදහන් කරන අරුනාචලම් වේලමාලිගිදන් අවධාරණය කරන්නේ සමාජ මාධ්‍ය භාවිත කළ යුතු ආකාරය සම්බන්ධයෙන්ද පොලීසිය තමන්ට එහිදී සීමා පැනවු බවයි.

“ෆෙස්බුක් පෝස්ට්, මගේ පෝස්ට් නෙමෙයි, අනිත් අයගේ පෝස්ට් වලට මම කමෙන්ට් කරලා තියනවාලු. ලයික් කරලත් තියනවාලු, ඒ වගේම ජාතිවාදය අවුස්සන විදිහට වචන පාවිච්චි කරලා තියනවාලු. විශේෂයෙන්ම අපි වගේ අයගේ පෝස්ට් දැකලා මේ විදිහටම හැසිරෙනවාලු. ඒ නිසා මෙවැනි ජාතිවාදි පෝස්ට් හෝ කමෙන්ට්, කොටි සංවිධානයේ ලාංඡනය සහ එල්.ටී.ටී.ඊය ගැන වෙනත් දේවල් පල නොකළ යුතුලු. ”

එලෙස නීති පැනවු පොලීසිය තමා විසින් පළ කළ එවැනි නිශ්චිත පෝස්ටුවක් නොපෙන්නු බවත් ඔහු මාධ්‍යවේදීන් සමග පවසා තිබේ.

වෙනත් පුද්ගලයන් කිහිප දෙනකුට අයත් මුහුණු පොතේ ගිනුම් කිහිපයක් පෙන්වා ඔවුන් හදුනන්නේදැයි ත්‍රස්ත මර්දන හා විමර්ශන කොට්ඨාශය විසින් අරුනාචලම් වේලමාලිගිදන්ගෙන් ප්‍රශ්න කර ඇති අතර තමන් ඔවුන් හදුනන්නේ නැති බව පැවසු විට ඔවුන්ගේ පෝස්ට් වලට කමෙන්ට් සහ ලයික් සිදු නොකරන ලෙසත් පොලීසිය ඔහුට දැනුම් දී තිබේ.

ත්‍රස්ත මර්දන හා විමර්ශන කොට්ඨාශ (CTID) යේ කිලිනොච්චි ඒකකයේ නිලධාරීන් දේශපාලන ක්‍රියාධරයාට වැඩි දුරටත් දැනුම් දී ඇත්තේ ජනතාව නොමග යවන ආකාරයේ පෝස්ට් පළ කිරීමෙන් වලකින ලෙස දැනුම් දීම සදහා මෙලෙස කැදවා ප්‍රශ්න කිරීම සිදු කළ බවයි.

“වෙන කවුරු හරි පෝස්ට් එකක් දැම්මට කමක් නෑ, දේශපාලකයෝ දැම්මොත් මිනිස්සු එවා ෆලෝ කරනවා. ජනතාව නොමග යවන්න එපා කියලා කියන්න තමයි මේ ප්‍රශ්න කිරීම සිදු කරන්නේ කියලා ඔවුන් කිව්වා.“

පාර්ලිමේන්තු මන්ත්‍රී ශිවඥානම් ශ්‍රී ධරන්ගේ කිලිනොච්චි කාර්යාලයේ පුපුරණ ද්‍රව්‍ය තිබී සොයා ගැනීමත් සමග 2013 ජනවාරි 13 වැනිදා අත්අඩංගුවට පත් වු අරුනාචලම් වේලමාලිගිදන් වසරකට වැඩි කාලයක් සිර බත් කෑ අයෙකි.

නිදහස ලැබීමෙන් පසු, දෙමළ ජනයාගේ අයිතීන් වෙනුවෙන් පෙනී සිටීම නිසා පසුගිය සමයේ අවස්ථා ගණනාවකදීම ත්‍රස්ත මර්දන හා විමර්ශන කොට්ඨාශය හමුවේ ප්‍රකාශ ලබා දීමට ඔහුට සිදු වු බව පළාත් බද වාර්තාකරුවෝ පවසති.