නිවැරදි තොරතුරු දැනගැනීම අත්‍යාවශ්‍ය වී තිබෙන ව්‍යාකුල සමයක ශ්‍රී ලංකාවේ රාජ්‍ය නොවන මාධ්‍ය ඔස්සේ පලකෙරෙන තොරතුරු වලට සීමා පැනවීම සඳහා රජය කටයුතු කරමින් සිටින ආකාරය පිළිබඳ තිගැස්සෙන සුළු තොරතුරු හෙළිවෙමින් පවතී.
අධි තාක්ෂණික මෙවලම් යොදා ගනිමින් සමාජ මාධ්‍ය මර්දනය කිරීම සම්බන්ධයෙන් ජාත්‍යන්තර වශයෙන් අපකීර්තියට පත්ව සිටින චීන ජනාධිපතිවරයා අන්තර්ජාලයේ පලකෙරෙන තොරතුරු වාරණය කිරීම සඳහා ශ්‍රී ලංකාවට උපකාර කිරීමට ඉදිරිපත් වී සිටින අතර පොලිසිය ලබාදෙන තොරතුරු කෙරෙහි විශ්වාසය තබන ලෙස අගමැතිවරයා ඉල්ලීමක් කර ඇත.
චීනයේ ජාත්‍යන්තර සමුළුවකට සහභාගි වෙමින් සිටියදී ජනාධිපති මෛත්‍රිපාල සිරිසේන විසින් කරන ලද ඉල්ලීමක් පරිදි අන්තර්ජාල සහ සමාජ වෙබ් අඩවි අධීක්ෂණය සඳහා “කඩිනම් සහාය” ලබාදීමටත්, තාක්ෂණ විශේෂඥ කණ්ඩායමක් දිවයිනට එවීමටත්, චීන ජනපති ෂි ජින්පින් එකඟවූ බව ශ්‍රී ලංකාවේ ජනාධිපති මාධ්‍ය ඒකකය නිවේදනය කර තිබේ.
චීනය සහ ශ්‍රී ලංකාවේ ජනාධිපතිවරුන් බෙයිජිං නුවර සිදුකළ සාකච්ඡාවේදී ආරක්ෂක අංශ අතර සහයෝගිතා වැඩපිළිවෙළ ශක්තිමත් කර ගැනීම සහ බුද්ධි අංශ අතර තොරතුරු හුවමාරු වැඩසටහන් පුළුල් කර ගැනීම පිළිබඳව ද සාකච්ඡාවට බඳුන් කෙරුනු බව ශ්‍රී ලංකාවේ ජනාධිපති මාධ්‍ය ඒකකය පවසයි.
පැරිසිය මුල් කොටගත් දේශසීමා නොමැති වාර්තා කරුවෝ (RSF) සංවිධානය පවසන පරිදි චීනය සිය මර්දනීය තාක්ෂණය භාවිතා කරමින් “නව ජනමාධ්‍ය ආඥාව” කට අනුගත වන ලෙස කලාපයේ රටවල ආණ්ඩු පොළඹවමින් සිටින අතර එය අග්නි දිග ආසියානු රටවල සාර්ථක ලෙස ක්‍රියාත්මක වේ.
එම සංවිධානය විසින් 2018 සමීක්ෂණය කොට ඇති රටවල් 180 ක් අතරින් ජනමාධ්‍ය නිදහස සම්බන්ධ ජාත්‍යන්තර දර්ශකයේ චීනය සිටින්නේ 176 වැනි පහලම අඩියකය.
මේ අතර, ප්‍රහාර සම්බන්ධයෙන් වර්තමානයේ සිදුවන පරීක්ෂණ පිළිබඳ ජනමාධ්‍ය වල පලවන ප්‍රවෘත්ති පිළිබඳව අවිශ්වාසය පල කර තිබෙන අගමැතිවරයා “රහස්‍ය භාවයට යම් හානියක් සිදුවිය හැකි” නිසා සියලු තොරතුරු පැවසීමට කටයුතු නොකරන බව කියා සිටී.
“මාධ්‍යයට තම ප්‍රවෘත්ති විකාශයන් අලෙවි කර ගැනීමට අවශ්‍ය නිසා කුමන ආකාරයේ වාර්තා ඉදිරිපත් කළත් සත්‍ය තොරතුරු ලබාදෙන්නේ පොලීසිය හරහා පමණක් බව මම අවධාරණය කරනවා,” යි අගමැති රනිල් වික්‍රමසිංහ එක්සත් ජාතික පක්ෂයේ සන්නිවේදන බලකායේ ක්‍රියාකාරීන් අමතා අරලිය ගහ මන්දිරයේදී ප්‍රකාශ කර තිබේ.
මෑත භාගයේ කලහකාරී ප්‍රචණ්ඩ ක්‍රියා හටගත් බොහෝ අවස්ථා වලදී ආණ්ඩුව සමාජ මාධ්‍ය ජාල අවහිර කරන්නට පියවර ගනු ලැබීය.
Facebook Comments
